Yeganə Hacıyeva: "Ermənistan tərəfindən işğala və təcavüzə məruz qalan dövlət kimi münaqişənin tezliklə həllində ən maraqlı tərəf məhz Azərbaycandır"
Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev müsahibəsində bildirib ki, Azərbaycan substantiv danışıqların tərəfdarı olsa da, Ermənistan bundan bütün vasitələrlə yayınmağa çalışır:
"Ermənistan tərəfinin substantiv danışıqlar ifadəsindən xüsusi qorxusu var. ATƏT-in Minsk Qrupunun həmsədrləri və BMT baş katibi dəfələrlə münaqişənin həlli üçün tərəfləri substantiv danışıqlara çağırsalar da, Ermənistan XİN rəhbəri hər dəfə bu ifadədən yayınmağa çalışır. Çünki substantiv danışıqlar həmsədrlərin qeyri-məqbul hesab etdikləri "status-kvo"nun dəyişdirilməsini, yəni işğal olunmuş Azərbaycan ərazilərindən Ermənistan qoşunlarının çıxarılması daxil olmaqla, kompleks tədbirləri ehtiva edir. ATƏT-in Minsk Qrupunun həmsədrləri adından danışan Ermənistan XİN rəhbəri indi də Rusiya Federasiyası XİN-in adından danışmağa başlayıb. Aprelin 26-da Moskvaya nə üçün getdiyini Ermənistan XİN rəhbəri özü bilər. Onu deyə bilərik ki, həmin gün Moskvada nazirlər səviyyəsində keçirilmiş görüşdə hazırda danışıqlar masasında olan təkliflər müzakirə olunub. Ermənistan XİN rəhbərinin üç ölkənin nazirinin Moskva görüşündə yalnız bir neçə cümlədən ibarət press-reliz hazırlamaqla məşğul olduğunu deməsi özünü gülünc yerə qoymaqdır.
Ermənistan XİN-in bu kimi qeyri-ciddi və lazımsız açıqlamaları danışıqlar prosesinə xələl gətirir. Bunun əvəzinə Ermənistan tərəfinin hazırda danışıqlar masasında olan sənəd üzrə substantiv danışıqlarda konstruktiv iştirak etməsi münaqişənin həllinə və regionda davamlı sülhün təmin olunmasına xidmət edərdi".
Ermənistanın substantiv danışıqlardan çəkinməsininn səbəbi nədir?
Politoloq Yeganə Hacıyeva qəzetimizə açıqlamasında bildirdi ki, Azərbaycan tərəfi substantiv danışıqların tərəfdarı qismində çıxış edir: "Çünki bu vəziyyət münaqişəni durğunluq həddindən çıxara bilər. Azərbaycan rəsmiləri və xüsusilə də XİN rəhbəri Elmar Məmmədyarov dəfələrlə qeyd edib ki, ATƏT-in Minsk Qrupunun həmsədrlərinin vasitəçiliyi ilə Ermənistan-Azərbaycan, Dağlıq Qarabağ münaqişəsinin həlli istiqamətində aparılan danışıqlar prosesinin intensivləşdirilməsi və mövcud vəziyyətin dəyişdirilməsi barədə səylər göstərilir. Bu xüsusda ən optimal variant kimi substantiv danışıqların aparılması qeyd edilir. Dağlıq Qarabağ münaqişəsinin həlli ilə əlaqədar yeni formula və ya düsturların kəşf edilməsinə ehtiyac yoxdur.
Ermənistan tərəfindən işğala və təcavüzə məruz qalan dövlət kimi münaqişənin tezliklə həllində ən maraqlı tərəf məhz Azərbaycandır. Azərbaycan tərəfi dəfələrlə bəyan edib ki, Vyana və Sankt-Peterburq görüşlərinin ruhuna sadiq qalaraq münaqişənin substantiv danışıqlar yolu ilə həllinin tərəfdarıdır. Ermənistan bilir ki, substantiv danışıqlar, ATƏT-in Minsk Qrupunun həmsədr ölkələrinin dövlət başçıları səviyyəsində bəyan etdikləri kimi, qəbuledilməz və qeyri-davamlı olan status-kvonun dəyişdirilməsi və Azərbaycan ərazilərinin işğaldan azad olunması ilə nəticələnə bilər. Ermənistan isə hər vəchlə status-kvonun qorunub saxlanmasında maraqlıdır. Bu səbəbdən də deyilən formuldan yayınır".
Məhəmmədəli QƏRİBLİ