Məhəmməd Əsədullazadə: "Məhz bu təşkilat vasitəsilə bu ölkə dünyada gedən proseslərə fəal müdaxilə imkanına malikdir"
Vaşinqtonun sayəsində NATO ölkələri müdafiəyə daha çox pul xərcləməyə başlayıb. Məlum olduğu kimi, bunu ABŞ prezidenti Donald Tramp Rumıniya prezidenti Klaus Yoxannislə birgə keçirilən mətbuat konfransında deyib: "Bizim səylərimiz sayəsində NATO-ya daha çox pul gəlməyə başlayıb. Digər ölkələr pul xərcləməyin lazım olduğunu başa düşməyə başlayıb".
Ağ Evin rəhbəri Rumıniyaya müdafiə büdcəsinin artırılmasına görə təşəkkürünü bildirib: "Biz ümid edirik ki, bu, digər ölkələr üçün nümunə olacaq".
Həmçinin, D.Tramp K.Yoxannislə görüşündə xüsusi olaraq vurğulayıb ki, ABŞ NATO-nun 5-ci maddəsinə sadiq olacaq. Məlumat üçün qeyd edək ki, 5-ci maddənin mahiyyəti ondan ibarətdir ki, üzv dövlətlərdən birinə qarşı təcavüz hamıya qarşı təcavüzdür. Məhz bu maddənin vurğulanması ona görə diqqət çəkir ki, Tramp seçki kampaniyası dövründə fərqli fikirlər səsləndirirdi. O cümlədən, NATO ilə bağlı fikirləri də fərqli idi. O üzdən, indiki şəraitdə onun NATO-nun 5-ci maddəsinə xüsusi önəm verməsi nə ilə bağlıdır? Sözügedən məsələni "Bakı-Xəbər"ə şərh edən politoloq Məhəmməd Əsədullazadə bunu bir sıra amillərlə əlaqələndirdi: "ABŞ-da seçki kampaniyası zamanı respublikaçı D.Trampın beynəlxalq təşkilatlar, xüsusilə NATO haqqında mənfi qeydləri, bu təşkilatın köhnə bir qurum olması kimi bəyanatları, göründüyü kimi, elə bəyanat kimi qaldı. Çünki NATO ABŞ-ın yaratdığı nəhəng hərbi-siyasi alyansdır. Məhz bu təşkilat vasitəsilə bu ölkə dünyada gedən proseslərə fəal müdaxilə imkanına malikdir. Tramp, seçkilərdə vəd etdiyi kimi, NATO-dan uzaqlaşsaydı, bu, dünya siyasətində böyük dəyişiklik edə bilərdi. Əlbəttə, buna ABŞ-ın güc strukturları imkan verməzdi. Göründüyü kimi, ABŞ siyasəti Trampın düşündüyü kimi siyasət deyil və prezident olduqdan sonra müəyyən çərçivədə fəaliyyət göstərməyə məcburdur. Hazırda NATO-nun inkişaf etməsində ciddi irəliləyişlər nəzərə çarpır. Rumıniya prezidenti ilə görüşdə Trampın beşinci maddəni xatırlatması ABŞ-ın NATO-nun prinsiplərinə sadiq olduğunun göstəricisidir. Rumıniyada ABŞ əsgəri gücləri və raketdən müdafiə sistemi var. Bu əsgəri güc Rusiya təhlükəsinə qarşı mübarizə üçündür. Bu da həmin ölkənin daim Rusiyanın təhlükəsi ilə qarşı-qarşıya olduğunu göstərir. Ona görə də Tramp bir daha Rumıniyanın NATO-da təhlükəsizliyinin təmin olunduğunu vurğuladı. Əlbəttə, bu, Rusiyaya mesajdır ki, alyans müttəfiqlərini qorumaq gücünə malikdir. ABŞ-ın xarici hərbi siyasətini Dövlət Departamenti və Pentaqon formalaşdırır. Ağ Evlə müəyyən zamanda ziddiyyət yaşansa da, Ağ Ev dövlət maraqları çərçivəsində bu qurumlarla razılaşır. Baxmayaraq ki, bu qurumlar birbaşa prezidentə tabedir, ABŞ xarici siyasəti prezidentlərin öz düşüncəsi ilə idarə olunmur".
Vidadi ORDAHALLI