"Fərqli marşrutların olması bizim üçün böyük əhəmiyyət kəsb edir"
Odessa-Brodı neft boru kəməri Azərbaycan neftinin Ukrayna ərazisindən tranzit nəqli üçün tam hazırdır. Bu barədə Ukraynanın "Ukrtransnafta" şirkətinin məlumatında deyilir.
"Brodı" stansiyasında neft yükləmə estakadası və "Cənub" limanında neft terminalı Azərbaycandan Ukrayna ərazisi ilə Çexiya, Macarıstan, Slovakiya kimi Mərkəzi Avropa ölkələrinə neft nəql etməyə başlamaq üçün hazırdır. "Azərbaycan neftinin nəqlinə başlamaq üçün müvafiq infrastruktur texniki olaraq hazır vəziyyətdədir", - deyə məlumatda bildirilir.
Həmçinin qeyd olunur ki, "Ukrtransnafta" hazırda Azərbaycan neftinin Ukrayna ərazisi ilə Avropa istehlakçılarına çatdırılması üçün yeni marşrutların təşkili ilə bağlı Azərbaycan tərəfi və digər maraqlı tərəflərlə intensiv danışıqlar aparır.
Qeyd edək ki, Odessa-Brodı neft boru kəmərinin illik ötürücülük qabiliyyəti 14,5 milyon ton təşkil edir.
Bunun Azərbaycan üçün nə kimi əhəmiyyəti var?
İqtisadçı Günel Fərhadqızı qəzetimizə açıqlamasında bildirdi ki, deyilən istiqamətdə layihənin tam reallaşması Avropanın enerji təminatında mühüm rol oynayacaq: "Biz çoxlu neft tədarük edirik. Bu səbəbdən bu layihənin bərpası Qara, Xəzər, Baltik dənizləri üçün yaxşı imkanlar yaradacaq. Nəqliyyat koridorlarının rolu çox vacibdir. Odessa-Brodı kəməri Qara dənizdə Odessa və Lvov vilayətində Brodı şəhəri arasında 2001-ci ildə inşa edilib. Amma həmin vaxtdan bəri boru kəməri 2005-2010-cu illərdə Rusiya neftinin kiçik həcmlərlə Brodıdan Odessaya, 2010-2011-ci illərdə isə Belarusa tədarükü istisna olmaqla, demək olar, istifadə olunmamış qalıb. Qeyd edək ki, uzunluğu 667 km olan Odessa-Brodı kəməri layihəsinin dəyəri 200 mln. ABŞ dolları təşkil edib. Xəzər neftinin Avropaya nəqli üçün nəzərdə tutulan kəmər 2004-cü ildən revers rejimində işləyərək Rusiya neftini nəql edir. 2007-ci ilin oktyabrında Azərbaycan, Gürcüstan, Ukrayna, Polşa və Litva Bakı-Odessa-Brodı-Plotsk-Qdansk neft kəmərinin layihələndirilməsi və tikintisi üçün birgə müəssisə yaradılması haqda saziş imzalayıb.
Polşanın "Sarmatiya" boru kəməri müəssisəsinin bazasında yaradılan eyniadlı Polşa-Ukrayna birgə konsorsiumuna 2008-ci ilin yanvarında Azərbaycan Dövlət Neft Şirkəti, Gürcüstanın Neft-Qaz Korporasiyası və Litvanın "Klaipedos Nafta" şirkəti də daxil olub. Kəmər vasitəsilə ildə 40 mln. ton Xəzər neftinin nəqli planlaşdırılır. Bu baxımdan da kəmərin bərpası bizim üçün də böyük əhəmiyyət kəsb edir. Hesab edirəm ki, bununla Azərbaycan öz təbii ehtiyatlarını Avropa bazarına asanlıqla çıxara biləcək. Fərqli marşrutların olması bizim üçün böyük əhəmiyyət kəsb edir".
Məhəmmədəli QƏRİBLİ
