Mübariz Əhmədoğlu: "Yeni prezidentin fəaliyyətə başlaması ilə bu ölkənin Dağlıq Qarabağ münaqişəsinə münasibətində dəyişikliklər gözlənilmir"
Fransanın hər zaman Ermənistanı dəstəkləməsinə və "erməni soyqırımı"nın tanınması barədə qətnamənin təşəbbüskarlarından biri olmasına baxmayaraq, yeni prezident Emmanuel Makronun seçilməsindən sonra Dağlıq Qarabağ münaqişəsi ilə, ümumilikdə Cənubi Qafqazla bağlı siyasəti dəyişməyəcək. Bunu mətbuata açıqlamasında Enerji, təbii ehtiyatlar və geosiyasət mərkəzinin direktoru, Qlobal Təhlükəsizliyin Təhlili İnstitutunun aparıcı eksperti, "İnternational Market Analysis" şirkətinin təsisçisi Ariel Koen deyib.
Onun sözlərinə görə, E.Makron administrasiyası əvvəlki hakimiyyətlərdən daha çox Rusiyayönümlü siyasət aparacaq. O, həmçinin, qeyd edib ki, Fransa Almaniya və ABŞ-la da münasibətləri daha da möhkəmləndirəcək.
O da heç kəsə sirr deyil ki, Fransa Ermənistanla yaxın əlaqələra malik ölkədir. Bu da ondan irəli gəlir ki, tarixən Fransada erməni lobbisi güclü olub və orada yarım milyondan çox erməni yaşayır. Ancaq onu da nəzərə almaq lazımdır ki, ötən illər ərzində Fransa ilə Azərbaycan arasında əlaqələr xeyli inkişaf edib. Bu əlaqələr bir sıra sahələri əhatə edir. Bütün bu deyilənlərin fonunda, politoloqların buna münasibəti necədir və gözləntiləri nədən ibarətdir? Sözügedən məsələni dəyərləndirən politoloq Mübariz Əhmədoğlunun fikrincə, bunun Dağlıq Qarabağ münaqişəsinin həlli istiqamətində hər hansı pisləşməyə doğru təsiri olmayacaq: "Əvvəla onu deyim ki, güclü xarici siyasət nəticəsində Azərbaycan Fransanın ermənipərəst mövqeyinin dəyişməsinə nail olub. Bizim müstəqillik dönəmində Ermənistanın ən uzunmüddətli dostu Jak Şirak olub. Onun maliyyə mənbələrindən biri - "Alcatel" şirkətinin icraçı direktoru erməni idi. O, iki dəfə Jak Şirakı Ermənistana gətirtdi. Sonra Fransa prezidenti Sarkozi oldu və onun ailəvi dostu Patrik Dəvəçiyan idi. Dəvəçiyan Sarkozini hakimiyyətə gətirən partiyanın rəhbərliyində təmsil olunurdu. Buna baxmayaraq, Sarkozinin Dağlıq Qarabağ münaqişəsinə münasibətinin necə olduğunu gördük. Yəni əvvəlki sərt mövqedən obyektiv mövqeyə doğru yaxınlaşma hiss olundu. Əvvəllər Fransa prezidentləri qatı ermənipərəst mövqe nümayiş etdirirdilərsə, indi bunu görmək mümkün deyil. Çünki dünyada, o cümlədən Fransada erməni diasporu zəifləyib. Fransanın Qarabağla bağlı mövqeyinin dəyişməsinə gəlincə, burada iki məsələ var. Birincisi, Fransa ATƏT-in Minsk Qrupunda dövlət olaraq təmsil olunmur. Onlar Minsk Qrupunda Avropa Birliyinin təmsilçisidir. Ona görə də dünya miqyasında özünü göstərmək üçün hökmən Dağlıq Qarabağ məsələsində ədalətli olmağa məhkumdur. Bunun da bəzi əlamətləri görünür. Əsas məsələlərdən biri də Azərbaycan Prezidentinin apardığı siyasətdir. Fransa ilə parlamentlərarası əlaqələrimiz inkişaf edib. Azərbaycanın xarici siyasəti çox həssas, operativ və çevikdir. Ona görə də Fransada yeni seçilmiş prezident nə isə deyəcəksə, Azərbaycan ona dərhal reaksiya verəcək. Hazırda prezident üçün ən vacib məsələ Fransanın daxili sosial-iqtisadi vəziyyətidir. Fransa ilə Ermənistan arasında ticarət dövriyyəsi təxminən 160 milyon dollar həcmindədir. Amma Azərbaycanla Fransa arasında ticarət dövriyyəsi bundan dəfələrlə çoxdur. Bu amilləri ümumiləşdirib demək olar ki, Fransanın yeni prezidentinin fəaliyyətə başlaması ilə bu ölkənin Dağlıq Qarabağ münaqişəsinə münasibətində dəyişikliklər gözlənilmir. Əgər olarsa, çalışacaqlar ki, Azərbaycanla münasibətləri normallaşdırmaq kursunu seçsinlər".
Vidadi ORDAHALLI