Arzu Nağıyev: "Ermənistan və onun rəhbərliyi beynəlxalq qanunlara tabe edilməli və müvafiq xəbərdarlığa məruz qalmalıdır" Elçin Əhmədov: "Beynəlxalq təşkilatlar və dünya ölkələri Ermənistanın öz işğalçılıq siyasətini ört-basdır etmək məqsədilə Dağlıq Qarabağda keçirdiyi bu cür qondarma "seçki"ləri heç vaxt tanımayıb"
Azərbaycan Respublikasının Ermənistan silahlı qüvvələri tərəfindən işğal edilmiş Dağlıq Qarabağ bölgəsində iyulun 19-da "prezident seçkiləri" keçirilib. "Seçki"nin nəticəsinə görə, Arkadiy Qukasyan qondarma qurumun rəhbəri seçilib. Azərbaycan Prezidenti dəfələrlə bəyan edib ki, işğal olunmuş ərazilərdə keçirilən qanunsuz "seçki"lər, "referendum"lar Azərbaycanın haqq mövqeyini daha da möhkəmlədir. Çünki dünyanın heç bir ölkəsi həmin seçkilərin legitimliyini tanımır. Belə olduğu halda, ermənilər bu addımı niyə atır?
Politoloq Arzu Nağıyev qəzetimizə bildirdi ki, bu məsələlərə o qədər də böyük diqqət ayırmaq və ciddi yanaşmaq lazım deyil: "Bu birinci dəfə deyil. Onlar bütün vaxtlar beynəlxalq norma və prinsipləri pozur və heç bir beynəlxalq qurum tərəfindən tanınmayan və haqq qazandırılmayan tədbirlər keçirir. Təbii ki, bunların hamısı danışıqları pozmaq və status-kvonu saxlamaq üçün nəzərdə tutulan addımlardır. Məlumdur ki, separatçı qurum belə tədbirlərlə Azərbaycan Konstitusiyasını, beynəlxalq hüququn norma və prinsiplərini kobud şəkildə pozur. Eyni zamanda ATƏT-in Minsk Qrupu tərəfindən aparılan danışıqlara və ümumiyyətlə, regionda sülh və əməkdaşlıq yaratmaq təşəbbüslərinə ciddi mane olurlar. Məhz buna görə də qeyri-legitim bir qurumun bu addımları beynəlxalq müstəvidə qınanmalı və qanunsuzluğu barədə xəbərdarlıq edilməlidir. Bununla Ermənistan və onun rəhbərliyi beynəlxalq qanunlara tabe edilməli və müvafiq xəbərdarlığa məruz qalmalıdır".
Digər politoloq Elçin Əhmədov hesab edir ki, Azərbaycanın işğal olunmuş Dağlıq Qarabağ bölgəsində yaradılmış qanunsuz rejim artıq neçənci dəfədir qondarma "seçki"lər keçirir: "2012-ci il iyulun 19-da qondarma "prezident seçkiləri"nin, 2015-ci il mayın 3-də "parlament seçkiləri"nin, 2015-ci il sentyabrın 13-də "özünüidarə orqanları"na seçkilərin, 2017-ci il fevralın 20-də "konstitusiyaya dəyişikliklər edilməsi ilə bağlı referendum"un keçirilməsi Azərbaycan Respublikası Konstitusiyasının, beynəlxalq hüququn norma və prinsiplərinin kobud şəkildə pozulması deməkdir.
Azərbaycanın işğal olunmuş ərazilərində Ermənistanın nəzarəti altında olan və tanınmamış qanunsuz rejim həmin bölgədə azərbaycanlı əhalinin etnik təmizlənməsi əsasında yaradılmış cinayətkar qurumdur. Bununla yanaşı, Ermənistan münaqişənin həlli ilə bağlı danışıqlarda Dağlıq Qarabağın "müstəqil tərəf" kimi iştirakını təmin etməyə çalışır. Amma 2016-cı ilin aprel döyüşləri onu sübut etdi ki, "DQR" adlı qurum mifdir. Dördgünlük müharibədə qarşı tərəfin itkiləri arasında bir nəfər də olsun Dağlıq Qarabağ ermənisi yox idi. Çünki "Dağlıq Qarabağ ordusu" mövcud deyil. Orada Ermənistan silahlı qüvvələri var və torpaqlarımızın 20 faizi bu ölkə tərəfindən işğal olunub.
Ermənistan Respublikası beynəlxalq hüququn norma və prinsiplərinə, BMT Təhlükəsizlik Şurasının qətnamələrinə zidd olaraq və Dağlıq Qarabağ münaqişəsi ilə bağlı beynəlxalq təşkilatların qərarlarına əhəmiyyət verməyərək artıq neçənci dəfədir Azərbaycan Respublikasının işğal altındakı ərazilərində belə qondarma "seçki"lər təşkil edir. Bütün dünyaya məlumdur ki, Azərbaycanın işğal olunmuş ərazilərindəki qanunsuz rejim azərbaycanlı əhalinin etnik təmizlənməsi əsasında Ermənistan tərəfindən təşkil olunmuş cinayətkar qurumdur. Məhz buna görə beynəlxalq təşkilatlar və dünya ölkələri Ermənistanın öz işğalçılıq siyasətini ört-basdır etmək məqsədilə Dağlıq Qarabağda keçirdiyi bu cür qondarma "seçki"ləri heç vaxt tanımayıb. Azərbaycan Respublikasının Dağlıq Qarabağ bölgəsində legitim seçkilər yalnız Ermənistan silahlı qüvvələrinin işğal olunmuş ərazilərdən çıxarılmasından, oradan təcavüzə məruz qalaraq məcburən köçkün düşmüş azərbaycanlı əhalinin öz doğma torpaqlarına qayıtmasından sonra Azərbaycan qanunları əsasında keçirilə bilər".
Məhəmmədəli QƏRİBLİ
