Əli Orucov: “Xamneyinin Trampla yan-yana durmasını təsəvvür etmək belə mümkün deyil”
İntensiv danışıqlardan sonra məmnuniyyətlə Amerika Birləşmiş Ştatları ilə İran İslam Respublikası arasında Sülh Sazişinin əldə edildiyini elan edirik. Bu barədə Pakistan Baş Naziri Şahbaz Şərif elan edib.
O, hər iki tərəf Livan da daxil olmaqla, bütün cəbhələrdə hərbi əməliyyatların dərhal və birdəfəlik dayandırıldığını bəyan edib. Rəsmi imzalanma mərasimi iyunun 19-da İsveçrədə keçiriləcək.
ABŞ Prezidenti Donald Tramp isə bəyan edib ki, ABŞ və İran arasında anlaşma memorandumu imzalanıb. Onun sözlərinə görə, Hörmüz boğazı iyunun 19-da tam şəkildə açılacaq.
ABŞ-ın vitse-prezidenti Ceyms Di Vens Cenevrədə müqavilənin imzalanması mərasimində iştirak etməyi planlaşdırdığını bildirib. O, Amerika liderinin özünün də nümayəndə heyətlərinin görüşündə iştirak edə biləcəyini bildirib.
Vensin açıqlamasından belə məlum olur ki, imzalama mərasimində prezident Tramp da iştirak edəcək. Tramp iştirak edəcəksə, o zaman gərək İran lideri də orada iştirak etsin. İran lideri olmasa Tramp ora gedərmi? O baxımdan nə dərəcədə realdır ki, Tramp imzalanma mərasimində olsun? Yəni Tramp İran hakimiyyətində birincidən başqa hər hansı bir adamla bu sazişi imzalayarmı?
Sözügedən məsələni baki-xeber.com-a şərh edən AMİP funksioneri Əli Orucov Trampın Cenevrədə imzalanma mərasimində iştirakını istisna etdi: “Hesab edirəm bu, mümkün deyil. Düzdür, Tramp aşırı dərəcədə şöhrətpərəsdir və istəyər ki, bütün dünyanın gözü qarşısında belə bir imzalama mərasimi olsun. Hamı da onu buna görə alqışlasın. Ancaq haradan baxsaq bu, real görünmür. Bunun üçün gərək İran prezidenti Məsud Pezeşkian orada iştirak etsin. Çünki prezident statusundadır. İranın mühafizəkar dairələri öz sifətlərini qorumaq üçün heç vaxt buna imkan verməz. Ali dini lideri Müctəba Xameneinin imzalamada iştirakı isə, ümumiyyətlə real deyil. Ən azından ona görə ki, onun fiziki olaraq hansı vəziyyətdə olduğu məlum deyil. Çünki müharibə başlayandan sonra bir dəfə olsun efirdə görünməyib. Bəzi məlumatlara görə ağır yaralanıb. Başqa bir tərəfdən Xamneyinin Trampla yan-yana durmasını təsəvvür etmək belə mümkün deyil. Ən azından ona görə ki, Trampın əmri ilə atası Seyid Əli Xamenei öldürülüb. Başqa bir tərəfdən, Cenevrada razılaşmanın imzalanması gözlənilsə də, uzun illərdir ABŞ-la İran düşməndir. İki ölkə arasında diplomatik münasibətlər mövcud deyil. O üzdən, belə bir imzalama mərasiminin olacağını təsəvvür belə etmək çətin məsələdir”.
Vidadi ORDAHALLI
