Bu gün Azərbaycanın sosial, siyasi və iqtisadi sahədə nə qədər inkişaf yolu keçdiyi göz qabağındadır. Azərbaycan bu gün dünyaya özünün inkişaf modelini təqdim edir.
Trend-in məlumatına görə, bunu Azərbaycan Prezidenti Administrasiyası rəhbərinin müavini, Xarici əlaqələr şöbəsinin müdiri Novruz Məmmədov bu gün “Azərbaycanın qlobal və regional arenada rolu: Reallıqlar və perspektivlər” mövzusunda Azərbaycanın müstəqilliyinin bərpasının 25 illiyinə həsr edilmiş konfransda deyib.
N.Məmmədov bildirib ki, beynəlxalq təşkilatlar da Azərbaycanın inkişafını yüksək qiymətləndirir: “Hazırda Azərbaycan "qara qızıl"ı insan kapitalına çevirmək yolu ilə gedir. Təhsilə, müasir texnologiyalara qoyulan investisiyalar artırılır, iqtisadiyyatın diversifikasiya edilməsi istiqamətində addımlar atılır. Azərbaycan öz peykini artıq orbitə buraxıb”.
PA rəsmisi qeyd edib ki, Azərbaycan milli maraqlara əsaslanan daxili və xarici siyasət aparır: “Prezident İlham Əliyevin dediyi kimi, Azərbaycan yeganə ölkələrdəndir ki, həm Avropa Şurasının, həm də İslam Əməkdaşlıq Təşkilatının üzvüdür. Azərbaycanın BMT Təhlükəsizlik Şurasına müvəqqəti sədrlik etməsi mühüm hadisə idi. Azərbaycana bu etimadın göstərilməsi sübut etdi ki, ölkəmiz həm regionda, həm də beynəlxalq aləmdə öz siyasətinə görə rəğbətlə qarşılanır. Azərbaycan kiçik dövlət olsa da, beynəlxalq sülhün və sabitliyin təmin olunması üçün beynəlxalq antiterror koalisiyasının fəal üzvüdür. Ölkəmiz, eyni zamanda regionda mühüm əhəmiyyət daşıyan üçtərəfli əməkdaşlıq formatlarının təşəbbüskarıdır. Azərbaycan-İran-Rusiya, Azərbaycan-Türkiyə-Gürcüstan və digər formatlar həm regionda, həm də dünyada sülhün və sabiliyin təmin edilməsi üçün əhəmiyyətli formatlardır”.
N.Məmmədov əlavə edib ki, dünyada bu gün beynəlxalq hüquqa hörmət unudulub: “SSRİ və Varşava sistemləri dağılandan sonra böyük dövlətlər beynəlxalq hüququ unudub. Özlərinə lazım olanda yadlarına düşür. Bu isə təhlükəli tendensiyadır”.
N.Məmmədov əlavə edib ki, Azərbaycan dünyada enerji məsələlərində də mühüm rol oynayır: “Azərbaycan eyni zamanda, müxtəlif sivilizasiya və mədəniyyətlərin irsini qoruyub saxlayır. Azərbaycan şərqdə ilk dəfə qadınlara səs vermək hüququ verib. Ölkəmiz bu sahədə hətta Avropa dövlətlərindən də qabaqdadır. Azərbaycan həmçinin dünya üçün mühüm məsələlərin müzakirə edildiyi beynəlxalq konfranslar, sammitlər, konfranslar keçirir”.
N.Məmmədov deyib ki, Dağlıq Qarabağ münaqişəsinin davam etməsi regionda sülh və inkişaf üçün ən böyük maneədir. N.Məmmədov bildirib ki, münaqişənin həll edilməsinin hüquqi əsasları BMT və digər beynəlxalq təşkilatlar tərəfindən qəbul edilən qərar və qətnamələrdə təsbit olunub: “Bütün bu sənədlərdə Azərbaycanın suverenliyi və ərazi bütövlüyü dəstəklənir və tanınır. Ancaq əfsuslar olsun ki, son 10 ildə beynəlxalq hüquq yalnız sənəd olaraq qalır”.
