Vüqar Qədirov: "Ancaq təəssüflər olsun ki, Rusiya belə üstün mövqeyindən istifadə edib problemin həllinə hansısa töhfə vermir"
Rusiya xarici işlər naziri Sergey Lavrov Türkiyə-Rusiya Federasiyası Ortaq Strateji Planlaşdırma Qrupunun 5-ci iclasında iştirak etmək üçün dekabrın 1-də Türkiyənin Antalya şəhərində səfərdə olub.
Rusiyalı həmkarı ilə görüş zamanı Mövlud Çavuşoğlu Suriya, İraq və Aralıq dənizi məsələlərində Tükiyə-Rusiya əməkdaşlığının xüsusi əhəmiyyət daşıdığını açıqlayıb. "Suriyada vəziyyət göz qabağındadır. Bu ölkəyə humanitar yardım edilməlidir" - deyə o əlavə edib.
Türkiyənin xarici işlər naziri, həmçinin, iki ölkə arasında iqtisadi əlaqələrin inkişafında "Türk axını" qaz layihəsi və Akkayu nüvə stansiyanın vacib rol oynadığını vurğulayıb.
"Türkiyə və Rusiya arasında əməkdaşlığın inkişafı bütün regiona müsbət təsir göstərəcək. Biz Lavrovla əməkdaşlıq məsələlərini müzakirə etdik", - deyə Çavuşoğlu bildirib.
Mövlud Çavuşoğlu Sergey Lavrovla keçirdiyi mətbuat konfransında bildirib ki, Türkiyə Rusiyanın Dağlıq Qarabağ münaqişəsinin sülh yolu ilə nizamlanması prosesindəki vasitəçiliyini müsbət qiymətləndirir. O qeyd edib ki, Türkiyə Rusiyanın Dağlıq Qarabağ münaqişəsinin həllində aparıcı roluna hörmətlə yanaşır.
Türkiyənin Dağlıq Qarabağ probleminin nizama salınmasında Rusiyanın roluna bu dərəcədə açıq önəm ifadə etməsi nədən irəli gəlib?
Politoloq Vüqar Qədirov qəzetimizə açıqlamasında bildirdi ki, əslində, Türkiyənin xarici işlər naziri bu mövzuda həqiqəti ifadə edib: "Diplomatiyada çox vaxt hər bir detal öz adı ilə çağırılmır. Daha çox pərdələnmiş və ütülü ifadələrdən istifadə olunur ki, onların da vasitəsilə sətraltı mənalara diqqət yetirilir. Dağlıq Qarabağ probleminin nizama salınması ilə bağlı təsir imkanlarına Rusiya daha çox malikdir. Bu danılmazdır. Çünki həmin nəhəng atom ölkəsi konfliktin cərəyan etdiyi məkana çox yaxındır. Eyni zamanda, münaqişə tərəflərindən biri onun əlaltısıdır. Bunu hamı gözəl dərk edir. Üstün mövqe deyəndə Çavuşoğlu bunları nəzərdə tutub. Türkiyə bizimlə bu məsələdə həmfikir olsa da, problemin nizama salınmasına təsir gücünə malik deyil. Çox güman ki, Rusiya ilə yaxınlaşması fonunda prosesə maksimum təsir imkanları axtarır. Rusiyaya rəğbət və ona verilən dəyərin daha açıq mətnlə ifadəsinə səbəb olan başqa məqam hazırda mənfi istiqamətdə cərəyan edən Qərb-Türkiyə münasibətlərinə bağlıdır. Türkiyə bu cür mövqeyilə həm də Qərbə bir mesaj vermiş olur. Ancaq təəssüflər olsun ki, Rusiya belə üstün mövqeyindən istifadə edib problemin həllinə hansısa töhfə vermir. Bu nəticənin əldə olunmasına çalışmaq lazımdır".
Məhəmmədəli QƏRİBLİ