"Ölkəmizin həmin tədbirdə iştirakı mühüm əhəmiyyət daşıyır"
Qaz İxrac Edən Ölkələr Forumunun (GECF) baş katibi Seyid Məhəmməd Hüseyn Adeli Azərbaycana etdiyi səfər çərçivəsində bir sıra mühüm görüşlər keçirib. Energetika Nazirliyində keçirdiyi görüşdə Azərbaycanın GECF ilə əməkdaşlığını təqdir etdidiyini bildirib. Azərbaycanın bu qurumda müşahidəçi kimi iştirakı və əlaqələrin inkişafı ilə bağlı fikir mübadiləsi aparılıb.
Seyid Məhəmməd Hüseyn Adeli bu ilin noyabrında Qətərin paytaxtı Dohada GECF-ə üzv olan dövlətlərin energetika nazirlərinin növbəti görüşünün keçiriləcəyi barədə məlumat verib. Bildirilib ki, nazirlərin görüşündə qaz ixrac edən ölkələrin yeni inkişaf modelinin müəyyən edilməsi, 2040-cı ilə kimi bu dövlətlərin imkanlarına baxış və yaxın gələcəkdə qaz bazarına yeni oyunçuların qatılması perspektivləri kimi əsas üç məsələ nəzərdən keçiriləcək. Qaz bazarının inkişaf tendensiyaları və yeni təkliflər müzakirə olunacaq. Azərbaycanın da bu tədbirdə təmsil olunması vacib sayılaraq, Azərbaycan GECF ölkələrinin energetika nazirlərinin görüşünə dəvət edilib.
Xatırladaq ki, Azərbaycan GECF-də müşahidəçi statusunu 21 noyabr 2015-ci il tarixində forumun energetika nazirlərinin XVII görüşündə alıb. GECF-in əsas məqsədi üzv ölkələrin təbii qaz ehtiyatları üzərində suveren hüquqlarının müdafiəsi imkanlarının sərbəst planlaşdırılması, ekoloji nəticələri nəzərə alan davamlı və effektiv inkişafın təmin edilməsidir.
Azərbaycanın Dohadakı mühüm tədbirə dəvətinin əhəmiyyətini necə qiymətləndirmək olar?
İqtisadçı Qulu İsmayılov qəzetimizə açıqlamasında bildirdi ki, Azərbaycanın dəvət aldığı forum çox əhəmiyyətli və diqqətçəkən tədbirlərdən sayılır: "Dünya qaz hasilatında müşahidə olunan tendensiyalar, tələb və təklifin cari və gözlənilən balansı, qaz sənayesində yeni texnologiyalar və digər qlobal problemlərin təhlili məhz həmin forum çərçivəsində müzakirə olunur.
Bizim kifayət qədər qaz resurslarımız var. Azərbaycanın təsdiq edilmiş qaz ehtiyatları 2,6 trilyon kubmetrə bərabərdir. Hazırda "Abşeron", "Ümid" yataqlarının işlənməsi ilə bağlı hazırlıq işləri aparılır. Həmin yataqlar da istifadəyə veriləndən sonra Azərbaycan daha böyük həcmdə qaz ixrac edən ölkəyə çevriləcək. 2016-cı il bizim və neftlə zəngin olan bütün ölkələr üçün sınaq ilidir. Neftin qiyməti bir neçə dəfə düşüb, təbii ki, bu, bütün ölkələr üçün sınaqdır. Ancaq Azərbaycanın qaz ehtiyatları imkan verir ki, həmin itkilər tam kompensasiya edilsin. Məhz bu səbəbdəndir ki, ölkəmiz qaz hasilatına ciddi fikir verir. Biz həm də qaz ixracatında mühüm əhəmiyyətə malik olan tranzit ölkə rolunu oynayırıq. Söhbət Orta Asiyadakı resursların bizim ölkə vasitəsilə nəqlindən gedir.
Doha görüşü həm də Xəzəryanı ölkələrin qaz kəmərlərinin bir-birilə əlaqələndirilməsinin öyrənilməsi, Xəzəryanı ölkələrin enerji təhlükəsizliyinin təmin edilməsində yeni innovasiyaların tətbiqi, bazar şəraitinin yaradılması baxımından mühüm əhəmiyyət daşıyır. Bu baxımdan da ölkəmizin həmin tədbirdə iştirakı mühüm əhəmiyyət daşıyır".
Məhəmmədəli QƏRİBLİ
