Lüksemburqda olan Ermənistan xarici işlər naziri Ararat Mirzoyan Avropa İttifaqı ölkələrini Rusiyanın son məhdudiyyətləri qarşısında İrəvanı dəstəkləmək üçün addımları sürətləndirməyə çağırıb. Danışıqlarda iştirak edən bir avropalı diplomat “Azatutyun” radiosuna bildirib: "Bu, Rusiyanın hibrid və ticarət hücumlarına qarşı mübarizə aparmaq məqsədi daşıyan müsbət və vacib görüş idi".
Əvvəllər bildirilirdi ki, Avropa İttifaqı Ermənistana güzəştli şərtlər - Muxtar Ticarət Tədbirləri təklif etmək niyyətindədir ki, bu şərtlər çərçivəsində müəyyən Ermənistan malları gömrük rüsumları və kvotalar olmadan Avropa bazarına daxil ola biləcək. Ararat Mirzoyanın səfəri zamanı Avropa Komissiyası bu öhdəlikləri bir daha təsdiqləyib. Malların konkret siyahısının yaxın həftələrdə açıqlanması gözlənilir. Baş nazir Nikol Paşinyan da jurnalistlərlə keçirdiyi brifinqdə bu məsələyə toxunub: "Əlbəttə ki, Avropa İttifaqındakı tərəfdaşlarımıza belə sürətli reaksiya, o cümlədən maliyyə dəstəyinə görə minnətdaram. Büdcə imkanlarına əsaslanaraq iqtisadi qurumlarımıza daha məqsədyönlü yardım göstərən hallar var". Paşinyan böyük və uzunmüddətli çatdırılmalar üçün müqavilələrin mövcudluğunu vurğulayıb: "Biz bu gündən danışırıq; iş hər gün davam edir. Əgər son hökumət iclasını izləmisinizsə, İqtisadiyyat naziri yeni ixrac istiqamətlərinin sayının artıq onu keçdiyini qeyd etdi. Üstəlik, əvvəllər bu ölkələrin əksəriyyətinə ixrac sıfır idi. İndi bizdə yalnız mal partiyaları deyil, həm də böyük, uzunmüddətli çatdırılmalar üçün müqavilələr var". Başqa bir avropalı diplomat bildirib ki, Mirzoyanın səfəri Aİ ilə Ermənistan arasında münasibətlərin dərinləşməsini təsdiqlədi. O əlavə edib ki, Mirzoyan Ermənistanın enerji sektorunu şaxələndirmək istəyini və Aİ tərəfindən bu istiqamətdə konkret addımların atılmasına ehtiyac olduğunu vurğulayıb. “Azatutyun” mənbələrinin məlumatına görə, görüşdə Ararat Mirzoyan Türkiyə ilə sərhədin tezliklə açılmasına ümid etdiyini bildirib. Azərbaycanla sülh prosesinə gəldikdə isə, nazir Nikol Paşinyanın “Vətəndaş müqaviləsi” partiyasının konstitusiya çoxluğunu təmin edə bilmədiyi 7 iyun seçkilərindən sonra yaranan qeyri-müəyyənliyi qeyd edib. Bundan əvvəl Paşinyan parlamentdə Azərbaycan prezidentinin köməkçisi Hikmət Hacıyevin ötən həftəki səfərinin 7 iyun seçkilərinin nəticələri, xüsusən də bu nəticələr sonrası yaranan təhdidləri idarə etmək zərurəti ilə əlaqəli olduğunu bildirib.
Tahir TAĞIYEV
