Mehdi Mehdiyev: "Orduda qulluq etməli olan gənc nəslin böyük əksəriyyəti həm müharibədə iştirak etməmək, həm də çətin iqtisadi vəziyyət səbəbindən oranı tərk edir"
ABŞ-ın nüfuzlu "The Washington Post" qəzeti qondarma "Dağlıq Qarabağ Respublikası"nın ordusunda yaranan problemdən yazıb. Məqalədə qeyd edilir ki, son vaxtlar yaranan vəziyyət qadınları ordu sıralarına qoşulmağa vadar edir. Bildirilir ki, son illər İrəvandakı hərbi akademiyada oxuyan müdavimlər arasında xeyli sayda qadına rast gəlinir.
Nəşrin iddiasına görə, Dağlıq Qarabağ münaqişəsi tərəfləri arasında əldə olunmuş atəşkəsə əməl edilməməsi belə halın bundan sonra da artacağını söyləməyə əsas verir. Lakin Ermənistan mətbuatı məqalədə yazılanlara başqa rakursdan şərh verməyə çalışır və iddia edir ki, qadınların orduya meyl göstərməsi heç də kişi çatışmazlığı ilə əlaqəli deyil: "Aprel döyüşlərindən sonra Dağlıq Qarabağ ərazisində yaşananlar hətta xanımları silaha sarılmağa vadar edib".
Ermənilərin ordusunda qadınların sayının artması kişi çatışmazlığı ilə bağlıdır, yoxsa onların vətənpərvərlik hisslərinin artması ilə?
Hərbi ekspert Mehdi Mehdiyev qəzetimizə açıqlamasında bildirdi ki, Ermənistanın həmin faktoru vətənpərvərlik hisslərinin artması ilə izah etməsi gülüncdür: "Bizim əlimizdə statistika var. Ermənistanın özünün açıqladığı rəqəmlərdə də bu əks olunur ki, onların ciddi səfərbərlik resursu problemi var. Mən qadınların sayının artmasını kişi çatışmazlığı ilə izah edirəm. Bu disbalansı aradan qaldırmaq üçün müxtəlif yollara əl atırlar. Həmçinin, müxtəlif vədlərlə qadınların orduya çağırılmasını təmin edirlər. Bu yaxınlarda onlar ortaya ordu quruculuğu ilə bağlı yeni konsepsiya atdılar. Həmin sənədin məğzində duran başlıca məsələ bundan ibarətdir ki, orduda qulluqla bağlı müqaviləli sistem tətbiq edilsin. Hər nə etsələr belə, sonunda insan resursu çatışmazlığı ilə üzləşməli olurlar. Çünki orduda qulluq etməli olan gənc nəslin böyük əksəriyyəti həm müharibədə iştirak etməmək, həm də çətin iqtisadi vəziyyət səbəbindən oranı tərk edir. Bu da qadınların orduya cəlbini zəruri edir. Dağlıq Qarabağ ərazisində olan işğalçı orduda isə vəziyyət daha acınacaqlıdır. Qadınların orduya cəlbi isə həddən artıq kütləviləşə bilməz. Çünki hər qadın ordudakı çətin şərtləri qəbul etmək iqtidarında deyil".
Məhəmmədəli QƏRİBLİ