Qulu İsmayılov: "Forumun saytını biznes dairələri, investisiya qoyuluşu ilə maraqlananlar yaxından izləyir"
Davos İqtisadi Forumunun rəsmi saytında Azərbaycan Prezidenti İlham Əliyevin "2017-ci ildə Azərbaycan iqtisadiyyatının prioritetləri" adlı məqaləsi dərc olunub. Həmin məqalədən bəzi sitatları təqdim edirik:
"Azərbaycanın bugünkü uğurları son illər hərtərəfli, konkret və məqsədyönlü səylərin nəticəsidir.
Bu gün bizim iqtisadi siyasətimiz üçün prioritet qeyri-neft sektorunun inkişaf etdiyi bir vaxtda iqtisadiyyatın daha da şaxələndirilməsidir.
Bizim nailiyyətlərimiz hissolunan və görünəndir, amma biz də problemlərlə üzləşirik. Davam edən qlobal iqtisadi böhran Azərbaycan iqtisadiyyatına da təsirsiz ötüşməyib, gəlirləri azalıb və ötən il ərzində milli valyutanın 10.1 % devalvasiyasına gətirib çıxarıb. Buna baxmayaraq, biz uğurla müvafiq tədbirlər həyata keçirərək bu problemləri aradan qaldırırıq. Daha davamlı inkişafın təmin edilməsi üçün "Strateji yol xəritəsi" qəbul olunub; kompleks struktur, institusional, valyuta, maliyyə və digər islahatlar davam etdirilir; vergi və gömrük idarəetməsi yaxşılaşıb və bütün sahələrdə şəffaflıq təmin olunur. Məsələn, ötən ilin 10 ayı ərzində ticari dövriyyənin azalmasına baxmayaraq, gömrük yığımları 53 faiz artıb.
Azərbaycanın gücü təkcə onun iqtisadiyyatında deyil. Azərbaycan çoxmillətli ölkədir. Müxtəlif etnik qrup və konfessiyaların nümayəndələri burada əsrlər boyu sülh, qarşılıqlı anlaşma və dialoq şəraitində yaşayıb.
Mən əminəm ki, 2017 Azərbaycan üçün iqtisadi inkişaf ili olacaq. Biz səmərəli iqtisadi islahatlar həyata keçirməyi davam etdirəcəyik. Eyni zamanda, sosialyönümlü təşəbbüslər üçün xərcləri artıracağıq.
İqtisadiyyatımızın şaxələndirilməsi, demək olar ki, başa çatıb. Hazırda bizim ümumdaxili məhsulun 70 % -i qeyri-neft sənayesindən gəlir. Əsas hədəfimiz bu gün ixracın şaxələndirilməsidir. 2016-cı ildə görülən tədbirlər bu məqsədin həyata keçirilməsinə gətirib çıxaracaq. Artıq Azərbaycan Dünya İqtisadi Forumunun Qlobal Rəqabət İndeksində 37-ci yerdədir və biz bu uğurları möhkəmləndirmək əzmindəyik".
Belə nüfuzlu saytın İlham Əliyevin bu səpkili məqaləsinə yer verməsi nəyin göstəricisi sayıla bilər?
İqtisadçı Qulu İsmayılov qəzetimizə açıqlamasında bildirdi ki, İlham Əliyev Davos İqtisadi Forumunun işində daim yaxından iştirak edir: "Bu, dünyanın iqtisadi sahədə olan problemlərini, perspektivlərini həll edən bir nüfuzlu forumdur. Əsasən də iqtisadiyyat üzrə ixtisaslaşıb. Azərbaycanla Forum arasında çox sıx münasibətlər var. Bu, İlham Əliyevin həmin Forumun saytında yerləşdirilən ilk məqaləsi deyil. Mütəmadi şəkildə belə çıxışları olur. Həmin Forumun saytını biznes dairələri, investisiya qoyuluşu ilə maraqlananlar yaxından izləyir. Bu baxımdan da olduqca önəmli auditoriyaya malik bir sayt sayılır.
Bilirsiniz ki, ötən il Azərbaycan iqtisadiyyatı üçün böhranlı hesab edildi. Bunun da bizdən asılı olmayan obyektiv səbəbləri var. Dünya iqtisadiyyatında baş verən tənəzzülün bizdən də yan keçməməyinin başlıca səbəblərindən biri də əsas ixrac məhsulumuz olan neftin qiymətinin kəskin ucuzlaşması oldu. Ölkə rəhbərliyi səviyyəsində bəyan edilib ki, böhrandan çıxışın başlıca yollarından biri qeyri-neft sektorunun inkişafından keçir. Artıq bu istiqamətdə ciddi fəaliyyətə başlanıb. "Strateji yol xəritəsi" deyilən çox ciddi sənəd hazırlanıb. Həmin sənəddə əks olunan müddəaların işləkliyi təmin olunsa, böyük uğurlar qazanıla bilər. 2017-ci ildə qeyri-neft sektorunun inkişafına nail olmağı istərdik ki, iqtisadiyyatımızın ixrac potensialı artsın, ərzaq təhlükəsizliyimiz tam təmin edilsin. İlham Əliyevin məqaləsində bu problemlər, ondan çıxış yolları detallı şəkildə izah edilir. Çox uğurlu bir iş sayıla bilər".
Məhəmmədəli QƏRİBLİ
