Bəhruz Quliyev: “Bu baxımdan, Moskva üçün Köçəryan, Sarkisyan və ya digər revanşist liderlərin siyasi taleyi deyil...”
Ermənistan Baş naziri Nikol Paşinyan revanşist müxalifəti nəzərdə tutaraq bəyan edib ki, Ermənistandan qaçmağı xəyal edəcəksiniz, amma bu fürsətiniz olmayacaq:
“Xalq açıq şəkildə üçbaşlı mafiyanın diz çökdürülməsini və məhv edilməsini tələb edir və bu, qaçılmaz olaraq baş verməlidir. Yeri gəlmişkən, kaluqalının əsas kuklası olan Serji (Serj Sarkisyan) unutmamışıq və unutmayacağıq. Ona görə də panikaya düşüb çantalarınızı yığmağa tələsməyin. Hətta seçki kampaniyası zamanı da demişdim ki, Ermənistandan qaçmaq fürsətini xəyal edəcəksiniz, amma bu fürsətiniz olmayacaq”.
Qeyd edək ki, bir neçə gün əvvəl “Çiçəklənən Ermənistan” Partiyasının sədri Qaqik Tsarukyan barəsində cinayət işi başlanıb, onun ölkədən çıxmasının qarşısı alınıb. Daha sonra Ermənistanın sabiq prezidenti Robert Köçəryanın hava limanından ölkəni tərk etməsinə imkan verilməyib. Növbə deyəsən Sarkisyanındır. Bir sözlə, seçkidən sonra Paşinyan Rusiyapərəst müxalifətin üzərinə hücuma keçib.
Maraqlıdır, Paşinyan Rusiyanın əsas adamlarına qarşı bu qədər aqressivlik, arxayınçılıq və inadkarlıq nümayiş etdirməklə ola bilərmi ki, bu adamların taleyini öz bildiyi kimi həll etmək üçün Putinlə hardasa gizli bir razılaşması olsun? Yəni ola bilməz axı ki, Putinin adamları olduğunu aşkar bildiyi bu insanları bu dərəcədə arxayın formada alçaldsın. Oxşayır ki, Paşinyanın Putinlə hardasa gizli razılaşması var və yaxud da ondan razılıq alıb. Ola bilərmi ki, bu adamların siyasi olaraq məhv edilməsinə Putindən razılıq alsın?
Sözügedən məsələ ilə bağlı fikirlərini baki-xeber.com-la bölüşən “SƏS” qəzetinin baş redaktoru, politoloq Bəhruz Quliyev bununla bağlı bir sıra məqamlara toxundu: “Paşinyan tərəfindən revanşist və Rusiyaya yaxın müxalif qüvvələrə qarşı səsləndirilən son sərt bəyanatlar ölkədaxili siyasi proseslərin yeni mərhələyə keçdiyini göstərir. Xüsusilə, sabiq prezidentlər Robert Köçəryan və Serj Sarkisyan, eləcə də Qaqik Tsarukyan kimi fiqurlara yönəlmiş siyasi və hüquqi təzyiqlər Paşinyanın seçkidən sonra mövqelərini daha da möhkəmləndirmək niyyətindən xəbər verir. Burada əsas suallardan biri budur ki, Paşinyan Rusiyanın Ermənistan siyasətində uzun illər əsas dayaqları hesab olunan şəxslərə qarşı bu qədər sərt davranışı hansı təminata arxalanaraq həyata keçirir? Əlbəttə, hazırda Paşinyanla Rusiya Prezidenti Vladimir Putin arasında bu məsələlərlə bağlı hər hansı gizli razılaşmanın mövcudluğunu təsdiq edən faktlar yoxdur. Lakin siyasi proseslərə diqqətlə baxdıqda bir məqam aydın görünür ki, Paşinyan Moskvanın əvvəlki illərdə olduğu kimi Ermənistanın daxili siyasi həyatına birbaşa müdaxilə etmək imkanlarının zəiflədiyini hesab edir və bu qənaətlə hərəkət edir. Digər tərəfdən, Kremlin də regionda dəyişən geosiyasi reallıqları nəzərə alaraq, Ermənistan daxilində konkret şəxslərin deyil, öz strateji maraqlarının qorunmasına üstünlük verməsi ehtimalı istisna deyil. Bu baxımdan, Moskva üçün Köçəryan, Sarkisyan və ya digər revanşist liderlərin siyasi taleyi deyil, Ermənistanın bütövlükdə Rusiyanın təsir dairəsindən tam çıxmaması daha önəmli ola bilər”.
B. Quliyevin fikrincə, Paşinyanın davranışlarında görünən arxayınlıq həm də onun seçkilərdən sonra əldə etdiyi siyasi legitimlikdən qaynaqlanır: “O, revanşist düşərgəni tamamilə zəiflətməyi və gələcəkdə hakimiyyətinə təhlükə yarada biləcək mərkəzləri sıradan çıxarmağı qarşısına məqsəd qoyub. Məhz buna görə də onun ritorikası getdikcə daha sərt və kompromissiz xarakter alır. Bununla belə, Kremlin bu proseslərə tam laqeyd qaldığını söyləmək də doğru olmaz. Rusiya ənənəvi olaraq Ermənistan siyasətində özünə yaxın qüvvələrin tamamilə sıradan çıxarılmasını diqqətlə izləyir. Ona görə də yaxın aylarda Moskvanın bu məsələyə münasibəti daha aydın görünəcək. Mən düşünürəm ki, burada söhbət daha çox gizli sövdələşmədən deyil, Paşinyanın Rusiyanın mövcud geosiyasi prioritetlərini düzgün hesablamasından gedir. O, Kremlin hazırkı mərhələdə Ermənistan daxilindəki revanşist qüvvələri müdafiə etmək üçün ciddi qarşıdurmaya getməyəcəyini düşünür və buna uyğun hərəkət edir. Lakin siyasətdə vəziyyət sürətlə dəyişə bilər. Əgər Moskva Ermənistan daxilində öz təsir imkanlarının ciddi şəkildə zəiflədiyini görsə, həmin qüvvələrin müdafiəsi istiqamətində yeni addımlar atması da istisna edilmir. Bu səbəbdən, hesab edirəm ki, Paşinyanın revanşist müxalifətə qarşı başladığı kampaniya hələ yekun nəticəsini verməyib. Qarşıdakı dövr Ermənistanın daxili siyasi balansı ilə yanaşı, İrəvan-Moskva münasibətlərinin gələcək istiqamətini də müəyyənləşdirəcək əsas mərhələlərdən biri olacaq”.
Vidadi ORDAHALLI
