"İnanıram ki, İlham Əliyevin koordinasiyalı işin təşkili baxımından irəli sürdüyü təklifə də müsbət reaksiya veriləcək"
Prezident İlham Əliyev ənənəvi olaraq iştirak etdiyi Davos İqtisadi Forumunda xüsusilə də Azərbaycanın iştirakçısı olduğu meqa layihələrlə bağlı bir sıra mühüm təkliflər irəli sürüb. Həmin təkliflərdən biri də "Cənub Qaz Dəhlizi" ilə əlaqəli olub.
İlham Əliyev bildirib ki, layihə ilə bağlı işlərin funksionallığını qaldırmaq üçün iştirakçı olan və olmayan, lakin layihəyə maraq göstərən ölkələrin əlaqədar nazirlərindən ibarət bir işçi qurumunun yaradılmasına ehtiyac var. Çox maraqlıdır ki, ölkə başçısının həmin təklifinə ölkələrdən reaksiya gəlməyib. Bu susqunluq nə ilə bağlıdır?
İqtisadçı Qulu İsmayılov qəzetimizə açıqlamasında bildirdi ki, İlham Əliyevin Davos İqtisadi Forumunun rəsmi saytında "Azərbaycanın 2017-ci il üçün iqtisadi prioritetləri" sərlövhəli məqaləsi dünyanın maliyyə dairələri tərəfindən böyük maraqla qarşılanıb: "Sonra Prezidentin keçirdiyi görüşlər də məhsuldarlığı və orijinal təkliflərin səsləndirilməsilə yadda qaldı. Doğru buyurursunuz ki, həmin təkliflərdən biri də "Cənub Qaz Dəhlizi" ilə bağlı oldu. Ölkə başçısı həmin paneldə müəyyən statistik rəqəmləri də nəzərə çatdırdı. Bildirdi ki, Azərbaycan iştirak etdiyi birgə layihələrdəki öhdəliklərinə daha məsuliyyətlə yanaşaraq, üzərinə düşən işləri, faiz etibarilə, digərlərindən çox görüb. Təbii ki, bu məsələdə beynəlxalq layihələrə yanaşmada dövlət səviyyəsində olan məsuliyyətin böyük rolu var. Bu baxımdan da koordinasiyalı qurumun yaradılması ideyası irəli sürüldü. Hesab edirəm ki, bu təklif həyata keçsə, deyilən layihə istiqamətində bütün işlər sürətlənər. Ancaq təəssüflər olsun ki, biz forumdan sonra hansısa ölkənin bu istiqamətdə iş görmək istəməsilə bağlı reaksiyasına rast gəlmədik. Hazırda imzalanan qaz sazişlərinə əvvəlcədən bir sıra ölkələr inamsız yanaşırdı. Tam səmimi deyim ki, Azərbaycanın prinsipiallığı olmasaydı, həmin layihələr ərsəyə gəlməyəcəkdi. İnanıram ki, İlham Əliyevin koordinasiyalı işin təşkili baxımından irəli sürdüyü təklifə də müsbət reaksiya veriləcək. Çünki Azərbaycan bu məsələdə öz maraqlarını güdmür, ümumi işin sürətlənməsi üçün çalışır. Yəqin ki, həmin təklifi yenidən onların yadına salmaq zərurəti ortaya çıxıb".
Məhəmmədəli QƏRİBLİ