Vüqar Qədirov: "Bu baxımdan da bir neçə ermənipərəst konqresmenin atdığı addımların perspektivi onlar üçün yaxşı nəsə vəd etmir"
ABŞ Konqresinin erməni məsələləri üzrə şurası prezident Donald Trampın Ermənistana ayrılan yardımın azaldılması ilə bağlı qəbul etdiyi qərarın həyata keçirilməsinə mane olmağa çalışır. Bu barədə Erməni Milli Komitəsi (ANCA) məlumat yayıb. Bildirilib ki, belə təşəbbüslə Nümayəndələr Palatasının üzvləri Frank Pallon, Anna Eşun, Caki Şeyer, Adam Şif və şuranın digər demokrat üzvləri çıxış edib.
Onlar Ermənistana və Azərbaycan torpaqlarında yaradılan qondarma rejimə ayrılan maddi yardımın əvvəlki səviyyədə bərpa edilməsinə dair çağırış edib.
Xatırladaq ki, ABŞ administrasiyası Ermənistana ayrılan maliyyə yardımının 20,4 milyon dollardan 6,8 milyon dollaradək (67 %) azaldılması barədə qərar qəbul edib.
Ermənipərəst konqresmenlərin bu təşəbbüsü baş tuta bilərmi?
Ekspert Vüqar Qədirov qəzetimizə açıqlamasında bildirdi ki, ABŞ-da Erməni Milli Komitəsi (ANCA) və Amerika Erməni Məclisi (AAA) haqqında Dağlıq Qarabağa maliyyə yardımlarının edilməsi ilə bağlı məhkəmə təhqiqatı başlayıb: "ANCA və AAA indiyə qədər ABŞ dövlət büdcəsindən Azərbaycanın işğal edilmiş ərazilərində yaradılan qondarma "DQR"ə maliyyə yardımının ayrılmasına nail olub, həmçinin, Azərbaycana hər hansı maliyyə yardımının edilməsinin qarşısını alıb. Lakin amerikalı diplomatlar hesab edir ki, Dağlıq Qarabağa maliyyə yardımı separatçıları həvəsləndirir və münaqişənin danışıqlar yolu ilə həllinə mane olur. Bununla yanaşı, erməni diaspor təşkilatlarının fəaliyyətində bir sıra qanunsuz əməllərin olduğu deyilir.
Xüsusilə Trampın erməni siyasətinə fərqli rakursdan baxması həmin yardımın azaldılmasında mühüm rol oynadı.
İlk növbədə, erməni diasporu və qondarma rejimə ayrılan yardımlar məsələsində yeni yanaşmanın ortaya qoyulması Trampın xarici ölkələrə maliyyə yardımının azaldılması haqda mövqeyinə uyğundur. Həmçinin, bu, ABŞ-da digər diaspor və lobbi qrupları üçün yaxşı dərs ola bilər. Belə ki, onlar Amerika siyasətinə müdaxilə etməyə və bir çox hallarda ABŞ-ın milli maraqlarına uyğun olmayan qərarların qəbul edilməsinə nail olmağa cəhd edir. Təcrübə göstərir ki, erməni diasporu və lobbisi bir çox hallarda ABŞ-ın milli maraqlarından kənar siyasətin aparılmasına nail olub.
Erməni diasporu və qondarma qurumla bağlı belə məsələnin gündəmə gəlməsinin digər səbəbi kimi ANCA-nın ötən il ABŞ-da prezident seçkiləri kampaniyasında demokratların namizədi Hillari Klintona dəstək verməsidir. ANCA seçki kampaniyasında Donald Trampa qarşı açıq düşmənçilik edir və müxtəlif üsullarla Klintonun qalib gəlməsi istiqamətində çalışırdı.
ABŞ-da yaşayan ermənilər Trampın onları qəbul etməməsindən tez-tez şikayətlənir. ABŞ prezidentinin ermənilərə ağır zərbələr endirməsinin Vaşinqton-Bakı münasibətlərinin istiləşməsi fonunda baş verməsi də diqqət çəkir. Görünür, Vaşinqton indiyə qədər erməni diasporu və lobbisinin maraqlarına qurban verilən milli siyasətə yenidən baxır. Bu baxımdan da bir neçə ermənipərəst konqresmenin atdığı addımların perspektivi onlar üçün yaxşı nəsə vəd etmir".
Məhəmmədəli QƏRİBLİ