Aqşin Əliyev: "Yəqin ki, AP bundan sonra bu cür məqamlarla bağlı xüsusilə diqqətli olacaq"
Brüsseldə səfərdə olan Azərbaycan Prezidenti İlham Əliyev Avropa Parlamentinin (AP) prezidenti Antonio Tajani ilə görüşünü ləğv edib. Bu barədə Avropa Parlamenti rəhbərinin kommunikasiya şöbəsi bildirib.
Avropa Parlamenti prezidentinin kommunikasiya şöbəsinin rəhbəri xanım Delia Vlase "BBC Azərbaycanca"ya görüşün nə səbəbdən ləğv edildiyini bilmədiyini deyib. Lakin o, əlavə edib ki, bu cür hadisələr "qeyri-adi" deyil.
"Commonspace.eu" xəbər saytı adları çəkilməyən mənbələrə istinadən görüşün ləğv edilməsi səbəbi barədə məlumat verib. Belə ki, Avropa Parlamentində Azərbaycan Prezidenti ilə Antonio Tajani arasında görüşlə eyni vaxtda Azərbaycanda insan haqlarının müzakirəsi və həmin müzakirələrdə "Meydan TV"nin rəhbəri Emin Millinin də iştirakının nəzərdə tutulduğu bildirilir. Qeyd edək ki, həmin tədbirdə Avropa Parlamentinin ermənipərəst deputatlarının da iştirakı nəzərdə tutulurdu. Başqa sözlə desək, Avroparlamentdə Azərbaycan müzakirələrinin qərəzli və məqsədyönlü gedəcəyi əvvəldən məlum idi. Belədə Prezidentin məlum görüşü ləğv etməsini necə qiymətləndirmək olar?
Ekspert Aqşin Əliyev qəzetimizə açıqlamasında bildirdi ki, ölkə başçısının Avropa Parlamentinin rəhbəri ilə görüşü ləğv etməsi doğru qərardır: "Hələ İlham Əliyevin səfəri reallaşmadan əvvəl orada təxribat xarakterli nələrinsə gözlənəcəyinə dair məlumatlar yayıldı. Təbii ki, Avropa Parlamenti bundan nəticə çıxarmalı idi. Ancaq görünən bu oldu ki, onlar bəzi "vətəndaş fəalları" və ermənipərəstlərə məhz deyilən məqamda geniş tribuna verməklə məsələnin gərginləşməsində maraqlı olub. Maraqlısı odur ki, bu "tədbirin" təşkilinə Avropa Parlamentinin üzvləri kömək göstərirdi. Onların arasında Çexiyadan olan, öz ermənipərəst mövqeyi və anti-Azərbaycan çıxışları ilə tanınmış məşhur deputat Yaromir Ştetina da olub.
Brüsseldə Azərbaycan Prezidentinin səfəri ilə bağlı fitnəkar tədbir təşkil edilirsə və buna deyilən qurum dəstək verirsə, həmin görüşün ləğvi ən doğru addım olub. Yəqin ki, AP bundan sonra bu cür məqamlarla bağlı xüsusilə diqqətli olacaq".
Məhəmmədəli QƏRİBLİ