Aqşin Əliyev: "Yaxşı olardı ki, erməni rəsmiləri öz dövlətini terrorçuluqdan çəkindirməyə çalışsın"
Ermənistan xarici işlər nazirinin müavini Şavarş Köçəryan dünyanın düçar olduğu terror bəlasından "narahat" olduqlarını açıqlayıb. Ermənistan KİV-inə açıqlamasında o bildirib ki, dünyanın heç bir ölkəsi bu bəladan xilas olmayıb, bu səbəbdən də ölkələr arasında qarşılıqlı əməkdaşlıq olmalıdır. Erməni məmur xüsusilə də qonşu İranda belə bir terror aktının törədilməsini kəskin pisləyib.
Ermənistan rəsmisinin terrorla bağlı söylədiyi fikirləri nə dərəcədə səmimi saya bilərik?
Ekspert Aqşin Əliyev qəzetimizə bildirdi ki, terrorun doğrudan da vətəni olmur: "Bütün normal ölkələr bu bəlanı pisləyir, onunla mübarizə yollarını axtarır, bu istiqamətdə qarşılıqlı əməkdaşlıq belə edirlər. Azərbaycanın özü də bu istiqamətdə ciddi səylər göstərir. Ölkəmiz ABŞ-ın rəhbərliyi ilə yaradılan antiterror koalisiyasında yaxından iştirak edir. Bizim həmin koalisiyada terrorla mübarizədə iştirak etməyimizin başqa bir vacib detalı da var. Çünki biz ölkə olaraq terrordan əziyyət çəkirik. Terroru öz dövlət siyasətinə çevirən Ermənistan kimi ölkə bizim torpaqlarımızı işğal edib. Həmin ərazilərin sərvətini talayaraq satır. Yəni Ermənistan dövlət olaraq bütün parametrləri ilə terrora dəstək verir, bir sözlə, özü həmin siyasəti yürüdür. Ermənilərin terrora bağlılığının tarixi uzaqlara gedib çıxır. Dünyanı öz terror əməllərilə lərzəyə salan ASALA da həmin millətə məxsus millətçi terror təşkilatıdır.
2001-ci ildə ABŞ-da qoşa "göydələn"lərin dağıdılmasından sonra, Ermənistandan fərqli olaraq, ABŞ-ın yaratdığı beynəlxalq antiterror koalisiyasına qoşulan Azərbaycan əməli fəaliyyəti ilə sübut etdi ki, milliyyəti, vətəni olmayan terrorçulara qarşı mübarizəyə hər zaman hazırdır.
Sakini olduğumuz Cənubi Qafqaz rəngarəng etnik tərkibə malikdir. Amma bu bölgədə Ermənistan yeganə cəmiyyətdir ki, etnik dözümsüzlük zəminində yekcins, monodövlətə, bir millətdən ibarət olan sosial milli struktura malikdir. Bu onu göstərir ki, işğalçılığı, terrorçuluğu və soyqırımları dövlət səviyyəsində həyata keçirən Ermənistan mənfur niyyətlərinə nail olmaq üçün ən alçaq əməllərə belə əl atmaqdan çəkinmir. Vətən anlayışından uzaq olan ermənilərin dünyanın müxtəlif ölkələrinə yayılmasının da kökündə digər xalqlara qarşı nifrət hissinin həddindən artıq çox olması dayanır.
Ermənistanın "ASALA", "Krunk" kimi onlarla terror təşkilatının dünyanı dəhşətə gətirən və çoxsaylı insan tələfatı ilə nəticələnən qanlı hadisələrdə izləri var. Ermənistan rəsmilərinin terroru pisləməsi və onunla mübarizədə dövlətləri həmrəyliyə çağırması ikiüzlülük kimi yozula bilər. Yaxşı olardı ki, erməni rəsmiləri öz dövlətini terrorçuluqdan çəkindirməyə çalışsın. Bax onda bu səmimi görünə bilərdi. İranda baş verən hadisə ilə bağlı Ermənistanın süni isterika qaldırması da təsadüfi deyil. Çünki onlar İrandan daha çox yararlanmağa çalışır. Bu baxımdan da erməni məmurun açıqlaması istehza doğurmaya bilməz".
Məhəmmədəli QƏRİBLİ