Azər Həsrət: “Rusiya Ukrayna ilə Azərbaycan, Ukrayna ilə yəhudilər arasında bir çat yaratmaq istəyir, amma məqsədinə nail ola bilməyəcək”
Moskvaya kütləvi dron hücumu zamanı məşhur “Sadovod” bazarında yanğın baş verib. Sosial şəbəkələrdə yanğının görüntüləri paylaşılıb. Vurulmuş dronun “Sadovod” bazarının ərazisinə düşməsini Moskvanın meri Sergey Sobyanin də təsdiqləyib. O, hadisə nəticəsində heç kimin xəsarət almadığını bildirib.
Xatırladaq ki, Moskvanın ən böyük bazarlarından biri olan “Sadovod” azərbaycanlı iş adamları Qod Nisanov və Zarah İliyevin “Kievskaya Ploşad” şirkətinə məxsusdur. Bazar 40 hektar ərazidə yerləşir.
Bu iş adamları özləri milliyətcə yəhudidir. Özləri də Azərbaycandan getmiş yəhudilərdir. Hələ bəlkə Azərbaycan vətəndaşlıqları da olub, ya bəlkə də var. Eyni zamanda Ukrayna da həm yəhudilərlə, həm də İsraillə yaxşı münasibətdə olan bir ölkədir. Ukraynanın nə marağı ola bilərdi bazarı vursun? Bu ola bilərmi ki, bu azərbaycanlı iş adamlarına təzyiq çərçivəsində Rusiyanın dövlət qurumlarının, müəyyən orqanlarının özünün işi olsun və bunu Ukraynanın üstünə atsınlar? Bu ola bilərmi? Bu bazarı doğrudanmı, Ukrayna dronları vurub?
Siyasi ekspet Azər Həsrət baki-xeber.com-a bildirdi ki, bu Rusiyanın öz işidir, bu işin Ukrayna ilə bağlılığı yoxdur. “Bu iş adamları həqiqətən də çox dəyərli azərbaycanlılardır. Əslən Azərbaycandandırlar, yəhudi əsillidirlər. Başqa məsələri bir yana qoyuram, İkinci Qarabağ müharibəsində də doğrudan da bütün varlıqları ilə Azərbaycan dövlətinə, xalqına yardım etdilər. Yəni bizim yanımızda oldular, bir azərbaycanlı kimi davrandılar. Ümumiyyətlə, onların hər ikisi Azərbaycanla, azərbaycanlılarla çox yaxındırlar. Özlərini heç vaxt bizdən ayırmayıblar. Biz nə qədər azərbaycanlıyıqsa onlar da o qədər azərbaycanlıdır. Bu bir. İkinci tərəfdən, əlbəttə, Ukraynanın onları hədəfə almaq niyyəti heç vaxt olmayıb, ola da bilməz. Ukrayna durduğu yerdə niyə onların bazarlarını hədəfə alsın ki? Onlar Ukraynaya qarşı təcavüzkar müharibədə iştirak etmirlər. Siz heç görmüsüzmü onlar bu müharibə ilə bağlı hansısa çağırışlar etsinlər, nə isə fikirlər səsləndirsinlər? Şəxsən mən az-çox bunları izləyən birisiyəm, heç vaxt eşitməmişəm ki, onlar Ukraynaya qarşı nə isə desinlər. Digər tərəfdən, bu Rusiya təbliğatının görşənişidir.
İyunun 17-də Bryanskidə uşaq və yeniyetmələri istirahətə aparan Belarusa aid avtobus vuruldu, dərhal Rusiya təbliğatı başladı ki, Ukrayna dronları Belarus avtobusunu vurub. Oradakı yeniyetmələr zərər görüb, bir nəfər müşaiyətçi qadın ölüb. Bundan başqa 2024-cü ilin 25 dekabrında bizim təyyarəmizi Qroznu üzərində vurmuşdular və dərhal Rusiya təbliğatı belə tezislər üzərində quruldu ki, Ukrayna dronları Azərbaycan təyyarəsinin vurulmasına səbəb olub. Guya orada Ukrayna dronları uçurmuş Rusiya da onları zərərsizdirərkən Azərbaycan təyyarəsi vurulub və sair. Şəxsən mən də öz imkanlarım çərçivəsində araşdırmışam ki, Bryanskidə avtobusun vurulması məsələsində Ukrayna dronları ümumiyyətlə ərazidə olmayıb. Qroznu səmasında Azərbaycan təyyarəsinin vurulması hadisəsində Ukrayna dronlarının olması təsdiqini tapmır. Yəni bunlar o deməkdir ki, Rusiya Belarus avtobusunu vurur və hadisəni Ukraynanın üzərinə atır ki, Ukrayna və Belarus münasibətləri gərginləşsin. Bu tərəfdən Azərbaycan təyyarəsini vurur Ukraynanın üzərinə atır ki Azərbaycan Ukrayna münasibətləri gərginləşsin. İndi də Ukrayna əlbəttə dünyanın gözü qarşısında Moskvaya hücum edib. Ukrayna bunu gizlətmir də. Vurduğu və vurmaq istədiyi hədəfləri də açıq aydın şəkildə göstərib.
Belə bir şəraitdə Rusiya təbliğatı hansısa bazarın, xüsusən də azərbaycanlılara aid bazarın hədəfə alındığı barədə təbliğat aparır. Əlbəttə ki,bunun heç bir əsası yoxdur. Rusiyanın məqsədi yenə də biz azərbaycanlıları Ukraynaya qarşı kökləməkdir. Amma bizi aldada bilməyəcək, bilirik ki, Ukraynanın bizə qarşı hər hansı bir pis niyyətli olmayıb, ola da bilməz. İstər Rusiya, istərsə də Azərbaycan ərazisində baş verənləri çirkin təbliğat hesab edirik. Düşünmürük ki, Ukrayna azərbaycanlı yəhudilərə aid olan bir bazarı hədəfə alıb. Almasında da bir məntiq yoxdur. Yəni Ukrayna bir bazarı vurmaqla nə qazanır ki? Ukraynanın vurduğu yerlərə baxın. Onlar strateji obyektlər, neft emalı zavodlarıdır. Yaxsud onlara bənzər ayrı-ayrı yerlərdir, hərbi obyektlırdir. Müharibə də bu cür hədəflərə qarşı aparılır. Yoxsa bazarı vurmaqla Ukrayna nə qazana bilər ki? Heç məntiq də yoxdur. Yəni çirkin, qara təxribatdır, Rusiya Ukrayna ilə Azərbaycan, Ukrayna ilə yəhudilər arasında bir çat yaratmaq istəyir, amma məqsədinə nail ola bilməyəcək”-deyə A.Həsrət qeyd etdi.
İradə SARIYEVA
