Seyid Camal Əzimbəyli: "Azərbaycan dövləti çox doğru olan dini siyasət həyata keçirir və bunun da nəticəsində din-dövlət münasibətlərində hər hansı bir problem yaşanmır"
Ermənistan elektron KİV-ində talış hüquq müdafiəçisi kimi təqdim edilən Zahirəddin İbrahimli adında bir nəfərin fikirlərinə istinadən geniş material yayılıb. Həmin məqalədə bildirilir ki, guya Azərbaycan hakimiyyəti düşünülmüş şəkildə ölkənin süniləşdirilməsi siyasətini həyata keçirir: "Ötən illər ərzində ölkədə vəhhabiliyin, nurçuluğun inkişafı üçün gözəl şərait yaradılsa da, ancaq şiə əsilli müsəlmanlar sıxışdırılır, təqib edilir".
Erməni saytları müəllifə istinadən bildirir ki, Azərbaycan məhz bu məqsədlə sünnilərin daha çox yaşadığı Türkiyə, Səudiyyə Ərəbistanı və Pakistan kimi ölkələrlə sıx təmaslar qurur. Bildirilir ki, Azərbaycanda bu təriqət ciddi yayılıb və bunun nəticəsidir ki, çoxlu sayda ölkə vətəndaşı Suriyadakı müharibədə iştirak edib.
Saytların iddiasına görə, guya hətta İslam Oyunlarının açılış və bağlanışında da sünni dəyərlərindən istifadə nəzərdə tutulsa da, sonda QMİ-nin müdaxiləsi bunun qarşısını alıb.
Azərbaycan hakimiyyətinin sünnilərə dəstək verib şiələri sıxışdırması kimi təxribatçı fikirlərin arxasında nələr var? Şərqşünas Seyid Camal Əzimbəyli qəzetimizə açıqlamasında bildirdi ki, belə fikirləri söyləyən adam dönük adlandırılmalıdır: "Hansı millətin nümayəndəsi olması önəmli deyil. Əsas onun səsləndirdiyi qərəzli fikirlərdir. Görürsünüz ki, belə fikirlər düşmənin işinə tam yaramış olur. Ona görə də Zahirəddin kimilərin fikirlərini daha geniş auditoriyalara çatdırılması istiqamətində canfəşanlıq göstərirlər. Belələrinin əməlini İslam dininin özü də lənətləyir və sizi əmin edirəm ki, onlar cəhənnəmi indidən qazanmış olurlar. Onun etdiyi əməl yolverilməz və natəmizdir. Azərbaycanda hansısa təriqətin sıxışdırıldığını, digərinin isə inkişaf etdirildiyini iddia edib bunu dövlətin adı ilə bağlamaq həm də cinayət əməli sayılır. Çünki bu, dini zəmində təfriqə, ayrıseçkilik salmağa hesablanmış əməldir. Azərbaycan dövlətini tolerantlığa görə dünyada başqaları üçün misal çəkirlər. Bizdə məzhəblərin birgə və mehriban yaşayışı çox yüksək səviyyədə təmin edilib. Mən uzun illərdir din-dövlət münasibətlərinin tənzimlənməsində yaxından iştirak edirəm. Sizi əmin edirəm ki, dövlətin belə bir siyasətə qol qoyduğunu görsəydim, həmin faktı birinci özüm ictimailəşdirərdim. Mən şiəliyin əsas ideya daşıyıcısı olan seyid nəslinin nümayəndəsiyəm. Ölkənin nüfuzlu telekanallarından birində efirə gedən dini verilişin ideya müəllifi və aparıcısıyam. Elə bu faktın özü dövlətin şiəliyə münasibətinin aydın təzahürüdür. Dövlətimiz digər təriqətlərlə də bağlı analoji mövqedən çıxış edir. Bizim üçün önəmli olan imana hakim olmaq, şəhidinə sahib çıxmaq kimi məsələlərdir. Belə bir fikrin ortaya atılmasını təxribat və ölkədəki stabilliyi pozmağa hesablanan bir addım sayıram. Azərbaycan dövləti çox doğru olan dini siyasət həyata keçirir və bunun da nəticəsində din-dövlət münasibətlərində hər hansı bir problem yaşanmır".
Məhəmmədəli QƏRİBLİ
