Yeganə Hacıyeva: "Düşünürəm ki, yaxın zamanlarda belə formatda görüş olacaq"
Amerika prezidenti Donald Tramp ABŞ Silahlı Qüvvələrinin Qərargah Rəislərinin Birləşmiş Komitəsinin sədri Cozef Danford və Rusiya Silahlı Qüvvələrinin Baş Qərargah rəisi Valeriy Gerasimovun Bakıda keçirdiyi görüşdən məmnun qalıb.
Bu barədə Ağ Evin mətbuat xidmətinin rəsmi nümayəndəsi Şon Spayser deyib. Onun sözlərinə görə, Tramp hesab edir ki, Dövlət Departamentinin rəhbəri Reks Tillersonun Rusiya XİN rəhbəri Sergey Lavrovla Almaniyada, general Cosef Danfordun Valeri Gerasimovla Azərbaycandakı görüşü olduqca məhsuldar olub.
Xatırladaq ki, fevralın 16-da ABŞ Silahlı Qüvvələrinin Qərargah Rəislərinin Birləşmiş Komitəsinin sədri Cozef Danford və Rusiya Silahlı Qüvvələrinin Baş Qərargah rəisi Valeriy Gerasimov Bakıda görüşüb. Görüşdə Rusiya və ABŞ arasında hərbi sahədə münasibətlərin hazırkı durumu müzakirə olunub.
Trampın hər iki görüşdən məmnun qalması yaxın zamanlarda Putinlə onun arasında görüşün baş tutmasına zəmin yarada bilərmi?
Politoloq Yeganə Hacıyeva qəzetimizə bildirdi ki, bu iki böyük ölkənin hər hansı birində dövlət başçısı dəyişiləndə onlar arasında birinci şəxslər səviyyəsində tezliklə təmasın qurulmasına can atılır: "Buna hər iki tərəf maraqlı olur. Putin uzun müddətdir hakimiyyətdədir. Yeni seçilən Trampdır. Birinci şəxslər arasında görüşün olacağı ilə bağlı anons verilib. Bir müddət əvvəl Rusiya prezidentinin mətbuat katibi Dmitri Peskov V.Putinlə D.Trampın iyul ayında Almaniyada G-20-nin çərçivəsində görüşəcəyini bildirib. Peskov bu tarixdən öncə keçiriləcək görüş barədə məlumatsız olduğunu bildirib. Peskovun açıqlaması xarici işlər və qərargah rəislərinin görüşündən əvvələ təsadüf edirdi. Bu iki mühüm strukturun təmsilçiləri arasında keçirilən görüşün uğurlu alınması və Trampın bununla bağlı xüsusi məmnunluq ifadə etməsi görüşün vaxtını qabağa çəkə bilər. Çünki ən mühüm qurumlar prezidentlərə səmimi atmosferdə danışmaq üçün bütün bünövrəni hazırlayıb. Düşünürəm ki, yaxın zamanlarda belə formatda görüş ola bilər".
Məhəmmədəli QƏRİBLİ