Akif Nağı: "Lazım gəlsə, Fransanın Səfirliyi qarşısında piket də keçirəcəyik"
"Fransa-Qarabağ" dostluq dərnəyinin üzvlərinin Azərbaycanın işğal olunmuş ərazilərinə səfəri olub. Onların arasında Fransa parlamentinin üzvü də var.
Bu icasəsiz və qanunsuz səfərlə bağlı Xarici İşlər Nazirliyinin Mətbuat xidmətinin rəhbəri Hikmət Hacıyev bildirib ki, "Fransa-Qarabağ" dostluq dərnəyi heç bir rəsmi statusa malik olmayan və tanınmayan özfəaliyyət qrupudur: "Bu dərnəyin sıralarında Fransa erməni lobbisinin üzvləri və eləcə də erməni lobbi dairələrinin tam təsiri altında olan şəxslər təmsil olunur".
XİN rəsmisi həmçinin qeyd edib ki, bu səfərdə iştirak edən Jak Remilin adı artıq arzuolunmaz şəxslər siyahısındadır: "Nəzərə almaq lazımdır ki, Fransada gələn il parlament və prezident seçkiləri keçiriləcək. Bəzi parlamentarilər seçkilərdə Fransa erməni lobbisinin maliyyə və siyasi dəstəyini qazanmaq naminə bu kimi təxribatçı və qərəzli addımlardan, o cümlədən Azərbaycanın işğal olunmuş ərazilərində hərbi təcavüz və qanlı etnik təmizləmənin nəticəsində yaradılmış qondarma kriminal rejimin təbliğindən belə çəkinmir. Erməni lobbisi də öz çirkin məqsədləri naminə şantaj və təzyiq vasitəsilə bu kimi şəxsləri öz siyasi alətinə çevirir. Fransa hökumətinin Ermənistan-Azərbaycan münaqişəsinin həlli ilə əlaqədar mövqeyi birmənalı və aydındır. ATƏT-in Minsk Qrupunun həmsədrlərindən biri kimi Fransa beynəlxalq səviyyədə tanınmış sərhədləri daxilində Azərbaycanın ərazi bütövlüyü və suverenliyini dəstəkləyir və münaqişənin danışıqlar yolu ilə həllinə çalışır. Azərbaycan və Fransa arasında bütün sahələrdə, o cümlədən qanunverici orqanlar səviyyəsində əməkdaşlıq və dostluq əlaqələri inkişaf edir".
Görəsən ictimaiyyət nümayəndələri fransalıların qondarma qurumla təmas qurub ora səfər etməsinə necə yanaşır?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, bu hal onları dərindən narahat edir: "Fransa birinci dəfə deyil ki, belə xoşagəlməz hallara yol verir. Dəfələrlə bizim və dövlət səviyyəsində məsələyə reaksiya verilib. Fransaya hətta məktub da göndərmişik. Hər dəfə də belə təşəbbüsə qoşulanlar yoxdur. Bütün səfərlər könüllü edilir. Ancaq biz hesab edirik ki, hərbi kriminal rejimin nəzarəti altında olan Dağlıq Qarabağa Azərbaycandan xəbərsiz səfər etmək olmaz. Belə hallar olan kimi, həmin adamların adı "qara siyahı"ya salınır. Hesab edirəm ki, bu cür halların yaşanması eyni zamanda Fransanın neytralitetinə də şübhə salır. Azərbaycan hökuməti mütləq Fransaya etirazını bildirməlidir. Həmin müraciətə veriləcək cavaba uyğun olaraq biz öz hərəkətimizi tənzimləyəcəyik. Lazım gəlsə, Fransanın Səfirliyi qarşısında piket də keçirəcəyik".
Məhəmmədəli QƏRİBLİ