Afsəddin Nəbiyev: “Sülh artıq bizim üçün bir xəyal deyil, Azərbaycan dövlətinin iradəsi ilə gerçəkləşən reallıqdır”
Prezident İlham Əliyev İslam İnkişaf Bankı Qrupunun 2026-cı il üzrə İllik Toplantılarının açılış mərasimində çıxışında bildirib ki, Ermənistanın xalqımıza qarşı törətdiklərini heç vaxt unutmayacağıq, lakin gələcəyə baxmağı bacarmalıyıq:
“Artıq təxminən bir ilə yaxındır ki, biz sülh şəraitində yaşayırıq və bunun müsbət nəticələrini görürük. Ermənistanın işğalçı qüvvələrinin xalqımıza və şəhərlərimizə qarşı törətdiklərini heç vaxt unutmayacağıq. Onların 65 məscidi dağıtmasını, xalqımızın dini hisslərini təhqir etmək məqsədilə məscidlərdə heyvan, o cümlədən donuz saxlamalarını heç vaxt unutmayacağıq. Biz Xocalı soyqırımını da heç vaxt unutmayacağıq. Lakin gələcəyə baxmağı bacarmalıyıq. Biz qisasımızı döyüş meydanında aldıq və bu, kifayətdir. Müharibə dayanmalı idi və onu dayandıran da biz olduq. Güclü tərəf olaraq biz müharibəyə son qoyduq və sülh təklif etdik. Beləliklə, bu gün sülh artıq reallıqdır”.
Sözügedən məsələni baki-xeber.com-a şərh edən AMİP-in sədr müavini Afsəddin Nəbiyevin fikrincə, Prezidentin yanaşması, rasional və reallıqlara əsaslanan yanaşmadır: “Bu açıqlamaya daha geniş, strateji pəncərədən baxdıqda real mənzərə hər bir birimizdə sonsuz qürur hissi oyadır. Son 200 ildə xalqımızın qarşılaşdığı torpaq itkiləri, qaçqınlıq, deportasiyalar, Xocalı kimi qanlı soyqırımları və işğal siyasəti tariximizin ən ağrılı səhifələri idi. Azərbaycan dövləti və xalqı bu ağır sınaqlarla, bədxah qonşumuzun arxasında dayanan böyük güclərin təzyiqləri ilə illərlə üz-üzə qalmışdı. Lakin XXI əsrin əvvəllərindən etibarən atılan hər bir addım bu tarixi ədalətsizliyi kökündən bitirməyə hesablanmışdı. Azərbaycan xalqı torpaqlarını azad etməklə həm də regionun son iki yüz illik qanlı taleyini dəyişdi. Otuz il ərzində ATƏT-in Minsk qrupu və Ermənistanın beynəlxalq havadarları Azərbaycanı mövcud status-kvo ilə yəni torpaqlarımızın işğalı faktı ilə barışmasına çalışdılar. Bizə beynəlxalq hüququn işləmədiyini, bu münaqişənin hərbi həllinin olmadığını təlqin edirdilər. Lakin Azərbaycan bu ədalətsiz yanaşmaya, ikili standartlara boyun əymədi”.
Sədr müavini hesab edir ki, ilk növbədə heç bir kənar gücdən asılı olmayan, nəhəng enerji və nəqliyyat layihələrinə rəhbərlik edən güclü bir iqtisadiyyat quruldu: “İqtisadi güc ən müasir silahlarla təchiz olunmuş, yeni nəsil hərb strategiyasına sahib, dünyanın ən güclü ordularından birinin yaradılmasına yönəldildi. Şəhidlərimizin qanı, qazilərimizin canı bahasına və Ali Baş Komandanın ətrafında yumruq kimi birləşən xalq-ordu vəhdəti formalaşdı. 44 günlük Vətən savaşında Azərbaycan qələbəni təmin etdi. Torpaqlarımız işğaldan azad olundu. Sonrakı illərdə qardaş Türkiyə ilə Şuşa Bəyannaməsini rəsmiləşdirməklə regional və qlobal miqyaslı sarsılmaz hərbi-siyasi müttəfiqliklər quruldu. Bütün bunların nəticəsində Azərbaycan xalqı öz taleyini başqalarının ümidinə buraxmadı, öz suverenliyini təmin etdi. Beynəlxalq qətnamələri öz gücü ilə icra etdi və Minsk qrupunu tarixin arxivinə göndərdi. Dövlət başçısının vurğuladığı kimi, müharibəni dayandıran da, sülhü təklif edən də Azərbaycandır. Bu, zəifliyin deyil, mütləq və əzəmətli gücün təzahürüdür. Qisasını yalnız döyüş meydanında, düşmənin hərbi mütəşəkkilliyini darmadağın edərək alan Azərbaycan bu gün regiona yeni bir nəfəs sülh reallığı gətirib. Biz keçmişi unutmuruq, Xocalını, dağıdılmış şəhərlərimizi qəlbimizdə yaşadırıq, lakin gələcəyi quran dövlət kimi irəliyə baxırıq. Azərbaycan bu gün öz torpaqlarını azad etmiş bir ölkə olmaqla yanaşı həm də regionun xəritəsini, təhlükəsizlik memarlığını və gələcəyini öz gücü ilə dizayn edən böyük bir gücdür. İllər boyu tətbiq edilən haqsızlıqlara rəğmən qazanılan bu Zəfər və bərqərar olan bu sülh hər bir azərbaycanlının başını dik, alnını açıq edən ən böyük tarixi mirasdır. Sülh artıq bizim üçün bir xəyal deyil, Azərbaycan dövlətinin iradəsi ilə gerçəkləşən reallıqdır”.
Vidadi ORDAHALLI
