Zakir Əhmədov: "Bu meyar qubernatorlar arasında rəqabəti artıracaq və nəticədə ölkə inkişaf edəcək"
Rusiya prezidenti Vladimir Putin Kreml Dövlət Sarayının Georgiyevsk zalında 13-cü dəfə Federal Məclisə illik müraciətini etdi. 600-dən çox yerli və xarici KİV nümayəndəsi, 1000 nəfərdən çox qonağın qatıldığı tədbirdən öncə jurnalistlərə Böyük Kreml Sarayının Andreyevski və Malaxitovıy zallarında tədbirə gələn yüksək çinli qonaqlar, senatorlar, deputatlar və nazirlərdən müsahibə götürmək, açıqlama almaq imkanı yaradıldı.
Builki müraciət Rusiya prezidentinin daha çox daxili auditoriyaya ünvanlanan, ölkənin iqtisadi inkişafı, korrupsiyaya qarşı mübarizə və sosial problemlərlə bağlı mesajları ilə yadda qaldı. Ötənilki müraciət isə Putinin Türkiyə üçün söylədiyi "canını pomidorla qurtara bilməyəcək" ifadəsi ilə xatırlanır. Putin çıxışının sonunda son iki il ərzində ölkəsinə qarşı Qərbin tətbiq etdiyi sanksiyalar barədə danışıb. Həmin sanksiyaların Rusiyanı daha da gücləndirdiyini bəyan edib.
Prezident qeyd edib ki, bu gün birinci planda inkişaf durur: "Rusiyanın gələcəyi ancaq bizdən, vətəndaşlarımızın istedadından və əməyindən, məsuliyyətindən və uğurlarından asılıdır. Biz qarşımıza qoyduğumuz bütün məqsədlərə çatacağıq. Bu gün və sabahın tapşırıqlarını yerinə yetirəcəyik".
Rusiya prezidenti Vladimir Putin Federal Məclisə illik müraciətində məmurlara qəzəblənib. Onları kabinetlərində gizlənmək əvəzinə, vətəndaşlarla açıq və dürüst dialoq aparmağa çağırıb: "Əksəriyyətinizə bir daha müraciət edirəm - xidməti kabinetlərinizdə gizlənməyin! İnsanlarla dialoqdan qorxmayın, onların görüşünə gedin. Vətəndaşlarla açıq və dürüst olun, təşəbbüslərini dəstəkləyin".
Putin, həmçinin, qubernatorların işinə veriləcək qiymət meyarını da açıqlayıb. O bildirib ki, bu məsələdə qubernatorların rəhbərlik etdiyi regiona nə qədər həcmdə investisiya cəlb etməsi əsas olaraq götürüləcək.
Qeyd edək ki, bu tezisi bir müddət əvvəl ilk dəfə Prezident İlham Əliyev icra başçılarının işinə veriləcək qiymətləndirmə meyarı ilə bağlı irəli sürüb və qeyd edib ki, onlar rəhbərlik etdiyi rayonlara investisiya cəlbi barədə düşünməlidir. Cənab İlham Əliyev birmənalı deyib ki, icra hakimiyyəti başçılarının fəaliyyətinə qiymət onların həmin bölgələrə hansı səviyyədə investisiya cəlb edəcəklərindən asılı olaraq veriləcək.
Prezident Administrasiyası (PA) rəhbərinin müavini, PA-nın Regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyevin 26 iyunda verdiyi açıqlamaya diqqət edək. Şöbə müdiri jurnalistlərə açıqlamasında bildirib ki, bundan sonra icra başçılarının fəaliyyətinə, bacarığına qiymət verilərkən əsas meyar kimi onların Prezidentin tapşırıqlarına nə dərəcədə əməl etməsilə yanaşı, rəhbərlik etdikləri rayonlara nə qədər yerli və xarici investor cəlb etmələri olacaq.
Rusiyanın da müraciət etdiyi Azərbaycanın bu modeli, sözsüz ki, effektivlik gücünə malik olduğu üçün diqqət cəlb edir.
Ekspert Zakir Əhmədov qəzetimizə açıqlamasında bildirdi ki, bu təşəbbüs doğrudan da ilk dəfə İlham Əliyev tərəfindən irəli sürülüb: "Regionlara investisiya cəlbi ilə bağlı icra başçılarına sərbəstliyin verilməsi çox gözəldir. Bu o deməkdir ki, ortada ən yüksək səviyyədə siyasi iradə var. Bunun bir sıra müsbət tərəfləri mövcuddur. Belə olan təqdirdə, həmin rayonların özünü maliyyələşdirmə problemi həllini tapır. Çoxlu sayda iş yerləri açılır. Rayonlara investisiya cəlb olunması tam mümkündür. Bunun üçün bazarda rəqabət mühiti yaratmaq lazımdır. Bu mühit yaradılsa, həmin rayonlara hansısa formada investisiya cəlb etmək mümkündür. Təşəbbüslər bazardan, iş adamlarından gəlməlidir, dövlət təsisatlarından gəlməli deyil. Rəqabət mühiti olarsa, hər bir investor yeni layihələrlə çıxış edə bilər, həmin investisiya mühiti də formalaşar. Həmin şərtlər yerinə yetirilməsə, problemi həll etmək mümkün olmayacaq. Rusiyanın bu təcrübəyə müraciət etməsi bizdən sonra olub. Yaxşı işlərdən örnək əldə etmək pis deyil. Deyərdim ki, bu sahədə Rusiyanın şansları daha çoxdur. Çünki onların regionları çox böyük və təbii ehtiyatlarla zəngindir. Müstəqil investisiya cəlbi onlar üçün problem olmayacaq. Rusiyanın elə regional idarəetmə subyekti var ki, ərazisi 4 dəfə Azərbaycandan böyükdür. Bu meyar qubernatorlar arasında rəqabəti artıracaq və nəticədə ölkə inkişaf edəcək".
Məhəmmədəli QƏRİBLİ