Aydın Mirzəzadə: "İstənilən bu cür çirkin cəhdlərin sonu yoxdur"
Xəbər verildiyi kimi, iyunun 3-də İtaliyanın Leççe şəhərində Azərbaycandan Avropaya qaz kəmərinin çəkilişinə qarşı daha bir yürüş keçirilib. TAP əleyhinə etiraz aksiyasına layihənin həyata keçiriləcəyi Melendunyo şəhərinin meri Marko Poti rəhbərlik edib.
Şəhərin küçələrində yerləşdirilmiş hüquq-mühafizə orqanlarının əməkdaşları etirazçıların "Trans Adriatic Pipeline"nın inzibati binasına qədər hərəkətinin qarşısını alıb. Ümumilikdə, aksiyada təxminən 500 nəfər iştirak edib. Nümayiş San Onorzo meydanında mitinqlə başa çatıb.
Qeyd edək ki, TAP əleyhinə nümayişlər mart ayının ortalarında konsorsiumun çoxillik zeytun ağaclarının qaz borusunun keçəcəyi Salento regionundakı San-Foka rayonundan köçürülməsinə başlanmasından sonra start götürüb. ABŞ hökuməti İtaliya hakimiyyətini xəbərdar edib ki, "No TAP" komitəsinə rəhbərlik edən, İtaliya parlamentindəki yerlərin 22 %-nə sahib "Beş ulduz" hərəkatının lideri, aktyor və bloger Beppe Qrillo Rusiya ilə bağlıdır.
Xatırladaq ki, mart ayının sonunda İtaliyanın Dövlət Şurası TAP-ın tikintisinə icazə verib, bu isə o deməkdir ki, yerli hakimiyyətlərin mövqeyi nəzərə alınmadan Azərbaycandan təbii qazı İtaliyaya daşıyacaq boru kəməri tikilməlidir. Ancaq görünən odur ki, bütün bunlara baxmayaraq, TAP-a qarşı təxribatlar səngimək bilmir. Müxtəlif dairələr hər vəchlə buna mane olmağa çalışır.
Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Mirzəzadənin sözlərinə görə, bu təxribatın arxasında bir neçə məqsəd dayanır: "Bir məqsəd ümumilikdə həmin layihənin reallaşmasının qarşısını almaqdır. Eyni zamanda, Avropanın enerji təminatının diversifikasiyasının qarşısını almaq istəyirlər. Halbuki, Avropa İttifaqı enerji xətlərinin çoxşaxəli olmasında maraqlıdır. İkinci məqsəd kəmərin keçəcəyi ölkələrə siyasi təzyiq göstərməkdir. Çünki bu layihə həmin ölkələrin iqtisadi inkişafına təkan verəcək. Belədə sözügedən ölkələr həmin imkanlardan məhrum olduqlarına görə təzyiqə məruz qalacaqdı. Üçüncü məqsəd isə Azərbaycanın iştirak etdiyi layihələrə əngəl yaratmaqdır. Yəni hansı layihədə Azərbaycan varsa, ona maneə yaratmaq. Məqsəd həm də Azərbaycanı müstəqil daxili və xarici siyasət yeritmək imkanından məhrum etməkdir. Həmçinin, dünya birliyində artan nüfuzunun qarşısını almaqdır. Ancaq istənilən bu cür çirkin cəhdlərin sonu yoxdur. Çünki həm TANAP, həm də TAP düşünülmüş və bir çox ölkələrin, o cümlədən Avropanın maraqlarına cavab verən layihədir. Layihə uğurla həyata keçiriləcək". Vidadi ORDAHALLI