Əflatun Amaşov: "Gürcüstan rəhbərliyi heç zaman imkan verməz ki, Gürcüstandan Azərbaycana qarşı istifadə olunsun"
Savalan Mirzəyev: "Əfqan Muxtarlının Gürcüstanda saxlanması barədə məlumatlar təsdiqlənməyib"
Gürcüstan sərhədini qanunsuz olaraq keçəndə həbs edilən Azərbaycan vətəndaşı Əfqan Muxtarlı ətrafında yaradılan süni ajiotaj davam edir. Hiss edilir ki, hansısa qüvvələr bu həbs ətrafında siyasi manipulyasiyalar edir. Hətta bununla bağlı Gürcüstan-Azərbaycan münasibətlərinə xələl gətirə biləcək fəaliyyət ortaya qoymağa cəhd olunur.
Bu həbsə beynəlxalq reaksiyalar da verilib. Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev Ə.Muxtarlı ilə bağlı Avropa İttifaqı və ABŞ Dövlət Departamentinin müvafiq olaraq 3 və 4 iyun tarixli açıqlamalarını şərh edərkən deyib: "Azərbaycan Respublikası Dövlət Sərhəd Xidməti və Baş Prokurorluğunun mətbuat xidmətinin 1 iyun 2017-ci il tarixli birgə məlumatında Azərbaycan vətəndaşı Əfqan Muxtarlının saxlanması barədə dəqiq məlumat verilib".
O bildirib ki, Gürcüstanın müvafiq dövlət qurumlarının da məsələ ilə əlaqədar açıqlaması var: "Hüquq müstəvisində olan bu məsələnin siyasiləşdirilməsi cəhdlərini düzgün hesab etmirik. Sözügedən məsələni qəsdən siyasiləşdirərək uğursuz şəkildə Azərbaycan-Gürcüstan əlaqələrinə xələl yetirməyə çalışan dairələr heç zaman öz məqsədlərinə nail ola bilməyəcək. Azərbaycan və Gürcüstan arasındakı tarixi dostluq və strateji tərəfdaşlıq münasibətləri ortaq maraqlara, qarşılıqlı faydalı əməkdaşlığa və hörmətə, bir-birinin daxili işlərinə qarışmamaq və birinin ərazisindən digərinə qarşı istifadə edilməsinə yol verməmək kimi prinsiplərə əsaslanır".
Bu həbs ətrafında yaradılan süni gərginliklə bağlı ekspertlər nə düşünür və belə səylər Gürcüstan-Azərbaycan münasibətlərinə xələl gətirə bilərmi?
Gürcüstan parlamentinin deputatı Savalan Mirzəyevin fikrincə, Əfqan Muxtarlının saxlanmasını əsas gətirərək müəyyən qüvvələrin Gürcüstan-Azərbaycan münasibətlərini korlamaq cəhdləri heç vaxt baş tutmayacaq: "Bu cür qara qüvvələr dəfələrlə Azərbaycan-Gürcüstan münasibətlərinə xələl gətirən addımlar atsalar da, onların bu cəhdləri iflasa uğrayıb. Birincisi, Ə.Muxtarlının Gürcüstanda saxlanması barədə məlumatlar təsdiqlənməyib. Azərbaycan Respublikası Baş Prokurorluğu tərəfindən verilən açıqlamada göstərilir ki, Əfqan Muxtarlı Azərbaycan-Gürcüstan sərhədini qanunsuz keçdiyi üçün saxlanıb. Ə.Muxtarlını Gürcüstan tərəfinin saxlayıb təhvil verməsi ilə bağlı hec bir sübut yoxdur. Bu hadisənin iki ölkə arasında münasibətləri korlamasına gəlincə isə, bu mümkün deyil. Gürcüstan-Azərbaycan münasibətlərini bir neçə dəfə korlamaq cəhdləri olub. Ancaq bu cəhdlər baş tutmayıb. Çünki Gürcüstan-Azərbaycan dostluğu böyük tarixi keçmişə dayanır. İki dost, qardaş dövlət arasında olan münasibəti heç bir qara qüvvə korlaya bilməz".
Milli Məclisin Azərbaycan-Gürcüstan parlamentlərarası əlaqələr üzrə işçi qrupunun rəhbəri, Mətbuat Şurasının sədri Əflatun Amaşovun sözlərinə görə, Azərbaycan və Gürcüstan hakimiyyətinə əks olan qüvvələr, bir sıra xarici dairələr və Ermənistan mətbuat vasitələri qanunsuz olaraq Gürcüstandan Azərbaycana keçən Əfqan Muxtarlının həbsi məsələsini siyasiləşdirərək iki ölkə arasındakı münasibətlərə xələl gətirməyə çalışır: "Ə.Muxtarlı Gürcüstan-Azərbaycan dövlət sərhədini pozmasına, qaçaqmalçılığa, hakimiyyət nümayəndəsinə müqavimət göstərdiyinə görə saxlanıb. Məsələ ilə bağlı Gürcüstanın rəsmi şəxsləri də bəyanatlar verib. Orada da Ə.Muxtarlının sərhədi qanunsuz keçdiyi üçün həbs edildiyi qeyd olunur. Eyni zamanda, rəsmi Tiflis bildirib ki, bu vaxta qədər Azərbaycan tərəfi hər hansı bir azərbaycanlının Gürcüstanda fəaliyyətinin məhdudlaşdırılması və təhvil verilməsi ilə bağlı müraciət etməyib. Bununla bağlı yayılanlar şayiədir".
Ə.Amaşovun sözlərinə görə, Gürcüstan ictimai-siyasi xadimləri də bəyan edirlər ki, bu hadisəni siyasiləşdirmək lazım deyil: "Ümumiyyətlə, Gürcüstan öz ərazisindən heç bir beynəlxalq təşkilata, heç bir quruma yaxın qonşusu, strateji tərəfdaşı olan Azərbaycana qarşı təbliğat aparılmasına imkan verməyəcəyini bəyan edir. Lakin erməni mətbuatı həmişə Gürcüstan-Azərbaycan münasibətlərinə xələl gətirən materiallar yazır və bu hadisədən də yararlanmağa çalışır. Gürcüstan rəhbərliyi bütün bunları yaxşı bilir və heç zaman imkan verməz ki, həmin ölkədən Azərbaycana qarşı istifadə olunsun, iki ölkə arasında münasibətlərə xələl gəlsin".
Məhəmmədəli QƏRİBLİ