PA rəsmisi qeyd edib ki, bu gün mövcud olan beynəlxalq birlik daxilində gərginlik beynəlxalq hüquqa riayət edilməməsinin nəticəsidir:
"İş o yerə çatıb ki, dünyanın superdövləti olan ABŞ-ın dövlət katibi dünyaya mesaj verir ki, guya liderlər münaqişənin həllinə hazır deyil. ATƏT-in Minsk qrupunun həmsədrləri indiyə qədər hansı məntiqli variantı irəli sürüblər ki, Azərbaycan onunla razılaşmayıb? Azərbaycanın Dağlıq Qarabağ ətrafındakı 7 rayonu niyə azad edilmir? Yüz minlərlə insanın yaşamış olduğu bu 7 rayonun azad edilməsi üçün bu böyük dövlətlər hansı addımları atıblar? Həmsədrlərin ötən illərdə düşünüb tapdığı yol odur ki, Azərbaycan və Ermənistan özləri razılığa gəlsin. Bu, Azərbaycana ədalətsiz, ikili standartlara əsaslanan münasibətin təzahürüdür. Ermənistan iddia edir ki, Azərbaycan kompromislərə hazır deyil. Ermənistan bunu dedikdə, Dağlıq Qarabağın bütövlükdə Ermənistana verilməsini nəzərdə tutur. Con Kerrinin bəyanatı daha çox Ermənistanın bu mövqeyinə bənzəyir. ABŞ-ın müvafiq qurumları Con Kerrinin bəyanatları ilə bağlı müvafiq izahat verməlidir. Ermənistan münaqişənin həllinin uzadılmasına çalışır və belə bəyanatlar da buna əsas verir".
N.Məmmədov əlavə edib ki, Dağlıq Qarabağ münaqişəsindən danışan zaman Xocalı soyqırımını kənara qoymaq olmaz: "Ermənistan olmayan soyqırımı dünyaya guya həqiqətən törədilmiş soyqırım kimi təqdim etməyə çalışır. Ancaq Xocalı soyqırımı ötən əsrdə törədilmiş son soyqırımdır. Dünyanın bir çox ölkələri, o cümlədən ABŞ-ın bir sıra ştatları Xocalı soyqırımını tanıyıb".
O, qeyd edib ki, ABŞ dövlət katibi Con Kerrinin liderlərin Dağlıq Qarabağ münaqişəsinin həllinə hazır olmadığı barədə bəyanatı Azərbaycanı təəccübləndirir və məyus edir. N.Məmmədov bildirib ki, münaqişənin tənzimlənməsində iştirak edən superdövlətin dövlət katibinin hakimiyyətdən getmə və seçki ərəfəsində belə bir bəyanat verməsi təəccüb doğurur: "Bunun qəribə bir mənası var, sanki dünyaya bir mesajdır. Məhz Ermənistan münaqişənin tənzimlənməsi ilə bağlı danışıqlarda liderlərin münaqişənin həllinə hazır olmadığını iddia edir. Tutaq ki, danışıqlarda tarixi Azərbaycan torpağı olan Dağlıq Qarabağla bağlı fikir mübadiləsi aparılır. Bəs Azərbaycanın Dağlıq Qarabağ ətrafında olan və 760 minə qədər insanın məcburi köçkün həyatı yaşamasına səbəb olan 7 rayonunun 25 ildən artıq işğal altında qalmasını nə ilə izah etmək olar? Əgər Ermənistan bu 7 rayonu azad edəcəksə, buna bir hazırlıq lazım deyilmi? Bunun üçün isə əsas missiya ABŞ da daxil olmaqla, ATƏT-in Minsk qrupunun 3 üzvünə verilib. Ancaq hələ bu sahədə çox böyük uğur əldə olunmayıb".
PA rəsmisi qeyd edib ki, Ermənistan işğalçı bir dövlətdir: "ABŞ da Azərbaycan torpaqlarının azad edilməsi üçün BMT Təhlükəsizlik Şurasında 4 qətnamənin qəbuluna səs verib. Bununla bağlı bir çox beynəlxalq təşkilatlarda qətnamələr və qərarlar qəbul edilib. ATƏT-in Minsk qrupuna üzv olan 3 dövlətin prezidentləri də status-kvonun dəyişməli olduğunu bəyan ediblər. Bütün bunları əsas götürüb, heç olmasa, Azərbaycanın Dağlıq Qarabağ ətrafında 7 rayonunun azad edilməsi haqqında bir cümlə deyə, mövqe bildirəydilər, sonra deyəydilər ki, liderlər münaqişənin həllinə hazır deyillər. Ona görə də Azərbaycan Con Kerrinin bəyanatını qəbul etmir. İstərdik ki, ABŞ-ın hansısa dövlət qurumu ətraflı, hamının başa düşəcəyi tərzdə Con Kerrinin bəyanatına aydınlıq gətirsin".