Üzeyir Cəfərov: "Beynəlxalq ictimai rəyi öz xeyirlərinə kökləmək istəyirlər"
Xocalı soyqırımının 25-ci ildönümü və cəbhədə Ermənistanın törətdiyi son təxribatlar bir sıra sualların yaranmasına rəvac verib. Bunu Ermənistanın siyasi təxribatlarının hərbi müstəvidə davamı sayanlar da var.
Hesab edilir ki, burada məqsəd münaqişənin danışıqlar yolu ilə həllinə imkan verməmək və Xocalı soyqırımının ildönümü ərəfəsində beynəlxalq ictimaiyyətin diqqətinin yayındırılmasıdır. Ermənilərin müxtəlif bəhanələrlə cəbhədə tez-tez təxribatlar törətməsi ilk dəfə baş vermir. Cəbhədə belə bir təxribatın məhz Xocalı soyqırımının 25-ci ildönümü ərəfəsində törədilməsi ermənilərin məkrli xislətindən xəbər verir. Ermənilərin məhz bu tarixdə təxribatlara əl atmasının başqa hansı səbəbi ola bilər?
Hərbi ekspert Üzeyir Cəfərov hesab edir ki, cəbhədə ermənilərin törətdiyi son təxribatla bağlı seçilmiş vaxt təsadüfi deyil: "Bununla onlar belə rəy yaratmağa çalışır ki, Xocalı faciəsinin ildönümündə bu addımları qisas məqsədilə Azərbaycan tərəfi ata bilər. Beynəlxalq ictimai rəyi öz xeyirlərinə kökləmək istəyirlər.
Başqa səbəbi isə Ermənistandakı vəziyyətin ağır olması ilə bağlıdır. Ermənistan hakimiyyəti daxildəki qarşıdurmanı ört-basdır etmək üçün cəbhə xəttində təxribatlar törədir.
Ermənistanda vəziyyət düşündüyümüzdən də gərgindir. Hətta Serj Sarkisyanın ən yaxın silahdaşı olan Seyran Ohanyan da bəyanat verərək, təkcə xalqın yox, özünün də Sarkisyan idarəçiliyindən narazı olduğunu dedi. Məlumdur ki, S.Sarkisyan və S.Ohanyan Qarabağ klanının üzvləridir, onlar hakimiyyətə məhz Qarabağı işğal etdikləri üçün gəliblər. Ermənistanda aprel ayında keçiriləcək parlament seçkiləri ərəfəsində bir-birlərinə güzəştə getmirlərsə, deməli, hakimiyyətdə olmayacaqları təqdirdə erməni xalqının onlardan baş verənlərin hesabını soruşacağını bilirlər. Ona görə də daxildəki qarşıdurmalardan diqqəti yayındırmaq üçün cəbhədə vəziyyəti gərginləşdirməyə cəhd edirlər. Düşmən ön xətdə xeyli sayda ağır texnika cəmləşdirib və əsas məqsəd vəziyyəti gərginləşdirib diqqəti daxili qarşıdurmalardan, həmçinin qondarma rejimdə keçirilmiş "referendum"dan yayındırmaqdır".
Məhəmmədəli QƏRİBLİ