İbrahim Rüstəmli: “Rusiyanın bu məsələyə reaksiyası rəsmən bəyan edilməsə də, bunu özünə qarşı bir təhdid, bir təcavüz kimi dəyərləndirir”
Ermənistanda ABŞ, Fransa və Yunanıstanın hərbçilərinin iştirakı ilə "Eagle Partner-2026" ("Qartal Tərəfdaşı-2026") adlı birgə beynəlxalq hərbi təlimlər keçirilir. Təlim iyunun 17-dən 25-dək davam edəcək. Təlim Ermənistanın "Zar" təlim mərkəzində baş tutur. Təlimlərə ümumilikdə 300-dən çox hərbi qulluçu qatılıb. Ermənistanda ABŞ, Yunanıstan və Fransanın iştirakı ilə keçirilən "Tərəfdaş Qartal" adlı hərbi təlimə maraqlıdır ki, Rusiyanın heç bir mövqeyi yoxdur.
Düzdür, indiyə qədər də Ermənistan NATO təlimlərinə və digər təlimlərə qatılıb. Amma bu dəfə söhbət NATO-nun ümumi təlimlərindən yox, Rusiyaya qatı düşmən olan üç ölkədən-ABŞ, Fransa və Yunanıstandan gedir. Amma buna Rusiyadan hələlik heç bir diplomatik, siyasi reaksiya yoxdur. Təlimlər gedir, Rusiya reaksiya vermir. Rusiya bu təlimə niyə susur?
Hərbi ekspet İbrahim Rüstəmli baki-xeber.com-a açıqlamasında xüsusi vurğuladı ki, artıq dünyada yeni güc mərkəzləri, yeni geosiyasi və iqtisadi, hərbi xəritələr müəyyən olunur. Ekspertin sözlərinə görə, güc mərkəzlərinin, gücün transformasiyası, gücün yer dəyişməsi, balansın dəyişməsi prosesi gedir və bu prosesdə əsas məqsəd dünyanı bütövlükdə nəzarət altına almaqdır. “Bunlar dünyanı vahid mərkəzdən idarə etmək məqsədi güdür. Ona görə də bu gün Rusiya-Ukrayna müharibəsi getdikcə daha aktiv fazaya daxil olur. Çünki tapşırıq belədir. Yəni başda ABŞ, Fransa, Almaniya olmaqla Ukraynaya dəstək verən ölkələr durur. Adlarını sadaladığımız ölkələr də Ukraynanın müttəfiqi sayılır. Təzyiq vasitələrini daha effektiv etmək, Rusiyaya daha böyük zərbələr vurmaq, Rusiyanı daha çox çökdürmək üçün əllərindən gələni edirlər. Məqsəd nədən ibarətdir?Tutalım, dünənə kimi Amerika Sovet Birliyi mövcud olub və ABŞ-la Sovet İttifaqı qarşıdurması var idisə, bu gün artıq keçmiş SSRİ-nin varisi olan Rusiya Federasiyasının bu gün super güc olmaq imkanı demək olar ki, tükənib. Artıq o super güc deyil. Əgər Rusiya super güc kimi özünü hiss edirsə, bu da onun nüvə silahlarına istinad etməsi ilə bağlıdır. Yəni əgər Rusiyanın nüvə silahı olmasa Rusiya sıradan bir rəqibə çevriləcək. Bugünlərdə Moskvanın total şəkildə uçan pilotsuz aparatlarla hücuma məruz qalması, xüsusilə strateji obyektlərin sıradan çıxarılması, enerji resurslarının damarlarının kəsilməsi prosesi gedir. Bundan da əsas məqsəd, əlbəttə, Rusiyanı daha çox dalana dirəmək, Rusiyanı daha çox çökdürməkdir. Rusiyanı daha çox çökdürməklə danışıqlar masası arxasına cəlb etmək və onu diktə olunan şərtlərlə razılaşmağa vadar etməkdir. Başqa bir məqsəd yoxdur. Yəni, hətta mən bu fonda onu da xüsusi vurğulamaq istəyirəm ki, Rusiya-Ukrayna müharibəsində bu müharibəyə Ukrayna və Rusiya cəlb olundu.
Bu çox zərər dəqiqliklə işlənmiş layihədir və Qərbin beyin mərkəzləri, siyasi mütəxəssisləri bu işin öhdəsindən deyərdim, uğurla gəldilər. Bunu ona görə xatırladıram ki, hətta Ukrayna-Rusiya müharibəsində də Ukraynaya dəstək vermək, Ukrayna xalqının halına yanmaq, Ukrayna dövlətçiliyini qorumaq məqsədi güdmür. Yəni burada başda ABŞ, Fransa, Almaniya olmaqla Ukraynaya dəstək verən ölkələrin məqsədi budur.
Ermənistanda keçirilən təlimlərə susqun qalmasına gəlincə, bu onu göstərir ki, Rusiya artıq bununla barışıb. Özünə düşmən mövqeəd dayanan üç ölkənin Ermənistanda keçirdiyi hərbi təlimlərə susqun qalması Rusiyanın çıxılmaz vəziyyətdə olmasının göstəricisidir.
Rusiya artıq bu məsələdə aydın koordinatlarla, aydın mövqelərlə üz-üzədir və Rusiyanın da mövqeyi aydındır. Rusiya əgər Ukrayna müharibəsində konkret razılığa gəlməzsə, Rusiya üçün çox çətin olacaq. Yəni bilirsiniz, bütün müharibələr sülhlə bitib. Amma indiki vəziyyətdə Rusiya elə bil ki, “not set” vəziyyətindədir. Rusiya elə bir dalana dirənib ki, nə irəli gedə bilir, nə dala. Bu çox ciddi bir problemdir. Ona görə də Rusiyanın Qərb, Avropa ölkələrinə münasibəti aydındır. Eyni zamanda Qərb ölkələrinin, NATO-nun və Avropa ölkələrinin də Rusiyaya münasibəti tam aydındır. Bu gün Rusiyanın bu təlimlərə reaksiya verməməsi heç nəyi dəyişmir. Rusiyanın bu məsələyə reaksiyası rəsmən bəyan edilməsə də, bizim üçün aydındır. Yəni Rusiya bunu özünə qarşı bir təhdid, bir təcavüz kimi dəyərləndirir. Amma hazırkı vəziyyətdə bu təhdidə, bu təcavüzə cavab verəcək halda deyil. Çünki Ukraynada o çox ciddi problemlər yaşayır”-deyə İ.Rüstəmli vurğuladı.
İradə SARIYEVA
