Ukrayna separatçılarının əlində SA-11 raketinin olduğunu göstərən ilk açıq dəlil tapıldı

Tarix: 24.07.2014 / 05:26
Bölmə: Siyasət

Ukrayna hava sahəsində düşmüş Malayziyaya məxsus "Boing-777" tipli sərnişin təyyarəsinin kimlər tərəfindən vurulması ətrafında Ukrayna ilə Rusiya arasında qarşılıqlı ittihamların artdığı bir vaxtda ABŞ kəşfiyyatı da əldə etdiyi məlumatları açıqlayıb. ABŞ kəşfiyyatı Malayziya hava yollarına aid sərnişin təyyarəsilə bağlı olayla Rusiya hökumətinin birbaşa əlaqəsi olmadığını, ancaq ölkənin şərqindəki Rusiya tərəfdarı separatçıları silahla təmin edərək hadisənin baş verməsinə "şərait yaratdığı"nı deyir.
Amerika kəşfiyyatının rəsmiləri deyir ki, Rusiyayönlü separatçıların Malayziya təyyarəsini "səhvən" vurduğuna inanırlar. Olayda Rusiya ilə birbaşa əlaqə isə aşkar edilməyib. Kəşfiyyat rəsmiləri bildirib ki, sərnişin təyyarəsinin SA-11 yer-hava raketi ilə vurulduğunu düşünürlər.
SA-11 yalnız qanuni hökumətlərin ixtiyarında ola bilər. Belə silahlar partizan hərəkatı ilə məşğul separatçı qiyamçılara xas deyil.
Kremllə təyyarənin vurulması arasında birbaşa əlaqə tapılmadığı deyilsə də, Rusiyanın bu hadisəyə "şərait yaratdığı" vurğulanır. Bununla belə, atəşi kimin açdığı və Rusiya zabitlərinin hadisədə iştirak edib-etmədiyi məlum deyil. Araşdırmalarda ehtiyatlı davranan kəşfiyatçılar təyyarəni salan raketin Rusiyadan verildiyinə dair də hər hansı dəlilə sahib olmadıqlarını qeyd ediblər
ABŞ-ın Milli Kəşfiyyat Direktorunun Ofisi olayla bağlı şəkillər də yayıb. "Washington Post" qəzeti yazır ki, şəkillərdə "yer-hava" növlü raketi buraxan qurğunun yerdəyişmələri və Rusiyanın Ukraynadakı hərbi fəallığı əks olunub. ABŞ kəşfiyyatının Kosmosdan çəkdiyi şəkillər Rusiyanın Rostov şəhəri yaxınlığındakı hərbi bazasına aiddir və burda iyun ayından bəri artan fəallığı göstərir.
Qəzet yazır ki, iyulun 22-də ABŞ kəşfiyyat rəsmiləri Kosmosdan çəkilmiş bu şəkilləri nümayiş etdirəndə bildirdilər ki, bunlar Malayziya təyyarəsinin vurulmasında Rusiyanın əli olmasını göstərən dəlillərdir və Moskva təyyarəni vuran yaraqlılara təlim keçib. Dəlill və sübutlar haqda kəşfiyyat rəsmiləri bildirir ki, sensorlar raketin izlərini müəyyən edib, vurulmuş təyyarənin üzərində qəlpə izləri var.
Kəşfiyyat rəsmiləri ilk dəfə olaraq Rostov yaxınlığındakı hərbi bazanı yaraqlıların əsas təchizat mənbəyi kimi qeyd ediblər. Kəşfiyyat rəsmilərinin Rusiyanın təyyarənin vurulmasında əli olması barədə gətirdiyi digər dəlillər sosial mediada gedən videolar, audiolar və yazışmalardır. ABŞ kəşfiyyatının yüksək rütbəli nümayəndələri təyyarəni Ukrayna qüvvələrinin vurması ehtimalını rədd edib. Onların sözlərinə görə, təyyarə qəzaya uğrayanda həmin rayonda, raketin vura biləcəyi məsafədə Ukraynanın raket sistemləri olmayıb.
Vaşinqtonda jurnalistlər qarşısında çıxış edən 3 kəşfiyyat rəsmisindən biri adının çəkilməməsi şərtilə deyib ki, Rusiya hökuməti öz versiyasını mediada yaymaq üçün təzyiq edir və ya özünə yaxın elementlərlə manipulyasiya edir. Rəsmi deyib ki, "bu, klas"ik nümunədir- günahkar qurbanını günahlandırır".
Bundan başqa, 295 adamın həyatını itirdiyi Malayziya təyyarəsi faciəsinə yol açan Rusiya istehsalı SA-11 raketinin ukraynalı separatçıların da əlində olduğunu göstərən ilk açıq dəlil tapılıb. Belə ki, Rusiya tərəfdarı separatçılardan biri üsyançıların əlində olan SA-11 raket kompleksi qarşısında çəkdirdiyi və internetdə paylaşdığı fotoşəkil ortaya çıxıb. Sergey Pasçenko adlı separatçının şəkillərini yayan obozrevatel.com adlı Ukrayna saytı şəklin altında "Sən real bir qəhrəmansan. Sən Ukraynaya xəyanət etmədin. Əksinə, SA-11-in buradakı varlığını sübut etdin. Afərin" ifadələrinə yer verib.
Ukrayna tərəfdarı xəbər saytları, ayrıca, təyyarənin vurulmasından dərhal sonra Ukrayna torpaqlarındakı iki raket kompleksinin tırlarla Rusiya torpaqlarına aparıldığını göstərən görüntülər yayıb.
Qeyd edək ki, Amsterdam - Kuala-Lumpur marşrutu ilə hərəkət edən, "Malayziya Hava Yolları"na məxsus "Boing-777" iyulun 17-də Ukraynanın şərqində, rusiyameylli separatçıların nəzarətində olan ərazidə qəzaya uğrayıb. Təyyarədə olan 298 sərnişinin hamısı həlak olub.
Dünən Rusiyameylli yaraqlılar Donbasda daha 2 Ukrayna hərbi təyyarəsini vurublar. Ukrayna təhlükəsizlik qüvvələrinin nümayəndəsi bildirib ki, Donetsk vilayətinin Dmitrovka kəndi yaxınlığında ordunun hücumlarına havadan dəstək verən Ukrayna hərbi hava qüvvələrinə məxsus 2 Su-25 qırıcısı vurulub. Təyyarəçilər paraşütlə tullanıblar. Ukrayna Təhlükəsizlik və müdafiə şurasından Andrey Lısenko da bu məlumatı təsdiq edib.
Iyulun 23-də sosial mediada separatçıların hərbi lideri İqor Strelkova istinadən Ukrayna hərbi təyyarəsinin vurulması haqda xəbərlər paylaşılırdı. O, Saur-Mogila yüksəkliyində 1 təyyarənin vurulduğunu yazır, daha birinin vurulmasına əmin olmadığını bildirirdi.
Saur-Mogila təpəsi və Dmitrovka kəndi Donetsk vilayətinin Şaxtyorsk rayonunda yerləşir. İyulun 17-də Malaysia Airlines təyyarəsi də bu ərazidə yerə düşmüşdü.