Vahid Əhmədov: "Azərbaycanın yaxın illərdə dəmir yolu üzərindən sərnişindaşıma və yükdaşımalarda əldə edəcəyi vəsait ölkə iqtisadiyyatına güclü təkan verəcək"
Bu il istismara verilməsi nəzərdə tutulan Bakı-Tiflis-Qars (BTQ) dəmir yolu dəhlizi Avropa Birliyinə tranzit yükləri Rusiya ərazisindən yan keçməklə çatdıracaq.
BTQ-nin 2017-ci ilin sonu və ya 2018-ci ilin əvvəlində istismara veriləcəyi gözlənir. Magistral Çini Avropa ilə sürətli və təhlükəsiz ticarət dəhlizi ilə birləşdirəcək "Bir kəmər - bir yol" meqalayihəsinin əsas tərkib hissəsi olacaq. İlk dövrlərdə magistral vasitəsilə 6,5 mln. ton, daha sonra isə daşınmaların 17-20 mln. tona çatırılacağı gözlənir. Hazırda Çindən Avropaya quru yükdaşımalarının əsas həcmi Transsibir magistralı vasitəsilə çatdırılır. Çünki Rusiya daşımalar zamanı nisbətən ucuz tariflər (1 konteyner üçün 6-7 min dollar) sayəsində Azərbaycan və Türkiyədən üstünlük əldə edib. Lakin yeni magistralın tikintisi ilə vəziyyət dəyişəcək.
Məlumat üçün qeyd edək ki, indiyə qədər sözügedən dəmir yolunun maliyyələşdirilməsinə Dövlət Neft Fondu tərəfindən 631.79 milyon dollar vəsait ayrılıb. Vəsait əsasən Gürcüstan hissəsində dəmir yolunun çəkilməsinə və oradakı infrastrukturun yenilənməsinə yönəldilib. Məlumat üçün qeyd edək ki, Bakı-Tiflis-Qars dəmir yolu layihəsinin tikintisi 2007-ci ildə başlayıb. Onun 2011-ci ildə istismara veriləcəyi planlaşdırılsa da, müxtəlif səbəblərdən bu bir qədər yubanıb.
Bütün bunlara rəğmən, layihənin çox böyük əhəmiyyəti var və Azərbaycan gələcəkdə ciddi fayda gətirəcək. Sözügedən məsələni dəyərləndirən iqtisadçı, millət vəkili Vahid Əhmədovun fikrincə, Azərbaycan qısa zamanda dünyanın dörd gözlə baxdığı unikal nəqliyyat qovşağı kimi önə çıxacaq: "Bu gün dünya iqtisadiyyatında təlatümlərin davamlı xarakter aldığı və neft-qaz sektorunda qiymət tərəddüdləri fonunda qeyri-müəyyənliyin hökmranlıq etdiyi bir vaxtda ölkələr hər sent uğrunda savaşa çıxıblar. Bu baxımdan Azərbaycanın yaxın illərdə dəmir yolu üzərindən sərnişindaşıma və yükdaşımalarda əldə edəcəyi vəsait ölkə iqtisadiyyatına güclü təkan verəcək. Digər tərəfdən, əminliklə iddia etmək olar ki, Bakı-Tiflis-Qars Azərbaycanın müstəqilliyinin daha bir "polad qarantı" rolunu oynayacaq. Siyasi dividendləri iqtisadi səmərəsini kölgədə qoyacaq. Buna görə də cənab Prezidenti ürəkdən alqışlamaq və təbrik etmək lazımdır ki, Azərbaycan xalqının və dövlətinin taleyində həlledici dönüm nöqtələrinin tapılmasına, onların həyata vəsiqə qazanmasına inadkarlıqla çalışır və işi uğurlu sonluğa aparacaq unikal siyasət yürüdür".
Vidadi ORDAHALLI
