"Bunun mühüm siyasi əhəmiyyəti var"
Prezident İlham Əliyev Avropa İttifaqı (Aİ) Şurasının prezidenti Donald Tuskun dəvəti ilə Belçika Krallığında səfərdə olub. Səfər çərçivəsində o, Avropa Şurası (AŞ) Parlament Assambleyasının (PA) sabiq prezidenti, Niderland-Azərbaycan Dostluq Qrupunun sədri Rene Van der Linden, Aİ-nin xarici məsələlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti xanım Federika Moqerini, Belçika kralı Filip, Avropa Komissiyasının enerji birliyi üzrə vitse-prezidenti Maroş Şevçoviç, Aİ Şurasının prezidenti Donald Tusk və Avropa Komissiyasının prezidenti Jan-Klod Yunkerlə görüşüb.
Paytaxt Brüsseldə keçirilən görüşlərdə Azərbaycan dövlət başçısı ikitərəfli münbasibətlər, əməkdaşlıq əlaqələrinin perspektivləri, Avropanın enerji təhlükəsizliyinin təmin edilməsində ölkəmizin rolu və sair məsələlər ətrafında geniş müzakirələr aparıb.
Prezident İlham Əliyev Brüsselə səfəri çərçivəsində Avropa İttifaqı Şurasının prezidenti D.Tuskla görüşdən sonra keçirilən mətbuat konfransında bir sıra məqamlara toxunub. Dövlət başçısı bildirib ki, Azərbaycan demokratik ilhahatlara sadiqdir: "Avropa İttifaqı-Azərbaycan əlaqələri çox məhsuldardır və yüksək səviyyədədir. Əməkdaşlığımızı genişləndirmək üçün böyük potensial var. Aramızda çox aktiv siyasi dialoq mövcuddur, mütəmadi görüşlər keçirmişik. Ölkəmizdə siyasi məsələlər və siyasi islahatlarla bağlı müzakirələr aparırıq. Azərbaycanda demokratik islahatların inkişafına sadiqik".
İlham Əliyevin Avropanın mərkəzində ölkənin demokratik islahatların inkişafına sadiq olduğunu bəyan etməsinin Azərbaycan üçün nə kimi siyasi əhəmiyyəti var?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bunun mühüm siyasi əhəmiyyəti var: "Azərbaycan Avropa Şurasına daxil olarkən öhdəliklər götürüb. Həmin öhdəliklərin də həyata keçirilməsinə müxtəlif qurumlar nəzarət edir. Prezidentin Brüsseldə keçirdiyi görüşlərdə bu məsələni gündəmə gətirməsi müsbət haldır. Bir sıra ölkələrdə olduğu kimi, Azərbaycanda da islahatlar gedir. Buna müxtəlif münasibətlər olsa da, Azərbaycan bu islahatların inkişaf etdirilməsində qərarlıdır. O baxımdan Prezidentin Avropa İttifaqında Azərbaycanda gedən islahatlar barədə danışması müsbət haldır".
Vidadi ORDAHALLI