Xəzər Teyyublu: "Həmin faciəni törədən erməni cinayətkarları Ermənistanda və Rusiyada yaşayır"
Milli Məclisdə "Soyqırımı və etnik təmizləmə cinayətlərinin dünya səviyyəsində tanınmasının hüquqi aspektlərinin öyrənilməsi" layihəsinin təqdimatı keçirilib.
Tədbirdə çıxış edən Milli Məclis sədrinin müavini Bahar Muradova Azərbaycanda Xocalı soyqırımına hüquqi qiymət verilməsi ilə bağlı yeni qanun layihəsinin hazırlandığını bildirib. B.Muradova deyib ki, Dağlıq Qarabağda cinayətlər törədən şəxslərin məsuliyyətə cəlb olunmasında məhdudiyyətlər mövcuddur və bu aradan qaldırılmalıdır. Qanun layihəsi Xocalı soyqırımının 25 illiyində ictimaiyyətə təqdim olunacaq. Layihə Xocalı soyqırımını törədənlərin cinayət əməllərinə hüquqi qiymətin verilməsinə imkan yaradacaq. Layihə ilə bağlı hazırlıq işlərinə noyabrın 20-də başlanıb.
Milli Məclisin Hüquq siyasəti və dövlət quruculuğu komitəsinin sədri Əli Hüseynli qanun layihəsinin hazırlanmasının vacibliyini qeyd edib.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, deputat Azay Quliyev bildirib ki, qanun layihəsinin hazırlanmasında əsas məqsəd ədalət mühakiməsinin təşkil olunmasıdır.
Bu qanun layihəsinin qüvvəyə minməsi Xocalı faciəsinin dünyaya tanıdılmasında hansı rola malik olacaq?
Klassik Xalq Cəbhəsi Partiyasının sədr müavini Xəzər Teyyublunun sözlərinə görə, beynəlxalq təcrübədə belə hallar mövcuddur: "Bu qanunun fundamental bazası var. İlk növbədə bu, inkişaf etmiş dövlətlərdə mövcud olan qanunların öyrənilməsi, beynəlxalq cinayət tribunalları və məhkəmələrinin presedentlərinin öyrənilməsindən ibarətdir. İnsanlıq əleyhinə cinayətlərə həsr olunmuş yeni bir konvensiyanın qəbul olunması çox mühüm hadisədir. Bu konvensiyanın qəbulu beynəlxalq hüquqdakı boşluğun aradan qaldırılmasıdır. Beynəlxalq cinayət deyərkən təcavüz, insanlıq əleyhinə cinayətlər, hərbi cinayətlər, soyqırım və hələ beynəlxalq cinayət kimi heç bir sənəddə adı keçməyən etnik təmizləmədən bəhs olunur. Terrorçuluq isə beynəlxalq cinayət deyil, transmilli cinayətlər sırasına aid edilir. Etnik təmizləmə cinayəti heç bir dövlətin qanunvericiliyində öz əksini tapmayıb.
Bəli, biz gecikmişik. Həmin faciəni törədən erməni cinayətkarları Ermənistanda və Rusiyada yaşayır. Azərbaycan Rusiya ilə imzaladığı sazişə istinad edərək bu cinayətkarların Azərbaycana təhvil verilməsinə nail olmalıdır. Xocalı soyqırımında Rusiyanın 366-cı alayı iştirak edib. Ancaq biz heç yerdə bunu tələb etmirik. Azərbaycan Xocalı soyqırımı ilə bağlı məhkəmə prosesinə başlasa, dünyada böyük əks-sədası olar".
Məhəmmədəli QƏRİBLİ