Yeganə Hacıyeva: "Çox yanlış və qüsurlu yanaşmadır"
Rusiya Liberal-Demokrat Partiyasının (LDPR) lideri Vladimir Jirinovski keçmiş sovet respublikalarındakı münaqişələrin həlli ilə bağlı növbəti dəfə özünün "orijinal" ideyasını irəli sürüb. Rusiya KİV-i xəbər verir ki, Jirinovski Dövlət Dumasında jurnalistlərlə söhbətində bu münaqişələrin həllinin yeganə yolunun "bütün respublikaların yenidən vahid dövlətin tərkibinə qayıtması" olduğunu bildirib.
"Bizdə Donbas, Dnestryanı, Abxaziya, Osetiya, Qarabağ əzab çəkir. Həll yolu birdir - ancaq vahid ölkənin bərpası, bunsuz qan və zorakılıq hələ onilliklər bundan sonra davam edəcək" - Jirinovski deyib.
"LDPR" lideri hesab edir ki, ölkələrin birləşməsi ancaq referendum yolu ilə olmalıdır. Onun fikrincə, keçmiş SSRİ-nin heç bir respublikası yenidən Rusiya ilə birləşib vahid ölkədə yaşamaqdan imtina etməz. "Referendum yolu ilə vahid böyük ölkə. Normal referendumda hamı, o cümlədən Pribaltika SSRİ sərhədlərinə qayıdacaq" - Jirinovski bildirib.
"LDPR" lideri bundan əvvəl də bir neçə dəfə Qarabağ münaqişəsinin həll yolu kimi "Azərbaycan və Ermənistanın Rusiyaya birləşməsini" təklif edib.
Jirinovskinin separatçı qurumların Rusiyaya birləşdirilməsilə bağlı etdiyi təklifi necə dəyərləndirmək olar?
Politoloq Yeganə Hacıyeva qəzetimizə açıqlamasında bildirdi ki, Jirinovski təsadüfi nəsə danışmır: "Onu bəzən Kremlin gizli danışan dili adlandırırlar. Bu açıqlaması ilə Jirinovski təmsil etdiyi ölkənin imperiya ambisiyalarının olduğunu gizlətmir. Bir daha sübut olunur ki, postsovet məkanındakı bütün separatçı rejimləri məhz Rusiya yaradıb. Bu vasitə ilə həmin ölkələrin siyasətinə təsir edirlər. Deyilən separatçı rejimlərin təmsil olunduğu əraziyə baxın. Görünəcək ki, həmin subyektlər arasında xeyli məsafə var. Yəni ümimi sərhədlər olmadığından, onların vahid bir ölkə daxilində birləşdirilməsi mümkün deyil. Jirinovskinin dediyi ideya həyata keçsə, onda gərək həmin ölkələrin bütün əraziləri də Rusiyaya birləşdirilsin. Bu da, faktiki olaraq, Rusiyanın keçmiş sərhədlərini bərpa etməsi anlamına gəlir. Ən vacib məsələ isə bundan ibarətdir ki, həmin siyasətçi Qarabağ probleminin həllini Ermənistanla Azərbaycanın vahid dövlət tərkibində birləşdirilməsində görür. Həmsədr bir ölkənin tanınmış siyasətçisinin belə mövqedə olması Rusiyanın problemə bəslədiyi biganəliyin göstəricisi də sayıla bilər. Rəsmi mövqe olmasa da, hər halda bu fikri Rusiya siyasi arenasının ən tanınmış siyasilərindən biri deyir. Çox yanlış və qüsurlu yanaşmadır".
Məhəmmədəli QƏRİBLİ
