"Həm Rusiyanın arxa bağçası olub, həm də Avropa ilə yaxın olmaq mümkün deyil"
Ermənistan mətbuatının verdiyi məlumata görə, həmin ölkənin baş naziri Karen Karapetyan 7 fevral tarixində Avropa Parlamentinin İrəvandakı nümayəndəliyinin rəhbəri Pyotr Svitalskini qəbul edib. Görüşdə müzakirə olunan məsələlər xüsusilə diqqəti cəlb edir. Bildirilir ki, Ermənistanda korrupsiya ilə mübarizə sahəsində görülən işlər ətrafında fikir mübadiləsi aparılıb.
Karapetyan nümayəndəliyin rəhbərinə Ermənistanın bu sahədə gördüyü işləri təqdim edib. Həmçinin bildirib ki, bu sahədə müstəqil bir preventiv qrupun yaradılması nəzərdə tutulur. Məsələdə diqqətçəkən vacib bir məqam Avropa Birliyinin Azərbaycan və Ermənistana olan münasibətidir.
Avrpoa Birliyinin nümayəndəsinin Ermənistanda ən yüksək səviyyədə ölkədəki korrupsiyanı müzakirə etdiyi gündə Azərbaycan Prezidenti həmin qurumun rəsmiləri ilə gələcək əməkdaşlıq barədə mühüm müzakirələr aparıb. AB rəsmiləri Azərbaycanla əməkdaşlıqda xüsusilə maraqlı olduqlarını ifadə ediblər.
Avropa Birliyinin iki ölkəyə fərqli yanaşması nədən qaynaqlanır?
Politoloq Qabil Hüseynli qəzetimizə bildirdi ki, bunun başlıca səbəbi ölkələrin yürütdüyü siyasətlə bağlıdır: "Ermənistan, demək olar ki, Rusiyanın Qərbə alternativ sayıla biləcək bütün layihələrində yaxından iştirak edir. KTMT, Avrasiya İttifaqının üzvüdür. Azərbaycan isə Avropa institutlarına daha yaxındır. Demək olar ki, bütün sahələr üzrə əməkdaşlıq mövcuddur. Azərbaycan Prezidenti İlham Əliyevin Brüsseldə Avropa İttifaqının yüksək səviyyəli rəsmiləri ilə keçirdiyi görüşlər, səslənən fikirlər onu göstərir ki, Azərbaycanla Avropa İttifaqı arasında münasibətlərdə yeni bir səhifə açılıb, bu münasibətlər yeni mərhələyə qədəm qoyub.
Avropa İttifaqı ilə Azərbaycan Respublikası arasında hərtərəfli əməkdaşlığa dair sazişin hazırlanması üçün danışıqlara başlanıb. Hər iki tərəfin danışıqlardan gözləntiləri böyükdür. Bu danışıqların nəticəsi kimi, yeni dövrün tələblərinə uyğun olaraq, Avropa İttifaqı ilə Azərbaycan arasında humanitar, mədəni, siyasi və iqtisadi əlaqələr inkişaf edəcək.
Brüsseldə keçirilən görüşlərdən sonra səslənən bəyanatlarda diqqətçəkən məqamlardan biri də Avropa İttifaqı Şurasının prezidenti Donald Tuskun Azərbaycanın ərazi bütövlüyünü, suverenliyi və müstəqilliyini dəstəkləməsi oldu. Bu onun göstəricisidir ki, Azərbaycanla Avropa İttifaqı arasında münasibətlər enerji, ticarət əlaqələrini aşaraq, yüksək siyasi əməkdaşlığı da əhatə edir.
Təbii ki, Ermənistan hələ bu mərhələyə gəlib çatmayıb. Bu səbəbdən də onlarla korrupsiya ilə mübarizə sahəsində aparılan işlər müzakirə edilir. AB rəsmiləri gözəl anlayır ki, Ermənistan bir əlində iki qarpız tutmaq istəyir. Həm Rusiyanın arxa bağçası olub, həm də Avropa ilə yaxın olmaq mümkün deyil".
Məhəmmədəli QƏRİBLİ