"Yəqin ki, Azərbaycanın irəli sürdüyü bu təklifə ciddi dəstək veriləcək"
Azərbaycan Prezidentinin ictimai-siyasi məsələlər üzrə köməkçisi Əli Həsənov Səudiyyə Ərəbistanı Krallığına səfəri çərçivəsində Ər-Riyadda Səudiyyə Jurnalistləri Assosiasiyasının idarə heyətinin sədri, Körfəz Ölkələri Jurnalistlər Birliyinin sədri, "Əl-Cəzirə" qəzetinin baş redaktoru Xalid əl-Maliki ilə görüşüb. Görüşdə Azərbaycanla Səudiyyə Ərəbistanı arasında media sahəsində əməkdaşlığın, qarşılıqlı əlaqələrin inkişaf etdirilməsi məsələləri müzakirə edilib.
Daha sonra Ə.Həsənov "Əl-Cəzirə" qəzetinin redaksiyasında onun üçün təşkil olunmuş mətbuat konfransında iştirak edib və jurnalistlərin suallarını cavablandırıb. Azərbaycanın dünyada islam həmrəyliyinin möhkəmləndirilməsində rolu ilə bağlı suala cavabında Prezidentin köməkçisi bildirib ki, Azərbaycan dövlət müstəqilliyini bərpa etdikdən sonra islam ölkələri ilə qarşılıqlı faydalı əlaqələrin qurulması və inkişaf etdirilməsi ümummilli lider Heydər Əliyevin həyata keçirdiyi siyasətin başlıca istiqamətlərindən biri olub: "Azərbaycan islam ölkələri ilə ikitərəfli və çoxtərəfli əməkdaşlıq əlaqələri qurub, İslam Əməkdaşlıq Təşkilatının fəal üzvlərindən birinə çevrilib.
Bu gün Prezident İlham Əliyev Azərbaycanın islam ölkələri ilə əməkdaşlıq əlaqələrinin daha da inkişaf etdirilməsi, dünyada islam həmrəyliyinin möhkəmləndirilməsi, islamofob dairələr tərəfindən islam dininə qarşı təşkil edilən kampaniyanın qarşısının alınması, islam dünyasına qarşı təhdidlərin aradan qaldırılması məsələlərinə böyük önəm verir. Təsadüfi deyil ki, Azərbaycan Prezidentinin sərəncamı ilə 2017-ci il Azərbaycanda "İslam Həmrəyliyi İli" elan olunub və ölkəmiz bu çərçivədə həm yerli, həm də beynəlxalq səviyyədə bir çox təşəbbüslərlə çıxış edir. Bu çərçivədə islam dəyərlərinin, mədəniyyətinin təbliği məqsədilə ölkə daxilində və onun hüdudlarından kənarda konfransların, forumların, simpoziumların və digər tədbirlərin təşkilinə xüsusi diqqət yetiriləcək. İslam ölkələrinin rəsmi şəxsləri, qeyri-hökumət, ictimaiyyət nümayəndələri arasında təmaslar intensivləşdiriləcək, qarşılıqlı səfərlər təşkil olunacaq. Azərbaycan dünyada islamofobiya meyllərinə qarşı mübarizənin gücləndirilməsi məqsədilə vahid mərkəzin yaradılmasını təklif edir və bu təşəbbüsün reallaşdırılması üçün digər ölkələrlə birlikdə müvafiq tədbirlər görəcək. Eyni zamanda, Azərbaycan problemlərlə üzləşmiş islam ölkələrinə həm siyasi, həm də digər formalarda dəstəyin gücləndirilməsi üçün birgə məqsədyönlü addımlar atılmasını zəruri hesab edir. Onu da qeyd edim ki, Azərbaycan hər il beynəlxalq miqyasda keçirdiyi mədəniyyətlərarası dialoq, humanitar forumlar çərçivəsində islam dünyasının üzləşdiyi problemləri müzakirəyə çıxarmaq, onları beynəlxalq ictimaiyyətin diqqətinə çatdırmaq və həlli yollarını tapmaq üçün səylərini artıracaq. Bütün bunlar və həyata keçirilməsi nəzərdə tutulan digər tədbirlər göstərir ki, Azərbaycan islam həmrəyliyini dəstəkləyən siyasətini var gücü ilə və peşəkarcasına davam etdirəcək. Müsəlmanlar arasında birliyin və həmrəyliyin formalaşdırılması, eləcə də islamofobiya hallarına qarşı birgə mübarizə bu siyasətin əsasını təşkil edir. Azərbaycanın islam həmrəyliyi mövzusunda təklif etdiyi platforma bu problemlərin həllinə kömək edə bilər".
Göründüyü kimi, Azərbaycan islam ölkələri üçün dünyadakı islamofobiya meyllərinə qarşı mübarizənin gücləndirilməsi məqsədilə vahid mərkəzin yaradılması ilə bağlı yeni model təklif edir. Buna ekspertlərin münasibəti necədir?
Şərqşünas Seyid Camal Əzimbəyli qəzetimizə açıqlamasında bildirdi ki, Ə.Həsənovun səfərini və orada keçirdiyi görüşləri yüksək qiymətləndirir: "Azərbaycan son addımları ilə sübut edir ki, bir dünyəvi ölkə olmaqla yanaşı, həm də islamın təəssübünü çəkən dövlətdir. Əli müəllimin bu tip açıqlaması bunu bir daha sübut etdi. Bəli, çox təəssüflər olsun ki, bu gün dünyada islamofobiya meylləri var, ancaq bununla bağlı vahid mübarizə proqramı yoxdur. İslam ölkələrinin çoxunun buna ehtiyacı var. Yəqin ki, Azərbaycanın irəli sürdüyü bu təklifə ciddi dəstək veriləcək. Ölkəmizin bu il ev sahibliyi edəcəyi İslam Oyunları da müsəlman ölkələri arasında inteqrasiyanı gücləndirmiş olacaq. Əlaqələr intensivləşəndən sonra immunitet tədbirlərinin həyata keçirilməsi daha asan olur".
Məhəmmədəli QƏRİBLİ