Azər Həsrət: “Avropa İttifaqı kimi nəhəng iqtisadi gücü olan bir qurum Ermənistan üçün Rusiyanı əvəz edə bilər”
“İyulun 5-də Ermənistana gedəcəyəm”. Avropa İttifaqının genişlənmə məsələləri üzrə komissarı Marta Kos bunu öz “X” hesabında Ermənistanın xarici işlər naziri Ararat Mirzoyanla görüşü barədə məlumat paylaşaraq yazıb.
Kos qeyd edib ki, Rusiya Ermənistana təzyiqləri artırmağa davam edir, ölkəni son seçkilərdə erməni xalqının etdiyi demokratik seçimdən uzaqlaşdırmağa çalışır. O, həmçinin Ermənistanın xarici işlər naziri Ararat Mirzoyanla görüşəcəyini açıqlayıb. Marta Kosun sözlərinə görə, Aİ Xarici İşlər Nazirləri Şurasının iclası zamanı üzv ölkələr Aİ-nin Ermənistana dəstəyini davam etdirə və həmrəyliyini necə nümayiş etdirə biləcəyini müzakirə edəcəklər: “Biz Ermənistana maliyyə dəstəyi verəcək və qonşuları və Avropa ilə ticarəti asanlaşdıracağıq. İyulun 5-də konkret addımlar atmaq üçün İrəvana gedəcəyəm”.
Rusiyanın təzyiqləri fonunda Aİ-nin dəstəyi Ermənistan üçün yetərli olacaqmı? Axı Ermənistanın Rusiyadan asılılıq əmsalı çox böyükdür. Təkcə 50-100 milyon avro ilə iş düzələcəkmi?
Sözügedən məsələyə aydınlıq gətirən siyasi şərhçi Azər Həsrət baki-xeber.com-a açıqlamasında bildirdi ki, Ermənistan kiçik dövlət olduğu üçün ciddi problemin olacağı real görünmür: “Çünki Ermənistanın həm əhalisi say baxımından azdır, həm də ərazisi kiçikdir. Əlbəttə ki, Avropa İttifaqı kimi nəhəng iqtisadi gücü olan bir qurum Ermənistan üçün Rusiyanı əvəz edə bilər. Özü də ciddi şəkildə əvəz edə bilər. Sadəcə olaraq işi yarımçıq qoymasalar. Yəni Ukraynadakı kimi uzada-uzada, uzun müzakirələr sonrası yardımlar etməmək şərti ilə. Əgər Aİ səmimi şəkildə dursa, indiki mərhələdə Ermənistan Rusiyadan tam qopacaq. Bu da bizə lazımdır. Azərbaycana da lazımdır, bütövlükdə Cənubi Qafqaza da lazımdır. Elə Aİ-nin özünə də lazımdır. Yəni atacağı addımlarda səmimi olmalıdılar. Bu, bir. İkincisi, Ermənistan təkbaşına bu prosesdə nəzərə alınmamalıdır. Ermənistanın əsas qonşusu Azərbaycan Respublikası mütləq nəzərə alınmalıdır. Yəni hansısa maliyyə yardımlarından, dəstəkdən söhbət gedirsə, bunu sadəcə Ermənistan üçün edibdə işi bitmiş hesab etmək yanlışlıq olar. Aİ doğurdan da Ermənistanın Rusiyadan qopması üçün çalışırsa, bu arada Azərbaycana da müəyyən dəstək verməlidir. Çünki Ermənistanın nicatı, qurtuluşu Azərbaycanın Ermənistana münasibətindən çox asılıdır. Azərbaycan Ermənistanın qurtuluşuna hansısa şəkildə töhfə verməsə, Aİ təkbaşına bunu bacara bilməyəcək. Ona görə də hansısa yardımlardan, maliyyə dəstəyindən söhbət gedirsə, Avroittifaq həm də Azərbaycanı o siyahıda görməlidir. Azərbaycanla Ermənistanın iksinə birlikdə dəstək verilməlidir ki, Ermənistan Rusiyadan ən azı Azərbaycan qədər qurtulmalıdır. Bütün kommunikasiyalar Ermənistan üçün Azərbaycandan, Türkiyədən keçir. Türkiyə də bir qayda olaraq bu məsələdə Azərbaycanla məsləhətləşir. Yəni qardaş Türkiyə Azərbaycanın atacağı addımlara bağlıdır. Ona görə də Aİ Ermənistan məsələsində mütləq Azərbaycanın mövqeyini nəzərə almalıdır. Ermənistana ayıracağı yardımlarda Azərbaycanı da siyahıya əlavə etməlidir”.
Vidadi ORDAHALLI
