Qabil Hüseynli: "Bu tip münaqişənin həllində mütləq bir beynəlxalq orbitr olmalıdır"
"Bütün münaqişələr dövlətlərin ərazi bütövlüyü çərçivəsində həll edilməlidir". Bu sözləri Strasburqda keçirilən Avropa Şurası Parlament Assambleyasının (AŞPA) payız sessiyasının ilk iş günündə qurumun sədri Pedro Aqramunt deyib.
Ukraynadakı vəziyyətdən danışan AŞPA sədri bütün üzv dövlətlərdəki münaqişələrin həll edilməsinin vacibliyini vurğulayıb: "Dövlətlərin sərhədləri güclə deyil, yalnız ikitərəfli razılıq əsasında dəyişilə bilər.
Ukraynada baş verən münaqişə, Krımın ilhaq olunması, eyni zamanda, Gürcüstan, Moldova və Azərbaycandakı münaqişə qəbuledilməzdir. Avropalı olaraq, biz yaşadığımız ümumi məkanımızda baş verən münaqişələri həll etməliyik və burada parlament diplomatiyası siyasi danışıqları ruhlandırmaq istiqamətində adekvat vasitədir. Biz bizi ayıran fərqli fikirləri müzakirə edərək, bunu burada qarşı-qarşıya oturub çəkinmədən etməli, birlikdə çıxış yolları tapmalıyıq".
Göründüyü kimi, AŞPA sədri münaqişənin həll edilməsinə töhfə verə biləcək yeni bir format adı səsləndirir. Bu məsələdə parlament diplomatiyası adekvat vasitə kimi hansı rolu oynaya bilər?
Politoloq Qabil Hüseynli qəzetimizə açıqlamasında bildirdi ki, Pedro Aqramuntun səsləndirdiyi fikir Rusiyaya təsir üçün nəzərdə tutulub: "Hesab edirəm ki, bu cür konfliktlərin əksəriyyətinin açarı Rusiyanın əlindədir. Qərb ona təsir edə bilmədiyi üçün müxtəlif yeni vasitələrdən istifadə edir. Bu da bir vasitədir. Münaqişənin həllinə birbaşa təsir edə bilməsə də, beynəlxalq ictimai rəyə təsiri ola bilər. Yəni təbliğat baxımından. Dəfələrlə vurğulamışıq ki, bu tip münaqişənin həllində mütləq bir beynəlxalq orbitr olmalıdır. Söhbət güclü orbitrdan gedir. Təklif olunan yeni model xalq diplomatiyasına bənzərdir. Yəni tərəflərin parlament səviyyəsindəki fəallığının artırılmasını istəyirlər. Görürsünüz ki, ölkə başçısının özü də deyir ki, proseslə bağlı bizə beynəlxalq dairələr tərəfindən təzyiqlər olur. Vəziyyət belə olduğu təqdirdə parlament diplomatiyası nəyi həll edə bilər ki? Zənnimcə, bu, münaqişənin həllinə deyil, daha çox tərəflər arasında sülhə nail olmağa yönələn addımdır".
Məhəmmədəli QƏRİBLİ