Aqşin Əliyev: "Rus xalqının ölkəmizi özünə yaxın dost sayması bizi yalnız məmnun edə bilər"
Rusiya vətəndaşları Belarus, Çin, Qazaxıstan, Suriya, Hindistan, Ermənistan, Kuba, Özbəkistan, Tacikistan və Azərbaycanı ölkələrinin ən yaxın dostu hesab edir. Bunu "Levada-Sentr"in keçirdiyi rəy sorğusunun nəticələri göstərir. Sorğunun nəticələrinə əsasən, ruslar öz ölkələrinin ən böyük düşməni olaraq ABŞ, Ukrayna və Almaniyanı görür.
Bundan əlavə, sorğuda iştirak edənlər Rusiyanın dostu olmayan dövlətlər siyahısında Latviya, Litva, Polşa, Estoniya, Böyük Britaniya, Gürcüstan və Fransanın da adını çəkir.
Rəyi soruşulanların 21 %-i hazırda Moskva və Vaşinqton arasında əlaqələrin yaxşı, 17 %-i isə pis istiqamətdə getdiyini düşünür.
Sorğuda diqqətçəkən məqamlardan ən vacibi Rusiya vətəndaşlarının Azərbaycanı özlərinə yaxın dost hesab etməsidir. Qonşu ölkə vətəndaşlarının belə bir rəyə gəlməsi nə ilə bağlı ola bilər?
Ekspert Aqşin Əliyevin sözlərinə görə, bu sorğuda diqqəti bir çox məqamlar çəkir: "Göründüyü kimi, Rusiya vətəndaşları əsasən postsovet ölkələrini özlərinə yaxın dost hesab edib. Yaxın dost ölkələrin sırasında müxtəlif qitələrdə olan ölkələrin də adına rast gəlmək mümkündür. Onlardan elələri var ki, hətta Rusiyadan olduqca uzaqda yerləşir. Məsələn, Kuba. Hesab edirəm ki, Çin və Kubanın bu siyahıya düşməsi onların kommunist rejimə sədaqətli olması ilə bağlıdır. Demək ki, Rusiya hələ keçmiş ənənələrindən tam imtina etməyib. Azərbaycanın bu kateqoriyada yer almasının isə bir çox səbəbləri var. Tarixi qonşu olmağımız və uzun illər bir ölkədə təmsilçiliyimizin bunda rolu danılmazdır. Müstəqillikdən sonrakı illərdə də Azərbaycanla Rusiya arasında münasibətlər normal məcrada davam edib. Bizim vətəndaşlar bir-birinin ərazisinə vizasız gediş-gəliş edir. Rusiyanın daxilində çoxlu sayda azərbaycanlı yaşayır. Yerli ruslar, demək olar ki, hər gün bizim millətin nümayəndələrilə qarşılaşır, ünsiyyətdə olur. Bütün bunların belə təsnifatlanmanın ortaya çıxmasına təsiri danılmazdır. Rəy sorğusu başqa bir gerçəkliyi də ortaya qoydu ki, Rusiyanın sadə vətəndaşlarının mövqeyilə yürüdülən dövlət siyasəti arasında ciddi təzad var. Çünki bizim düçar olduğumuz Dağlıq Qarabağ probleminin həlli istiqamətində Rusiya dövlətinin yanaşması heç də əsl dost münasibətinə bənzəmir. İstənilən halda, bu bizim üçün sevindirici haldır. Çünki rus xalqının ölkəmizi özünə yaxın dost sayması bizi yalnız məmnun edə bilər".
Məhəmmədəli QƏRİBLİ