Günel Fərhadqızı: "Yəni yalnız bizim üçün mənfəətli olması baxımından bu işlər görülməyib"
Məlum olduğu kimi, Davos İqtisadi Forumunun rəsmi saytında İlham Əliyevin "Azərbaycanın 2017-ci il üçün iqtisadi prioritetləri" sərlövhəli məqaləsi verilib. Məqalədə iqtisadiyyatın müxtəlif sahələrində, o cümlədən enerji sahəsində qlobal əhəmiyyətli layihələrin icrasının ölkəmizin imkanlarını artırmaqla yanaşı, regional və beynəlxalq əməkdaşlığın inkişafı işinə də xidmət etməsi vurğulanır.
Sitat: "Bu baxımdan Azərbaycanın təşəbbüsü və liderliyi ilə icra olunan "Cənub Qaz Dəhlizi" layihəsi Azərbaycan qazını Avropa bazarlarına çatdırmaqla, Avropanın enerji təhlükəsizliyinin möhkəmləndirilməsinə də öz dəyərli töhfəsini verəcək. Layihə çərçivəsində "Şahdəniz-2" qaz-kondensat yatağının işlənməsi üzrə işlərin 87 faizi, Cənubi Qafqaz Boru Kəmərinin genişləndirilməsi üzrə işlərin 72 faizi, Trans-Anadolu Boru Kəmərinin (TANAP) inşası üzrə işlərin 60 faizi, Trans-Adriatik Boru Kəmərinin (TAP) inşası üzrə işlərin 30 faizi icra edilib. Qeyd etmək lazımdır ki, "Şahdəniz" yatağı təsdiq edilmiş qaz ehtiyatı ən azı 1,2 trilyon kubmetr olan dünyanın ən böyük qaz yataqlarından biridir".
Dəhlizin dörd komponentindən ikisi - "Şahdəniz-2"nin və Cənubi Qafqaz Boru Kəmərinin işlənməsi az qala başa çatmaq üzrədir. 87 və 72 faiz işlər arxada qalıb. Bu iki elementin birbaşa Azərbaycanın özünə bağlı olması və işlərin belə yüksək görülməsi ciddi nəticələr çıxarmağa əsas verir.
Göründüyü kimi, Prezident Azərbaycanın transmilli layihələrdə üzərinə düşdüyü öhdəliyi hansı şəkildə yerinə yetirdiyini faiz nisbətində rəqəmlərlə ifadə edib. Burdan o nəticəyə gəlmək olarmı ki, Azərbaycan beynəlxalq öhdəlikli layihələrdə üzərinə düşən məsuliyyətə daha ciddi yanaşır və işləri böyük həvəslə icra edir?
İqtisadçı Günel Fərhadqızı qəzetimizə açıqlamasında bildirdi ki, ölkə başçısının Davos İqtisadi Forumunun saytında dərc edilmiş məqaləsi həcmcə qısa olsa da, məzmunca əhatəlidir: "Təbiidir ki, məqalənin mövzusu Forumun profilinə uyğun seçilib. Yəni iqtisadi aspektləri əhatə edir. Ölkə başçısı qısa şəkildə Azərbaycanın iqtisadi uğurlarını və yaranmış çətinliklərdən hansı yolla çıxa biləcəyimizi izah edib. Bəli, məlum məqalənin giriş hissəsində ölkə başçısı Azərbaycanın beynəlxalq layihələrdə üzərinə düşən öhdəlikləri necə icra etməsindən söz açıb. Ancaq göstərilən rəqəmlərlə bağlı bir araşdırma apardıqda maraqlı mənzərə üzə çıxır. Görünür ki, ölkəmiz həmin layihədə iştirak edən ölkələrin hamısını görülən işlərin həcminə görə üstələyir. Həmin sırada elə ölkələr var ki, iqtisadi imkanları bizdən çox-çox genişdir. Deyilən layihələrin əhəmiyyəti isə Avropa ölkələri üçün daha çoxdur. Yəni yalnız bizim üçün mənfəətli olması baxımından bu işlər görülməyib. Bu, ölkəmizin beynəlxalq layihələrə nə dərəcədə məsuliyyətli yanaşdığının göstəricisidir. Azərbaycan üzərinə düşən digər istiqamətlərdə də analoji iş ortaya qoyur".
Məhəmmədəli QƏRİBLİ
