Vəfa Heydərli: "Ermənistandan, faktiki olaraq, tələb olunur ki, işğaldan əl çəksin"
Erməni milli-strateji araşdırmalar mərkəzinin direktoru Manvel Sarkisyan Beynəlxalq Böhran Qrupunun yaydığı son hesabatında Dağlıq Qarabağ münaqişəsilə bağlı yer alan fikirləri şantaj adlandırıb. Erməni politoloq deyib ki, sözügedən hesabatda mümkün müharibə ilə bağlı deyilənlər beynəlxalq təşkilatın Azərbaycanın lehinə qorxu yaratmaq və təzyiq cəhdindən başqa bir şey deyil. O deyib ki, bu həm də həmsədr ölkələrin müəyyən aktivlik fonunun yaradılmasına xidmət edə bilər, amma heç bir halda qəti addımların atılacağı demək deyil.
Xatırladaq ki, Beynəlxalq Böhran Qrupu bu günlərdə açıqladığı hesabatında Qarabağ münaqişəsinin, hərb yolu ilə də olsa, artıq çözülməsinin vacibliyini gündəmə gətirib. Lakin görünən odur ki, erməni tərəfi müharibə variantına ehtimal vermək istəmir. Səbəb isə bəllidir, uduzacağını anlayır.
Ermənilərin məlum hesabatdan bu qədər narahat olmasının səbəbi nə ilə bağlıdır?
Politoloq Vəfa Heydərli qəzetimizə açıqlamasında bildirdi ki, Böhran Qrupunun Dağlıq Qarabağ münaqişəsi ilə bağlı hesabatının ermənilərdə narahatlıq doğurmasının səbəbi məlumdur: "Hesabata əsasən, rəsmi Bakı ərazilərinin ilhaqının beynəlxalq ictimaiyyət tərəfindən tanınması, Qərbin sanksiyalarının tətbiqi məsələsində daha tələbkar olmağa başlayıb. Böhran Qrupunun şərhinə görə, güclənməkdə olan qarşıdurma fonunda vasitəçilərin başlıca vəzifəsi Ermənistan və Azərbaycan liderləri arasında mütəmadi təmasları təmin etmək, İrəvan və Bakını mövqelərini yumşaltmağa və ritorikadan əl çəkməyə məcbur etmək olmalıdır. Təbii ki, bu mövqe Ermənistanı qane etmir.
Dağlıq Qarabağ ətrafındakı rayonların Azərbaycana qaytarılması, Dağlıq Qarabağın statusu, beynəlxalq təhlükəsizlik təminatı və məcburi köçkünlərin qaytarılması məsələləri də bəyanatda əksini tapıb.
Göründüyü kimi, Böhran Qrupu Qarabağda yeni müharibə xəbərdarlığını edən açıq bəyanatla çıxış edib. Hətta bildirilir ki, cəmiyyətdə, müharibə gücünə olsa da, problemin həllini istəyirlər. Böhran Qrupunun yaydığı bəyanat tam reallığı əks etdirir. Doğrudan da vəziyyət kritikdir. Sülh danışıqları fayda vermir. Artıq Ermənistan özünə o qədər arxayın olub ki, hətta qeyri-konstruktivlik nümayiş etdirdiyi danışıqlar prosesində belə iştirak etmək istəmir. Hesab edirəm ki, Böhran Qrupunun qoyduğu tələblər də obyektiv və qərəzsizdir. Ermənistandan, faktiki olaraq, tələb olunur ki, işğaldan əl çəksin. Ən maraqlısı isə budur ki, hesabatda cəmiyyətlərdə müharibə ab-havasının yüksək olması qeyd edilir. Doğrudan da cəmiyyətlərdə belə bir istək var. Həmin bəyanatda heç bir şantaj tonu yoxdur".
Məhəmmədəli QƏRİBLİ