Məhəmməd Əsədullazadə: "Beynəlxalq terrorizmə qarşı mübarizə qeyri-səmimidir"
Bir sıra ölkələr anti-İŞİD koalisiyasında yer alır. İŞİD terrorunun qarşısını almaq üçün müxtəlif səylər göstərilir. Ara-sıra belə fikirlər səslənir ki, Azərbaycan da bu birliyə qoşulmalıdır. Azərbaycan ayrı-ayrı dövlət, beynəlxalq təşkilatlar və siyasi dairələrin diqtəsi altında deyil, ölkənin milli mənafeyindən çıxış edərək öz daxili və xarici siyasətini həyata keçirir.
Azərbaycan beynəlxalq terrorizmə qarşı koalisiyanın önündə gedən dövlətdir. Ölkəmiz İraqda bu koalisiya tərkibində fəaliyyət göstərib. Əfqanıstanda da bu fəaliyyətini həyata keçirir. İŞİD-ə qarşı mübarizənin gedişatında ölkəmizin fəallığı məsələsinə gəldikdə, bunun üçün öncə real situasiya dəqiq qiymətləndirilməlidir. Mübarizənin mahiyyət və hədəfləri, tərəflərin geopolitik maraqları, beynəlxalq konyuktura məsələləri nəzərə alındıqdan sonra, ölkəmiz milli maraqlarından çıxış etməklə adekvat addım ata bilər. Bu halda, Azərbaycan tərəfindən sözügedən parametrlərin dəqiq ölçülüb-biçilməsi, saf-çürük edilməsi, prosesdə fəal iştirakın ölkəmizə gətirə biləcəyi faydalılıq əmsalı, onun dünyada sülh və təhlükəsizliyə nə dərəcədə xidməti kimi məqamlar nəzərdən keçirildikdən sonra müvafiq addımlar atıla bilər. Bütün bunlarla yanaşı, Azərbaycan İŞİD-ə qarşı koalisiyada yer almasa da, bu terror təşkilatına qarşı mübarizə aparan dövlətləri dəstəkləyir. Bu amil Azərbaycanı İŞİD-in hədəfinə çevirə bilərmi? Sözügedən məsələ ilə bağlı fikirlərini "Bakı-Xəbər"lə bölüşən politoloq Məhəmməd Əsədullazadənin sözlərinə görə, Yaxın Şərqdə davam edən terror və xaos Azərbaycanı da təhlükəsizlik tədbirlərini gücləndirməyə sövq edir: "Milli Məclisdə terrorla mübarizə ilə bağlı qanunların sərtləşdirilməsi, ilk növbədə milli təhlükəsizlik ön şərt olsa da, beynəlxalq terrorizmə qarşı mübarizədə rolumuzu daha da artırır. Azərbaycan da daim terror şəbəkələrinin hədəfi olub və hazırda heç bir ölkə qlobal İŞİD terrorundan sığortalanmayıb. Suriya, İraq və İranda İŞİD-in həyata keçirdiyi terror yaxın coğrafiyada olduğu üçün, Azərbaycanı da narahat etməyə bilməz. Düzdür, Azərbaycan İŞİD-ə qarşı beynəlxalq koalisiyada və digər müttəfiq qruplarda terror təşkilatına qarşı əməliyyatlarda iştirak etmir. Buna baxmayaraq, Şimali Qafqazda bəzi terror təşkilatlarının İŞİD-ə biət etdiyi məlumdur. Azərbaycanın şimal sərhədlərində silahlı terrorçu qruplar var və fəaliyyət göstərir. Buna qarşı Rusiyanın apardığı mübarizə istənilən nəticəni vermir. Filippində, Londonda dinc insanların, təhlükəsiz ölkə olan İranın hədəfə alınması göstərir ki, beynəlxalq terrorizmə qarşı mübarizə qeyri-səmimidir. Qeyd edim ki, terror təşkilatları böyük və maraqlı ölkələrin xüsusi xidmət orqanlarına bağlı olan silahlı təşkilatlardır. Sözə baxmayan ölkəni cəzalandırmaq və geosiyasi maraqlar naminə belə terror təşkilatlarından istifadə edilir. İranda baş verən son hadisələr artıq Azərbaycanın qonşusunu hədəfə almaqdır. Bu bizim təhlükəsizliyimiz üçün də müəyyən suallar doğurur. Əlbəttə, hazırda Azərbaycan böyük dövlətlərlə regional münaqişədə iştirak etmir, balanslı siyasət aparır. Həmçinin onsuz da Azərbaycan öz 20 % torpaqlarında erməni terroru ilə üz-üzədir. Ona görə də hesab etmirəm ki, Azərbaycan hər hansı bir beynəlxalq terror təşkilatının hədəfi olsun. Düzdür, zamanla şimal bölgəsində müəyyən radikal terrorçu qruplar olub və Azərbaycan bunları zərərsizləşdirib. Hazırda Azərbaycanın təhlükəsizlik sistemi bu kimi halların qarşısının alınmasında mühüm rol oynayır. Azərbaycan İŞİD və digər terror təşkilatlarının hədəfində olmasa da, terrordan sığortalanmayıb. Artıq yaxın regionda ciddi təhlükəsizlik problemləri yaşanmaqdadır. Azərbaycan bu təhlükələrdən sığortalanmaq üçün təhlükəsizlik tədbirlərini maksimum dərəcədə artırmalıdır". Vidadi ORDAHALLI