Akif Nağı: “Bunu Paşinyanın siyasi gedişi hesab etmək olar”
Ermənistanın baş naziri Nikol Paşinyan Avrasiya İqtisadi Birliyinin Hökumətlərarası Şurasının qarşıdakı iclasında iştirak etmək niyyətində olduğunu açıqlayıb.
Paşinyan bu barədə iyunun 18-də keçirdiyi brifinqdə jurnalistlərin suallarını cavablandırarkən danışıb.
Ermənistanın baş nazirinə tərəfdaş ölkələrin nümayəndələri ilə görüşmək, onların “gözünün içinə baxmaq və bütün məsələlərə aydınlıq gətirmək” üçün nə vaxt səfərə çıxacağı barədə sual ünvanlanıb. Paşinyan cavabında bildirib ki, yaxın vaxtlarda Avrasiya İqtisadi Birliyinin Hökumətlərarası Şurasının iclası keçiriləcək və o, həmin toplantıda iştirak etməyi planlaşdırır. Paşinyan əlavə edib ki, Avrasiya İqtisadi Birliyinin institutları normal fəaliyyətini davam etdirir.
Məlumdur ki, Ermənistanda keçirilən parlament seçkisindən əvvəl N.Paşinyan Avrasiya İqtisadi Birliyinin (AİB) bir neçə toplantısında iştirak etmədi. Bu da AİB-də çox böyük söz-söhbətlər doğurmuşdu. Bundan əvvəl AİB məsələdə də qoydu, üzv dövlətlər Ermənistandan tələb etdilər ki, referendum keçirsin və bu birlikdə qaldığını, yoxsa Avropa İttifaqına getdiyini müəyyən etsin, bildirsin.
Seçkidən sonra Paşinyanın mövqeyi dəyişir, yoxsa Rusiyanın hədədlərindən qorxur ki, Ermənistanı AİB-dən çıxararlar, qazın qiymətini qaldırarlar? Paşinyan geri çəkildi, yoxsa bu bir gedişdir? Seçkidən əvvəl AİB-in iclaslarında iştirak etmirdi, amma indi gedib iştirak edəcək. Bu dəyişikliyin mahiyyəti nədir?
Azad Vətən Partiyasının sədri Akif Nağı baki-xeber.com-a bildirdi ki, Paşinyan müəyyən taktiki gedişlər, manevrlər etməyə məcburdur. “Çünki Rusiyanın təzyiqi var. Rusiya Paşinyana qarşı həddən artıq qəzəblidir. Rusiya Ermənistanda istədiyini ala, öz qüvvələrini hərəkətə gətirə bilmədi. Amma Ermənistanda vəziyyəti pozmaq üçün təxribatlar etməyə davam etdi. Bunu seçkilər də göstərir ki, onun müəyyən imkanları var. Yəni seçkilərin nəticələri göstərdi ki, açıq Rusiyapərəst mövqeyə dayanan siyasi qurumlar müəyyən sosial bazaya malikdir. Ermənistan parlamentində onlar 41 deputatla təmsil olunurlar. Bu da az qüvvə deyil. Yəni Paşinyanın 64 deputatına qarşı bunlar 41 deputatla çox təxribatlar törədə bilərlər. Eyni zamanda onların arxasında dayanan müəyyən qüvvələr də var. Bu seçkilər göstərdi ki, erməni diaspora təşkilatlarının demək olar ki, hamısı Paşinyana qarşıdır. Avropadakıların da Paşinyana qarşı olduğu məlumdur. Amerikadakılar da həmçinin. Anna Akopyanı Amerikaya toplantıya gönədrib. O, böyük ehtimalla orada həm də Amerikadakı diaspora təşkilatları ilə görüş keçirəcək. Orada çox böyük erməni təşkilatları var, lobbiçilik fəaliyyəti ilə məşğuldurlar. Onların da müəyyən görüşlər keçiriləcək. Onlar da