Qulu İsmayılov: "İslahatların Nazirlər Kabinetindən başlayacağı gözlənir"
Azərbaycan Prezidentinin ictimai-siyasi məsələlər üzrə köməkçisi Əli Həsənov bildirib ki, ölkədə islahatların növbəti mərhələsi başlayacaq: "Postneft dövrünün reallıqları dövlətdən daha çevik siyasət həyata keçirilməsini və bir sıra islahatların aparılması zərurətini yaradır. Bunu nəzərə alan Prezident İlham Əliyev xalqın iradəsinə müraciət etdi və bu islahatlar üçün xalqın dəstəyini aldı".
Əli Həsənovun sözlərinə görə, referendumdan sonrakı müəyyən prosedurlar bitəndən sonra bu islahatların həyata keçirilməsinin növbəti mərhələsi başlayacaq. 2016-cı il Azərbaycanda iqtisadi islahatlar ilidir. Bu islahatlarla bağlı artıq yol xəritəsi müəyyən edilib. Buna müvafiq olaraq da iqtisadi idarəçiliyin effektivləşdirilməsi, daha optimallaşdırılması və postneft dövründə Azərbaycanın davamlı inkişafının təmin olunması işləri başlanıb.
Əli Həsənov referendumun nəticələrinə beynəlxalq reaksiyalara da münasibət bildirib. Dövlət rəsmisi deyib ki, referendum özlüyündə ən böyük demokratik hadisələrdən biridir. Taleyüklü məsələlərdə xalqın iradəsini soruşmaq özü bir demokratiya göstəricisidir: "Azərbaycan xalqının iradəsini Prezident İlham Əliyev soruşdu. Bu iradə nədən ibarət idi? Azərbaycan xalqı referenduma çıxarılan məsələlərdən əvvəlcədən tanış idi. Bunun üzərində Azərbaycan dövləti üçün nə bir rəy, nə bir iradə yoxdur".
Əli Həsənovun anonsunu verdiyi islahatlar özündə nəyi ehtiva edir?
İqtisadçı Qulu İsmayılov qəzetimizə açıqlamasında bildirdi ki, referendumdan sonra hökumətin ciddi islahatlara gedəcəyi söylənir: "İslahatların Nazirlər Kabinetindən başlayacağı gözlənir. Çünki bu günə qədər islahatlara əngəl olan qurum məhz Nazirlər Kabineti oldu. Sirr deyil ki, Nazirlər Kabineti islahatların lokomotivinə çevrilə bilmədi. Hesab olunur ki, hakimiyyət daha çevik islahatlar aparmaq üçün vitse-prezidentlik institutundan yararlanacaq. Konstitusiyada dəyişikliklər və vitse-prezidentlik postunun yaradılması da buna hesablanıb.
Görünən odur ki, islahatların aparılması hökumətin marağında olan məsələdir. Əks halda, hökumət rəsmiləri bu haqda belə inamla danışmazdı. Uzun zamandır, xüsusilə də ölkədə baş verən ağır böhrandan sonra islahatların aparılması müzakirə olunur. Ancaq hələ dərin islahat aparılmayıb. Bəzi dövlət qurumları ləğv olunub, əvəzində başqaları yaradılıb. Bu islahatın effekti o qədər böyük olmayıb. Daha əsaslı islahatlara ehtiyac var.
Bu dəfə isə mənzərə tamamilə fərqlidir. Hər kəsə məlumdur ki, ölkədə bəzi yüksək vəzifə sahibi olan insanlar böyük gücə çevrilib. Onları birdən-birə istefaya göndərmək çox radikal yanaşma olardı, hətta müəyyən gərginlik yarada bilərdi. Referendum bütün bu kimi problemlərin aradan qaldırılmasını təmin etdi. Artıq islahat proqramı tam hazırdır və yaxın zamanda islahatların aparılması reallaşacaq. Bu mexanizm gömrük və vergi sahəsini də əhatə edəcək. Xüsusilə də yerli istehsalın stimullaşdırılması istiqamətində mühüm addımlar atılacaq. Əsasən də istehsalın artmasına fikir veriləcək".
Məhəmmədəli QƏRİBLİ