Elbrus Mirzəyev: "Təmas xəttində yanğınlar törədən mənfur qonşularımız ənənələrinə sadiq qalaraq çaylarımızı da çirkləndirir"
Xarici İşlər Nazirliyinin mətbuat xidmətinin rəhbəri Hikmət Hacıyev bildirib ki, Ermənistanın su resurslarından ekoloji terror və təzyiq vasitəsi kimi istifadə etməsi dövlət səviyyəsində həyata keçirilən siyasətdir:
"Yerevanın bu siyasəti Ermənistan ərazisindən Azərbaycana doğru axan çaylara, həmçinin, Azərbaycanın işğal olunmuş ərazilərindəki su resurslarına, o cümlədən Sərsəng su anbarına münasibətdə tətbiq olunur. Ermənistanın su resurslarından ekoloji terror və təzyiq vasitəsi kimi istifadə etməsi dövlət səviyyəsində həyata keçirilən siyasətdir. Ermənistanın Azərbaycana doğru axan su resurslarını qəsdən çirkləndirməsi mövcud problemin başqa bir istiqamətidir. Ermənistanın ekologiya nazirinin müavini Erik Qriqoryanın məhz Azərbaycana su axınının qarşısını almaq üçün Ermənistandan Araz çayına axan su resurslarının məhdudlaşdırılması barədə açıqlaması Ermənistanın sudan ekoloji terror və təhdid kimi istifadə etməsini bir daha sübut edir. Bu baxımdan Ermənistan sivil davranış və öhdəliklərdən boyun qaçırmaq üçün "Su Konvensiyası" adı ilə tanınan "Transsərhəd su axınları və beynəlxalq göllərin mühafizəsi Konvensiyası"na qoşulmaqdan nümayişkarcasına imtina edir. Buna baxmayaraq, Ermənistanın Beynəlxalq çayların suyundan istifadə haqqında 1966-cı il Helsinki və 2004-cü il Berlin Qaydaları, BMT Baş Assambleyasının transsərhəd sular haqqında qanuna dair qətnaməsi, Avropa Şurası Parlament Assambleyasının Avropada transsərhəd su hövzələri haqqında qətnaməsi və digər beynəlxalq sənədlər üzrə öhdəlikləri var".
H.Hacıyev qeyd edib ki, Avropa Şurası Parlament Assambleyası 2016-cı il qış sessiyasında məxsusi olaraq "Azərbaycanın sərhəd rayonlarının sakinlərinin qəsdən sudan məhrum edilməsi" haqqında qətnamə qəbul edib və bu qətnamədə Ermənistanın sərhədyanı çaylara və işğal olunmuş ərazilərimizdəki Sərsəng su anbarına münasibətdə yürütdüyü siyasəti ekoloji terror kimi qiymətləndirib: "Bu sənədlərə əsasən, sudan istifadə hüququ həyat və sağlamlıq üçün vacibdir və sudan maneəsiz istifadə (suya maneəsiz çıxış) hər bir dövlət üçün əsas hüquq, həyat mənbəyi və strateji əhəmiyyətə malikdir və sərhədlərin mövcudluğu bu istifadəni məhdudlaşdıra bilməz. Ermənistanın ekoloji terrorizm və onun tərkib hissəsi olaraq "su terroru" siyasəti Azərbaycan tərəfindən beynəlxalq təşkilatlarda davamlı olaraq qaldırılır. Ermənistan tərəfinin son açıqlaması da aidiyyəti beynəlxalq təşkilatlarda müzakirəyə çıxarılacaq".
Ermənistanın bu siyasətinin qarşısını tam olaraq necə almaq olar?
Ekoloq Elbrus Mirzəyev qəzetimizə bildirdi ki, Azərbaycanın bu bəyanatı təsadüfən meydana çıxmayıb: "Azərbaycan bu hallarla bağlı əlindən gələni edir. Hətta belə hallarla bağlı AŞPA-da xüsusi qətnamə də qəbul edilib. Ancaq işğalçı ölkə öz mənfurluğundan əl çəkmir. Ermənilərin ekoloji terroru davam edir. Təmas xəttində yanğınlar törədən mənfur qonşularımız ənənələrinə sadiq qalaraq çaylarımızı da çirkləndirir.
Azərbaycanın böyük çaylarından biri olan Araz Ermənistandan keçir və mütəmadi olaraq ermənilər tərəfindən çirkləndirilir. Bədnam qonşularımız Gəncəçay, Qoşqarçay, Şəmkirçay, Tovuzçay, Ağstafaçayı da çirkləndirir.
Acınacaqlı vəziyyət Tovuzun Əlibəyli kəndindən keçən Tovuz çayında da yaşanır. Çayın mütəmadi olaraq çirkləndirilməsi sakinləri narahat edir.
Belə çaylardan kənd təsərrüfatında suvarma məqsədilə istifadə etmək də məsləhət deyil. Torpağı və bitkiləri zəhərləyir. Xüsusilə Araz çayına atılan tullantılar çox təhlükəlidir.
Mənfur qonşular partlayıcı qurğuları da vaxtaşırı Azərbaycan tərəfinə axıdır. Bəzədilmiş partlayıcılardan istifadə edirlər. Məsələn, bir neçə il əvvəl Tovuzçay vasitəsilə Əlibəyli kəndinə axıdılan kukla 13 yaşlı Aygünün həyatına son qoydu. Bu cür çirkin plan isə yalnız ermənilərin ağlına gələ bilər. Bunun üçün ancaq beynəlxalq təşkilatları ayağa qaldırmaq lazımdır. XİN-in bəyanatında olan bu cür məqamlar təqdir edilməlidir".
Məhəmmədəli QƏRİBLİ
