Məhərrəm Zülfüqarlı: "Hüquqi, siyasi baxımdan nə mümkündürsə, onu etmək lazımdır ki, belə qanunsuz səfərlərin qarşısı alınsın"
Son günlər aparılan müşahidələr göstərir ki, bəzi əcnəbi ölkə vətəndaşları Dağlıq Qarabağa qanunsuz səfər etmək niyyətlərindən əl çəkmək istəmir. Görünür, Lapşinin buna görə saxlanaraq həbs olunması onlara dərs olmayıb.
Belələrindən biri də Amerikalı səyyah Telma Altundur. O, erməni mətbuatına açıqlamasında bildirib ki, Ermənistanın Vardanes rayonundan Dağlıq Qarabağı 280 kilometrlik yolu piyada səyahət edəcək. Onun sözlərinə görə, yürüş etməkdə məqsədi bölgənin gözəl təbiətini, infrastrukturunu guya tanıtmaqdır. Eyni zamanda, sadalanan sahələrə diqqət yönəltmək niyyəti güdürlər.
O da məlumdur ki, işğal olunan Dağlıq Qarabağ və ətraf rayonlar Azərbaycan ərazisidir. Bu, BMT və digər beynəlxalq qurumların sənədlərində də öz əksini tapıb. Belə olan halda, hansısa əcnəbi ölkə vətəndaşının ora rəsmi Bakının icazəsi olmadan səfər etməsi qanunsuzdur. Necə ki, bir vaxtlar blogger Lapşin bunu edirdi və sonda məsuliyyətə cəlb olundu. Bu baxımdan amerikalı səyyahı da Lapşinin aqibəti gözləyə bilər.
Sözügedən məsələni dəyərləndirən tarix elmləri üzrə fəlsəfə doktoru Məhərrəm Zülfüqarlının sözlərinə görə, bununla bağlı Azərbaycan gərəkən tədbirləri görməlidir: "Görünür, Lapşinlə bağlı baş verənlər belələrinə dərs olmayıb. Hesab edirəm ki, Azərbaycan bununla bağlı etiraz etməlidir. Həmçinin, beynəlxalq hüquq normalarına uyğun olaraq tədbirlər görməlidir. Yəni hüquqi, siyasi baxımdan nə mümkündürsə, onu etmək lazımdır. Aydın məsələdir ki, Ermənistanın bu yöndə təxribatları azalmayacaq. İndiyəcən olub, var və bundan sonra da olacaq. Bəzi digər ölkələrin buna göz yumması isə siyasi səbəblərlə bağlıdır. Ancaq Azərbaycan yorulmadan digər ölkələri xəbərdar etməlidir. Yəni həmin ölkələr vətəndaşlarını qanunsuz səfərlərdən çəkindirsin. Hesab edirəm ki, səylərimizi maksimum artırmalıyıq". Vidadi ORDAHALLI
