Ermənistanda yaxınlaşan parlament seçkiləri fonunda bu ölkədə siyasi gərginlik tədricən özünün zirvə nöqtəsinə yaxınlaşmaqdadır. Hazırda siyasi səhnədə yer alan qüvvələr tərəfindən Serj Sarkisyan iqtidarına qarşı çox güclü müxalifət formalaşmaqdadır. Müxalif qüvvələr sırasında indi iki qanad gedərək ön plana çıxır.
Bunlardan biri Sarkisyanın son aylarda hakimiyyətdən uzaqlaşdırdığı sabiq məmurlardır. Onlar sürətlə Sarkisyana qarşı təşkilatlanır və mövcud rejimin bütün cinayətlərini gedərək daha açıq əbyan edirlər. Bu xüsusda keçmiş müdafiə naziri Seyran Ohanyanla Serj Sarkisyan arasında qalmaqalın getdikcə dərinləşməsi daha çox diqqət cəlb edir. Seyran Ohanyan indi açıq şəkildə Ermənistan rəhbərini 1 mart hadisələrinin təşkilatçılığında ittiham edir. Xatırladaq ki, 2008-ci ilin martın 1-də baş verən qanlı toqquşmada 10 nəfər dinc sakin öldürülüb, 200 nəfər müxtəlif dərəcədə xəsarət alıb, daha 100 nəfər isə həbs edilib. 1 mart hadisələrinin öyrənilməsi və faktların toplanması üzrə qrup hələ də hadisələrdə əli olanları üzə çıxarmayıb. Doqquz il sonra həmin iğtişaşlar yenidən hadisələrin iştirakçısı, nazir Seyran Ohanyan tərəfindən Ermənistan gündəminə gəlib. Ohanyan bildirib ki, onlara həmin gün İrəvanın küçələrinə qoşun yeridilməsi tapşırığı verilib. Müdafiə Nazirliyinin tabeliyində olan hərbçilərin böyük hissəsi Sarkisyana və onun klanına məxsus obyektlərin mühafizəsinə cəlb olunub. Xüsusi təyinatlı qoşunlar isə dinc əhalinin üzərinə yeridilib. Aksiya zamanı iğtişaşları da Sarkisyanın mülki geyimdə olan adamları törədib. Bu isə nümayişçilərə atəş açmaq üçün bəhanə olub. Ermənistanın Xüsusi Təhqiqat Xidmətinin keçmiş üzvü Andranik Köçəryan da baş verənlərdə Sarkisyanın birbaşa iştirakı olduğunu deyib. O bildirib ki, 1 mart qurbanları cəmiyyətə cinayətkar kimi təqdim edilir: "Onlar sadəcə Ermənistanda növbəti prezident seçkisindən sonra seçkinin nəticələrinə etiraz edən dinc sakinlər olublar". Xatırladaq ki, 2008-ci il martın 1-dən 2-dək davam edən etiraz aksiyası zorla dağıdılıqdan sonra Sarkisyan hakimiyyəti zor gücünə ələ keçirib və hələ də cinayətkar mahiyyətinə uyğun fəaliyyətini davam etdirməkdədir. Gözlənir ki, hələ qarşıdakı dövrdə Sarkisyanın daha çox cinayəti onun vəzifədən uzaqlaşdırdığı sabiq məmurlar tərəfindən ifşa olunsun. Uzun müddət Sarkisyan iqtidarında müdafiə naziri vəzifəsini tutan Ohanyan, yuxarıda qeyd olunanlarla yanaşı, dövlət vəsaitlərindən düzgün istifadə olunmadığını da deyir:"Bəsdir dözdük, bütün resurslar bir qrup adamın əlində cəmləşib, vacib işlə məşğul olanlara isə deyirlər ki, pul yoxdur, barışmaq lazımdır". O, azadlıq və ədalətə əngəl olan bütün maneələri aradan qaldırmağa daa çağırır:"Artıq bu ədalətsizliyə, bu sosial duruma dözmək olmaz. Ölkədə sosial ədalət, bərabərlik mexanizmi olmalıdır. Ermənistan cəmiyyətində qütbləşmə yolverilməz həddə çatıb. Bu gün azadlıq bizə hava, təmizlik su, ədalət çörək kimi lazımdır".
Qeyd edək ki, Ohanyan keçmiş xarici işlər naziri Vardan Oskanyan və uzun müddət Sarkisyanla birgə çalışan, lakin ötən ilin sonundan müxalifətə keçən Viktor Dallakyanla seçki bloku yaradıb. Müxalifət liderlərindən olan Demokrat Partiyasının lideri Aram Sarkisyan, həmçinin digər siyasətçilər Paruyr Ayrikyan və Tiqran Karapetyan da Ohanyanın müttəfiqləridir. Onların yaratdığı blok parlament seçkisinə "Çiçəklənən Ermənistan"partiyasının keçmiş lideri, tanınmış biznesmen və həmçinin indi seçki ərəfəsində öz blokunu yaratmış Harik Çarukyanla birgə getməyi istisna etmir. Çarukyan ötən il hakimiyyətin təzyiqlərindən sonra siyasətdən getsə də, həmin ilin sonlarında yenidən siyasətə dönüb və öz seçki blokunu yaradıb. Ermənistanın sabiq baş naziri Ovik Abramyanın da bu şəxslərə qoşulması gözlənir. Qeyd edək ki, Çarukyan və Abramyan həm də qudadır.
Müxalif qüvvənin digər əsas qanadına isə sabiq prezident Levon Ter-Petrosyan başçılıq edir. Onu rəhbəri olduğu Erməni Milli Konqresi və Xalq Partiyası seçki bloku yaradıblar. Levon Ter-Petrosyan Dağlıq Qarabağda sülh şüarı ilə seçkilərə qatılır və münaqişənin həllini vacib sayır. Xatırladaq ki, ötən ilin dekabrında Ter-Petrosyan Erməni Milli Konqresinin qurultayında Qarabağda sülhə, kompromislərə və barışığa çağıran geniş nitqlə çıxış edib, hakimiyyətin Qarabağda status-kvonu saxlamağa yönəlmiş siyasətinin Ermənistanı və Qarabağ ermənilərini fəlakətə sürüklədiyini bildirib. Ter-Petrosyan elan edib ki, parlament seçkilərinə Qarabağda sülh, barışıq və mehriban qonşuluq devizi ilə gedəcəklər, bu devizləri dəstəkləyən digər siyasi qüvvələrlə blok yaramağa hazırdırlar. Ümumiyyətlə, gözlənir ki, Qarabağ məsələsi parlament seçkilərində ön plana çıxsın. Sarksiyanın bu istiqamətdə yarıtmaz siyasətinin də əsas tənqid hədəfi olması gözlənir. Xatırladaq ki, Ermənistanda növbəti parlament seçkisi aprelin 2-nə təyin edilib.
Tahir TAĞIYEV