Azərbaycan Jurnalistlər Birliyinin üzvü, "Xalqın nüfuzlu ziyalısı" mükafatçısı, Lerik rayonu Bradi kənd sakini Zəfər Orucoğlu redaksiyamıza məktub ünvanlayıb. Məktubu olduğu kimi çap edirik:
"Rusiya böyük dövlətdir. Burada bu dövlətin vətəndaşı olan çoxsaylı millətlər yaşayır. Rusiya qanunlarına uyğun hər bir millətin öz dilini, mədəniyyətini qoruyub inkişaf etdirmək hüquqları vardır. Bunları layiqincə həyata keçirmək üçün azsaylı xalqların ictimai qurumları, diaspor təşkilatları fəaliyyət göstərir. Onlar dövlətlər arasında sıx əlaqə yaratmaqla yaşadığı ölkənin ictimai-siyasi, sosial- iqtisadi, mədəni həyatına zənginlik gətirir. Məhz Rusiyadakı Ümumrusiya Azərbaycanlılar Konqresi belə bir böyük diaspor təşkilatıdır. Çoxmilyonlu azərbaycanlıları öz ətrafında birləşdirən bu təşkilat 2001-ci ildə ulu öndər Heydər Əliyev və Rusiya Prezidenti Vladimir Putinin birgə təşəbbüsü ilə yaradılıb. Onun Rusiyanın 80-dən çox bölgəsində şöbəsi var. ÜAK prezidenti Fazil Qurbanovun dediyi kimi, təşkilat on altı illik fəaliyyəti dövründə həmişə Rusiyada vətəndaş sülhünün, millətlərarası anlaşmanın möhkəmliyinə, eləcə də hər iki ölkə arasında sosial-iqtisadi və mədəni əməkdaşlığın inkişafına gözəl töhfələr vermişdir.
Bildiyimiz kimi, Rusiyada 2 milyondan çox azərbaycanlı yaşayır. Bu böyük bir qüvvədir. Onlar Ümumrusiya Azərbaycanlılar Konqresində birləşərək bu çoxmillətli ölkəni özlərinə doğma vətən bilir, onun tərəqqisinə çalışır, bütün millətlərdən olan xalqlara sonsuz məhəbbət və hörmət göstərirlər. Konqres qeyri-hökumət təşkilatı olaraq bütün işlərini Rusiya qanunları əsasında qurur, ən başlıcası da hər iki ölkə arasında olan ənənəvi dostluğun möhkəmlənməsi missiyasını şərəflə yerinə yetirir. Azərbaycanlıların ictimai birliyi çətin anlarda belə Rusiya dövlətinə sadiq qalıb. Həm də azərbaycanlılar buranın ən çox fəallıq göstərən seçici və vergiödəyiciləridir. Rusiyanın elə bir sahəsi yoxdur ki, Konqresin gördüyü yaxşı işlər orada hiss olunmasın. Belə olduğu halda mayın 15-də Rusiya Ədliyyə Nazirliyinin təqdimatına əsasən Rusiya Ali Məhkəməsi Ümumrusiya Azərbaycanlılar Konqresinin qeydiyyatını ləğv edib.
Bu da həqiqətə sığmayan, ədalətsiz bir qərardır. Ən pisi odur ki, qərar kim tərəfindən verilsə də, Rusiya ilə Azərbaycan arasında ikitərəfli əlaqələrə mənfi təsir göstərir, onlara kölgə salır. Son illər Azərbaycanın Rusiyaya olan isti münasibətini nəzərə alsaq görərik ki, bu heç də Rusiya Federasiyasının rəsmi mövqeyi deyil. Belə bir qərarın verilməsi yalnız Azərbaycanı sevməyən bəzi dairələrin və Rusiyanın dövlət orqanlarındakı ermənipərəst şəxslərin fəaliyyətinin nəticəsi ola bilər. Bir də Rusiya çoxmədəniyyətli, polietnik dövlətdir. Belə qərarın verilməsi Rusiya cəmiyyətinin öz xarakterinə ziddir. Azərbaycan Rus İcmasının rəhbəri Mixail Zabelin də Ümumrusiya Azərbaycan Konqresinin ləğvindən narahatdır. Odur ki, qərar yanlışdir, onun əsası yoxdur, göstərilən cəhd heç vaxt baş tutmaz və tezliklə sağlam qüvvələrin səyi ilə öz müsbət həllini tapar.
Azərbaycan-Rusiya dostluğu möhkəm tellərlə bağlıdır. İki ölkə arasında strateji əməkdaşlıq olduqca yüksək səviyyədədir. Hazırda həm də ölkəmizdə rusların sayı 200 mindən çoxdur. Burada onların hər cür fəaliyyəti üçün bütün zəruri imkanlar yaradılıb. Azərbaycanda rus dili və rus mədəniyyətinin inkişafına hərtərəfli dəstək verilir. Məhz Rusiya vətəndaşı olan azərbaycanlılar da belə münasibət umurlar".
Baki-xeber.com
