Saxta parlament seçkilərinin Ermənistan üçün ciddi problemlər yarada biləcəyinə dair verilən proqnozlar özünü doğruldur. Belə ki, indiki erməni parlamentinə əsas etibarı ilə Rusiyanın mövqeyini dəstəkləyən qüvvələr gəlib. Bu durum isə Qərb ölkələrinin, o cümlədən Qərbdə özünə yer edən erməni diasporunun xoşuna gəlmir. Elə bu səbəbdəndir ki, Qərb parlament seçkilərinin nəticələrini elə əvvəldən sərt şəkildə tənqid edir.
Hətta buna görə ABŞ Ermənistana qarşı müəyyən sanksiyalar tətbiq edəcəyini bildirmişdi. Belə ki, ABŞ-ın Ermənistandakı səfiri Riçard Maylz qeyd etmişdi ki, Birləşmiş Ştatlar Ermənistanda keçirilmiş parlament seçkiləri zamanı pozuntulara yol vermiş şəxslərin hökumət tərəfindən maliyyələşdirilən proqramlarda iştirakını qadağan edəcək. Onun sözlərinə görə, ABŞ nümayəndələri seçki prosesində rüşvət, seçicilərə təzyiq faktları qeydə alıblar. Səfir bu faktların digər beynəlxalq təşkilatlar tərəfindən də aşkar edildiyini bildirib: "Biz hökumətimizi bütün bu faktlarla bağlı geniş araşdırma aparmağa çağırmışıq".
Yayılan məlumatlara görə, artıq ABŞ Ermənistanda parlament seçkilərinin saxtalaşdırılmasında iştirak edən şəxslərə qarşı sanksiyaların tətbiqi prosesinə başlayıb. "Jamanak" qəzeti öz mənbələrinə istinadən yazır ki, parlament seçkilərini saxtalaşdırmaqda şübhəli bilinən hakim Respublika Partiyasının bir sıra üzvünün ABŞ hökumətinin maliyyələşdirdiyi layihələrdə iştirakına qadağa qoyulub. Bundan başqa, sanksiyalar tətbiq ediləcək şəxslərin adı "qara siyahı"ya salınacaq və onların ABŞ-a girişi qadağan olunacaq.
Məsələ ilə bağlı qəzetə danışan mənbə bildirib: "Ermənistan Prezident Administrasiyası ABŞ səfirliyindən kimlərin adının "qara siyahı"ya salındığı haqda dəqiq informasiya öyrənməyə çalışır. Lakin ABŞ bu şəxslərə qarşı təkcə sanksiyalar tətbiq etməklə kifayətlənməyəcək, həmçinin, onların qohumlarının da adını "qara siyahı"ya salacaq. İstisna deyil ki, ABŞ şirkətləri öz investisiyalarının bir hissəsini də Ermənistandan çıxaracaq". Bir daha qeyd edək ki, aprelin 2-də keçirilən parlament seçkilərində rüşvət hadisələri, inzibati resursların tətbiqinin geniş yayılması və seçicilərə təzyiqlərlə bağlı dəqiq məlumatlar əldə etdiyini açıqlayıb, bunların yolverilməz olduğunu bildirib. ABŞ-la yanaşı, ATƏT də aprelin 2-də Ermənistan parlamentinə keçirilən seçkiləri tənqid edib. Təşkilatda hesab edirlər ki, ümumxalq səsverməsində seçicilərin səslərinin satın alınması, dövlət qulluqçularına təzyiq və partiyaların nümayəndələri tərəfindən seçki prosesinə müdaxilə halları qeydə alınıb. ATƏT-in seçki ilə bağlı hazırladığı hesabatda deyilir ki, səslərin satın alınması, dövlət qulluqçularına, o cümlədən məktəb və xəstəxanalarda çalışanlara təzyiqlər, müəyyən partiyanın lehinə səs toplamaq məqsədi ilə seçicilərə hədə-qorxu gəlinməsi barədə dəqiq informasiya var. Bu da seçki prosesinə qarşı ümumi narazılıq doğurub. Müxalif qüvvələr tərəfindən yaradılan "Vətəndaş müşahidəçi" təşəbbüsünün nümayəndələri də seçkilərdə çoxsaylı pozuntu halları qeydə alıblar. Söhbət ilk növbədə texniki vasitələrin nasazlığından, insanların bir yerə toplaşmasından, səsvermə sirrinin pozulmasından, seçkiqabağı rüşvət verilməsi hallarından gedir. Müşahidəçilərin bəyanatında deyilir: "Seçki prosesində yeniliklərin seçicinin etimadını bərpa edəcəyi ilə bağlı gözləntilərə baxmayaraq, bu baş vermədi. Bizim seçkilərdə vətəndaşların iradəsini sərbəst ifadə etdiklərini şübhə altına almaq üçün ciddi əsaslarımız var".
Bütün bunlar Qərb ölkələrinə, ilk növbədə ABŞ-a Ermənistana qarşı sanksiyalar tətbiq etməyə yetərli əsaslar verir. Bu durumda indiki prezident Serj Sarkisyanın gələn ildən etibarən baş nazir kimi ölkəni idarə etmək niyyəti də puça çıxa bilər. Xatırladaq ki, Ermənistan prezident idarə üsulundan parlament idarə üsuluna keçid üçün konkret addım atıb. Belə ki, aprelin 2-də keçirilən parlament seçkiləri həm də bu ölkədə parlament idarə üsuluna keçidi nəzərdə tutan 2015-ci ildəki konstitusiya dəyişikliyindən sonra ilk seçki olub. Proporsional seçki sistemi əsasında formalaşan yeni parlament daha sonra prezidenti 7 illiyə seçəcək. Prezident isə parlament seçkilərində mütləq qələbə qazanmış partiya və ya siyasi blokun namizədini baş nazir təyin edəcək. Baş nazir ölkədə idarəçiliyi həyata keçirən əsas şəxs olacaq. Elə Sarkisyan da məhz baş nazir kimi ölkədə idarəçilyi davam etdirmək istəyir. İndilikdə Ermənistanda Sarkisyanı bu niyyətindən geri çəkilməyə məcbur edə bilən güc yoxdur: "Ermənistandan fərqli olaraq, Azərbaycan Dağlıq Qarabağ münaqişəsi məsələsində tamamilə fərqli siyasət yürüdür. Rəsmi Bakı Azərbaycanla sülhün tərəfdarı olan ermənilərin də fəal iştirak etdiyi münaqişənin nizamlanması üzrə sülh platforması yaradıb". Amma Qərb sanksiyalarının işə salınması vəziyyəti tamam dəyişə bilər.
Tahir TAĞIYEV