"Çünki ölkəmiz bir marşrutla deyil, çoxşaxəli istiqamətlər üzrə ixraca üstünlük verir"
"Balkan" qazpaylayıcı mərkəzi üçün nəzərdə tutulmuş Rusiya qazının nəqli ilə bağlı danışıqların aparılması üçün Rusiya-Bolqarıstan-Avropa İttifaqı üçtərəfli görüşünün keçirilməsi vacibdir. "APA-Economics" xəbər verir ki, bu barədə Bolqarıstanın baş naziri Boyko Borisov bildirib.
"Biz ölkəmizə qaz nəql etmək istəyən hər bir tərəflə danışıqlar aparmağa hazırıq. Bu cür layihələr Bolqarıstandan yan keçə bilməz. Biz regional enerji mərkəzinə çevrilmək niyyətindəyik və bu şansı qaçırmayacağıq. Biz "Cənub axını" layihəsindən Ukrayna münaqişəsi səbəbindən imtina etdik və nə itirdiyimizi gözəl anlayırdıq. İndi isə biz üçtərəfli formatda danışıqlara hazırıq. Üçtərəfli formatda iştirak edən tərəflərdən ikisi Bolqarıstan və Avropa İttifaqıdır. Üçüncü tərəf isə Azərbaycan, Rusiya və Türkmənistan ola bilər. Hər şey onların istəyindən asılıdır. Bolqarıstan layihənin uzunmüddətli olacağına zəmanət verir. Lakin Avropa İttifaqı da bir tərəf kimi öz zəmanətlərini verməlidir", - deyə baş nazir qeyd edib.
Bolqarıstanın baş nazirinin Azərbaycana Aİ ilə üçtərəfli formatda qaz danışığı təklif etməsinə necə yanaşmaq olar?
Ekspert Ənvər Fərəcov qəzetimizə açıqlamasında bildirdi ki, Avropa ölkələrinin ayrı-ayrılıqda özləri üçün qaz tədarükünə çıxması çox normaldır: "Avropa ölkələrinin hər zaman təbii qaza və enerji daşıyıcılarına ehtiyacı olub. Onların ən böyüq qaz təminaçısı isə Rusiya olub. Sonradan Rusiya bu vasitədən təzyiq elementi kimi istifadə etməyə başladı. Bunun da nəticəsində Avropanın əksər ölkələri əziyyətlərə qatlaşmalı oldu. Rusiyaya tətbiq olunan sanksiyalardan sonra bu vəziyyət daha da kritik hal aldı. Artıq Avropanın bəzi ölkələri anlayıb ki, bu məsələnin heç bir perspektivi yoxdur. Buna görə də özləri üçün çıxış yolları axtarırlar. Bunu Bolqarıstanın baş nazirinin verdiyi açıqlamadan da görmək mümkündür. Göründüyü kimi, o, layihələrdən kənarda qalmayacaqlarını bəyan edir. Bununla bağlı tərəfdaş kimi özlərinin və Avropa İttifaqının adını çəkir. Normaldır, çünki həmin ölkə Avropa İttifaqının üzvüdür. Digər tərəflər isə qaz ixrac edənlərdir. Bu xüsusda Azərbaycanın da adı çəkilir. Bizim üçün bu təklif cəzbedicidir. Çünki ölkəmiz bir marşrutla deyil, çoxşaxəli istiqamətlər üzrə ixraca üstünlük verir".
Məhəmmədəli QƏRİBLİ
