"Ermənistan substantiv danışıqlara gəlməlidir"
ATƏT-in Minsk Qrupunun həmsədrləri regiona səfəri zamanı Dağlıq Qarabağ münaqişəsi zonasında vəziyyəti dəqiqləşdirməyi planlaşdırır. Xəbər verildiyi kimi, bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib. O qeyd edib ki, həmsədrlərin iyunun 10-u İrəvana səfəri zamanı Dağlıq Qarabağ münaqişəsinin aktual məsələlərinin müzakirəsi planlaşdırılır. Həmsədrlər daha sonra Dağlıq Qarabağa səfər edəcək. Bir həftə sonra isə onların Bakıya səfəri nəzərdə tutulub. M.Zaxarovanın sözlərinə görə, bu səfərlər nəticəsində birgə bəyanat yayımlanacaq.
Məlum olduğu kimi, Dağlıq Qarabağ probleminin ən fəal və başlıca fiqurlarından biri Rusiyadır. Münaqişənin yaranmasının tarixi səbəbkarı olan Rusiya bu gün onun həlli istiqamətində fəaliyyət göstərən ATƏT-in Minsk Qrupunun həmsədri rolunda çıxış edir. Ancaq Rusiya hər zamankı siyasətini yürüdərək etnik münaqişələr vasitəsilə bölgəni öz təsirində saxlamağa davam edir. Bu arada Rusiya XİN təmsilçisinin həmsədrlərin münaqişə zonasında vəziyyəti dəqiqləşdirməyi planlaşdırdıqlarını deməsi anlaşılan deyil. 1992-ci ildən ATƏT-in Minsk Qrupu fəaliyyət göstərir. Məgər bilmirlər münaqişənin mahiyyəti nədir və yaranan vəziyyət necədir? Belə olan halda, bu cür açıqlama nə deməkdir?
Məsələyə münasibət bildirən politoloq Məhəmməd Əsədullazadənin sözlərinə görə, ATƏT-in Minsk Qrupu həmsədrlərinin regiona gözlənilən səfəri ərəfəsində belə bir açıqlamanın verilməsi status-kvonun saxlanmasına işarədir: "Mariya Zaxarovanın Dağlıq Qarabağ problemi ilə bağlı açıqlamalarından görünür ki, Rusiya status-kvonu saxlamağa çalışır. Hazırda Azərbaycan cəbhədə düşmənin zirehli texnika və canlı qüvvəsini itkiyə məruz qoyduğu üçün, Minsk Qrupu və Moskva narahatdır. Ona görə də əsas danışıqlar prosesi ilə deyil, digər proseslərlə məşğul olmaq istəyirlər. Bura insidentlərin araşdırılması, monitorinq qrupunun sayını artırmaq, atəşkəsi qorumaq və s. daxildir. Qarşıdan hərbi əməliyyatlar üçün münbit hava şəraiti yaxınlaşdığına görə Rusiya Azərbaycanın hərbi təzyiqləri artırmasından narahatdır. Minsk Qrupu bu səfərində də çalışacaq ki, danışıqlarda kənar mövzular müzakirə olunsun. Hesab edirəm ki, Azərbaycan qəti şəkildə tələb etməlidir ki, bu səfərdə konkret məsələlər müzakirə olunsun, Ermənistan substantiv danışıqlara gəlməlidir. Bu dəfə də ciddi nəticələr ortaya çıxmasa, lokal döyüşlər başlaya bilər. Münaqişə ətrafında vəziyyət gərgin olaraq qalır. Ermənistan bir neçə rayonu qaytarsa, real sülh danışıqlarına başlamaq olar. Görünür, nə sülh, nə müharibə vəziyyətinin davamlı qala bilməyəcəyini Moskva da anlayır. Ona görə də Azərbaycan çalışmalıdır ki, Ermənistana ciddi təzyiqlər etsin. Hazırda Azərbaycanın güclü ordusu Ermənistan ordusu üzərində qələbə əzmindədir. Ermənistan cəbhədə baş verənlərdən ciddi narahatdır. İstənilən situasiyada işğal etdiyi ərazilərdən çıxarılmaqla üz-üzədir".
Vidadi ORDAHALLI