"Həmsədrlər bu cür incə məsələlərə xüsusi diqqət edərək işğalçı ilə bizim məsuliyyəti bərabərləşdirməməlidir"
ATƏT-in Minsk Qrupunun həmsədrləri Riçard Hoqland (ABŞ), İqor Popov (Rusiya) və Stefan Viskonti (Fransa) təmas xəttində baş verən toqquşma ilə bağlı bəyanat yayıb.
Bəyanatda qeyd edilir ki, həmsədrlər Azərbaycan və Ermənistan müdafiə nazirliklərindən və digər mənbələrdən fevralın 25-də səhər təmas xəttində atəşkəs rejiminin ciddi surətdə pozulduğu və insan tələfatı olduğu barədə məlumat alıblar. Bəzi cəsədlər neytral zonada qalıb. Həmsədrlər tərəfləri təmas xətti yaxınlığındakı ağır texnikanı əvvəlki mövqelərə çəkməyə və ATƏT-in şəxsi nümayəndəsinin vasitəçiliyi ilə əldə edilən razılaşmaya uyğun olaraq cəsədlərin evakuasiyasının təmin edilməsinə çağırıb. Həmsədrlər tərəfləri güc tətbiq etməmək barədə öhdəliyə əməl etməyə də çağırıb.
Göründüyü kimi, həmsədrlər son bəyanatlarında ənənəvi mövqelərinə sadiq qalıb. Onlar son toqquşmalarla bağlı yaranan məsuliyyəti bərabər şəkildə tərəflərin üzərinə qoymaq istəyir. Çağırışı konkret ünvana deyil, hər iki tərəfə edirlər. Bu mövqeyi nə dərəcədə obyektiv saya bilərik?
Ekspert Elşən Həsənov qəzetimizə bildirdi ki, həmsədrlərin nümayiş etdirdiyi mövqe daha çox Ermənistanın marağına uyğundur: "Atəşkəsi onlar pozub və bütün bu vəhşilikləri işğal altında olan ərazilərdə törədirlər. Maraqlıdır ki, bütün bu reallıqları bilə-bilə, vasitəçilik missiyasını üzərinə götürən qurum kiminsə kefini pozmaqdan belə çəkinir.
Həmsədrlər işğalçının ərazilərdən çıxarılmasına deyil, atəşkəsə əməl edilməsinə çağırış edir. Analoji bəyanatlar status-kvonun saxlanmasına hesablanıb. Təbii ki, biz belə ehtiyatlı və reallığı özündə əks etdirməyən mövqe ilə razılaşa bilmərik. Çünki bununla həmsədrlər var olduqlarını sübut edirlər. Bu isə bizə kifayət etmir. Axı sual olmalıdır: Azərbaycan əsgəri öz torpağında niyə öldürülür? Təbii ki, bu sualın cavabı Ermənistandan işğala son qoymaq çağırışı ilə yekunlaşa bilər. Məhz bu səbəbdəndir ki, bunu etmirlər. Atəşkəsə əməl olunması ilə bağlı Azərbaycan Ermənistanla eyni məsuliyyəti bölüşə bilməz. Çünki hər zaman təxribat onlar tərəfindən törədilir. İşğalçı dinc üsullarla geri çəkilmirsə, hüquqi baxımdan bizim ona güc tətbiq etmək haqqımız var. Çünki onlar, faktiki olaraq, bizim əraziləri qəsb edib. Hesab edirəm ki, həmsədrlər bu cür incə məsələlərə xüsusi diqqət edərək işğalçı ilə bizim məsuliyyəti bərabərləşdirməməlidir".
Məhəmmədəli QƏRİBLİ