Paşinyana qarşıdırlar. Nə qədər qəribə olsa da, onlar da Paşinyana qarşıdır, baxmayaraq ki, o, Qərbyönümlü mövqedədir. Amma erməni təşkilatları, xaricdəki erməni mərkəzləri ona qarşıdırlar. Onlar hamısı erməni ideyası ilə xəstələniblər, o xəstəlikdən də xilas ola bilmirlər. Xəstəlikdən başqa da bu onların artıq həyat tərzinə, siyasi xəttərinə, siyasi platformalarına çevrilib. Ondan geri çəkilə bilmirlər, ən azından yaxın 30-40 il ərzində elə olacaq. Yəni belə bir vəziyyətdə təbii ki, Paşinyan da Rusiya ilə manevr edir. Bunu Paşinyanın siyasi gedişi hesab etmək olar. Ona görə o xətt əsas Qərbə doğru yönəlir, eyni zamanda Rusiya ilə münasibətləri tam şəkildə kəsmir, müəyyən addımlar atır. Bir sözlə, elə gedişlər edir ki, körpülər tam yandırılmasın. Deyək ki, Rusiya ilə bağlı addımlar atır, yenidən qayıdır, yenidən onların himayəsində olduğunu göstərmək istəyir. Hesab edirəm ki, Paşinyan əsas Azərbaycan və Türkiyə ilə siyasətini uyğunlaşdırır və çalışır ki, Azərbaycan və Türkiyənin cızdığı yol xəritəsi ilə getsın. Bu onun əsas söykəndiyi yoldur. Nə Qərbə, nə Rusiyaya ciddi şəkildə etibar etmir. İndi sabah tutaq ki, Avropa onlar üçün vizasız rejim tətbiq etsə, ondan da yararlanmağa çalışacaqlar. Onlar bu prosesləri davam etdirir. Amma hər halda onlar iqtisadi, siyasi cəhətdən çox tərəfləri Azərbaycan və Türkiyədən asılıdır, onu başa düşürlər artıq”.
Paşinyanın dorudan da, Avrasiya İqtisadi Birliyinin bu toplantısında iştirak edib etməyəcəyi ilə bağlı sualların olduğunu deyən A.Nağı vurğuladı ki, Ermənistanın baş naziri son məqamda başqa qərarlar qəbul edə bilər. “Yəni onun bu manevrləri var. Hesab edirəm ki, orada daha çox kəşfiyyat xarakterli bir iştirakı olacaq. Rusiyanı tam incitməmək üçün atılan bir addım olacaq bu. Amma Rusiya da sərt mövqedədir. Ya Avropa Birliyi, ya biz. Eyni vaxtda tutaq ki, Ermənistanın Avropa Birliyinə namizədliyi məsələsi müzakirə olunur. Qərblə də, eyni vaxtda Avrasiya İqtisadi Birliyində işini davam etdirir . Rusiya mövqeyi bir mənalıdır-ya onlar, ya biz. Paşinyan “ya onlar, ya biz” düsturundan yumşaq bir varianta keçmək istəyir. Belə demək istəyir ki, həm siz, həm də onlar. Çünki aprel ayının əvvəlində Moskvada Putinlə Paşinyanın görüşündə Putin belə bir açıqlama vermişdi ki, biz sizin Avropa İttifaqı ilə əlaqələrinizdən, münasibətlərinizdən narahat deyilik və buna normal baxırıq. Amma sonradan, seçki ərəfəsində Rusiya sərt mövqeyə keçdi. Yəqin orada başqa hadisələr də baş verib. Ola bilər ki, əvvəlki aprel formatına qayıtsınlar ki, yəni siz dediniz, sizin məsləhətinizlə mən Avropa ilə əlaqələr saxlayıram, amma əsas müttəfiq sizsiniz. Yəqin ki, Paşinyan təxminən belə bir mövqedən çıxış edəcək”-deyə A.Nağı qeyd etdi.
İradə SARIYEVA
